¹ Yi Festusi va nutoawo mɛ yi ŋkeke yo ŋgbodomɛ, edjo le Kesari sɔyi Yerusalɛm. ² Nunɔla kudo yudatɔwo mɛganwo sɔnyɔ ɖo Pɔlu ŋtsi le Festusi gbɔ ³ yi wo tegbeɖo nyɔlɔ dji. Wo ɖekuku nɛ Festusi so Pɔlu ŋtsi, benɛ yana nɛ Pɔlu neva Yerusalɛm kudo susu be yo wawui le mɔdji. ⁴ Festusi tonɔwo be Pɔlu tsi Kesari yo gakpamɛ be yeŋtɔ yela trɔva xɔn. ⁵ Eto be :"Amɛtsiwo kpeŋtsi lɔ nɛ kplɔyedo. Yi nɛ nu baɖa ɖele amɛŋtsi lɔ ,woayi sɔ nya ɖoŋtsi." ⁶ Tshinɛ yiwɔ ŋkeke enyi alo ewo toŋtsi lɔ, eɖi vayi Kesari. Le yo ŋkegbea, enɔ anyi ɖo kodjoɖoxoɛ yi ɖegbe be woayi kplɔ Pɔlu va. ⁷ Tsi va lɔ, Yudatɔwo tsi wo so Yerusalɛm goguii, yi wo hin nyasɔɖeamɛŋtsi gbogboɖe tsi wo ŋda tinŋ ɖokpedji O. ⁸ Pɔlu ɖe yiɖokui tole nyamɛ to be: " Nyɛ ŋde wa nu nyanyra ɖekpekpe ɖo Yudatɔwo ŋtsi O, alo wo tsotsixɔ, alo Kesari ŋtsi O." ⁹ Vɔ Fetusi be yadje Yudatɔwo ŋtsi, ɖoŋtsi nɛ Pɔlu be: " O djibe yayi Yerusalɛm be maɖo kodjo nɔwo ɖo nya tsɛo dji? ¹⁰ Pɔlu be: "Ŋbiɔ be mayi Kesari yo kodjoɖoxoe, le afitsi wo la ɖokodjo nuŋ le . Nyɛ ŋde wɔ nubaɖa le Yudatɔwo ŋtsi, sigbe aletsi wo ŋtɔ wo nyɛ nyui nɛnɛ. ¹¹ Gakea, nɛ ŋwɔ nubaɖaɖe alo nutsi dje nɛ ku lɔ, nyɛ ŋde gbe be maku O. Vɔ nɛ wo nyasɔɖe amɛŋtsi ŋde le texoɛ O lɔ, amɛɖekpe ŋde kpɔmɔ la leŋ de asi nɔwo O. Ŋdji be woasɔ nyatsinyɛ yi Kesari. ¹² Ke tsi Festusi kudo toxonamɛtɔwo yi kpavi lɔ, enu be : Ola ho kodjolɔ sɔyi Kesari gbɔ; olayiɖo Sezar yo ŋkumɛ. ¹³ Ŋkekeɖewo yo ŋgbodomɛ, efiɔ Agripa Kudo Berenisi wova Kesari benin yewo ava dogbenɛ Festusi. ¹⁴ Tsi wowa ŋkeke gbogboɖewo lexɔn, yi Festusi sɔ Pɔlu yo nya ɖo ŋkumɛ nɛ efiɔa to be:" Felix ŋɖatsi nusuɖe daɖo gakpamɛ le fiɛ. ¹⁵ Tsi nɔ Yerusalɛm lɔ, vɔsatɔwo yo amɛganwo kudo yudatɔwo yo amɛsshishianwo sɔnya ɖo nusutsɛ ŋtsi le gbɔnyɛ yi wo bia be maso kufia nii. ¹⁶ Ŋɖotsi nɔwo be ŋde le Romatɔwo yo sea mɛ benɛ amɛtsi wo sɔ nya ɖo ta nɔ lɔ woa so kodjo nii nɛ yi kudo nyasɔlawo la kpe ŋgo be amɛtsi ŋtsi wosɔ nya ɖo lɔ ladji laɖe yiɖekui tole nyamɛ." ¹⁷ Yi ŋtsi tsi wova fiɛɖo dua, nyɛ ŋde nɔte O; vɔ ŋkegbea ŋyi ɖe kodjoɖoxoɛ yi ŋɖegbe be woakplɔ nusua va. ¹⁸ Tsinɛ nyasɔɖeamɛŋtsitɔwo tsite lɔ, wo ŋde sɔ nya ɖe tsi ŋsusu be elabaɖa ɖoŋtsi O. ¹⁹ Wo sɔ biɔbiɔɖewo le woŋtɔ wo mawusubɔsubɔ ŋtsi yi nya tsɛ kudo Yesu ɖe tsi ku ŋtsi , yi Pɔlu kanɖedji ele agbe. ²⁰ Ŋtsaka le aletsi naso nya gtsɛ ɖo, yi ŋbiɛ be elɔn be yayi Yerusalɛm nɛ woayi ɖo kodjo lɔ lexɔn sɔso nyatsɛwo ŋtsia. ²¹ Vɔ tsinɛ Pɔlu gbe be yanɔ gakpamɛ kakavana fiɔgan Kaizaro gbɔ yiyi." ²² Agripa to nɛ Festusi be: "Ŋtsan ŋdjibe ma se nusuɛ yo nya." Festusi nu nii be:" Esɔ lɔ, olase yo egbe." ²³ Ke yo ŋkegbea, Agripa kudo Berenisi wova kudo zĩzĩ ganɖe; wo ɖoxɔamɛ sɔdja amɛganwo kudo duamɛ yo agbonuglawo. Yi le Festusi yo gbeɖeɖe nua, wo kplɔ Pɔlu va. ²⁴ Festusi to be: "Efiɔ Agripa kudo mian amɛsiamɛ tsi le fiɛ, mikpɔ nusutsɛ; tsi ŋtsi Yudatɔwo yo hasoso gbogbo ɖe va gbɔnyɛ le Yerusalɛm kudo abobo be ŋda nɔ agbe O. ²⁵ Vɔ ŋdoii djesi be ŋde wɔ nuɖe tsi dje nɛ ekuo; vɔ tsi yiŋtɔ biɔ be nya nɛ yi fiagan yoŋkumɛ lɔ, ŋwɔ tsantsan be masɔɛ ɖoɖa. ²⁶ Vɔ nyɛ ŋde ɖo ŋɖe gobi be maŋlɔ ŋɖe ɖoɖa efiɔgan O. Yi ŋtsi ŋkplɔɛ sɔva wo fiɔ Agripa tɔxɛɖe, benin nanya nutsi wola ŋlɔ sɔso nyatsɛ ŋtsi. ²⁷ Ɖoŋkpɔ be ŋde le yotexoe be nɛ woasɔ amɛ, ɖoɖa gakpamɛ nɛ wo ŋde ŋlɔ nutsiwo yi wɔ sɔ ɖoŋtsi O.