¹ Nɔnvi ŋsu kú nyɔnnuwó, mi dji bé miá nyan, Mawu yo amɛnuvévé dɔ tsi yi woa le Makedonia tsɔtsiwó mɛ. ² Le vévéséséwó yo dodokpɔ gan gamɛ lɔ, wó djidjɔkpɔkpɔ sugbɔ yí wó woamɛnnɔnyinyi, sɛn dɔmenyɔnnyɔn yo keshinɔnnu sugbɔ. ³ Ðo wó na wó ŋteŋte keŋkeŋ, wó na wú wó ŋteŋte ŋtɔtsan, ŋnyi ȡase ȡutɔ nyi. Yí so wóŋtɔ wó lɔnlɔn mɛ lɔ, ⁴ wó biɔ bé mian na yewó mɔnukpɔkpɔ, ne wó akpɔ gome le amɛkɔkɔɛwó dɔdashiɛ mɛ. ⁵ Enyi nukú nyɔn nɔn mi, ȡo wóŋtɔ wó sɔ woȡeki na axoétɔ, yi na miɔn tsan to mawu yio lɔnlɔnnu mɛ. ⁶ Ðo mi biɔ so Tito shi bé yiá woa dɔmenyui dɔ tsɛ le miá gbɔ, shigbe letsi yí tɔdji nɛnɛ. ⁷ Vɔ, shigbe letsi mi le ŋkɔ yiɔ le nushianu mɛ lɔ - le xɔse mɛ, le nyɔn mɛ, le shidjedje mɛ, le ŋkúlele ȡo nutsi mɛ, le miá lɔnlɔn nɔn mi mɛ, mi yi ŋkɔ le dɔmenyui dɔ tsɛ mɛ. ⁸ ŋde sedodo yí nyi ŋle miá nawɔ o, vɔ ma ȡo kpe miá lɔnlɔn ŋtɔŋtɔ lɔ dji, to yió dadakpɔ kúdo mɛkpɛtɛwó ŋkulele ȡo nu ŋtsi. ⁹ Le nyɔntexoé mɛ lɔ, mi nyan mian xoétɔ Yesu Kritso yió menuvévé, ashixɔxɔ tsi nɔn ŋtsi vayi, eyɔ yéȡéki woamɛnɔn ȡo miá ta, bé né to yió woamɛnɔnyinyi mɛa miá trɔzun keshinɔntɔwó. ¹⁰ Le xɔn ŋtsi lɔ, na ná mi toȡoxonyɔn ne ma sɔ kpeȡomiá ŋtsi : xoé ȡeká yí nyi tsɛ vayi lɔ, miŋde ȡui bé wó awɔ nu ȡeȡeo, vɔ mi lɔn bé wó awoɛ. ¹¹ Mi vɔɛ fifiɛ. Nɛ lɔnlɔn nyui kú djidji bé yawoɛ nɛ nɔn mɛ lɔ, miáwó tsan mi kplɔ amɛwó yi nuwoawoa yió nuwúwú shigbe letsi mi ȡo ŋteŋteɛ nɛnɛ. ¹² Ðo lɔnlɔn nyui bé ya woa dɔxɔn le, enyi nu nyuiȡe kú nutsi woa teŋ lɔn, tsi nanyi ȡo nutsi le amɛ shi lɔ dji, ŋde ȡo nutsi ŋde leshi djio. ¹³ Le nyɔntexoé mɛ lɔ, ŋde nyi bé miá tashi miáȡeki ne afɔkú, nɛ mɛkpɛtɛwó wóa kpɔ gbɔngbɔn o, vɔ miá zɔn le ȡékɛnyinyi yo sé mɛ. ¹⁴ Miá gaxoxo kpɛteɛ fifiɛtɔ lɔ, le teŋ nyi ȡoŋti nɛ wó hianhianwó. Nɛnɛ ke, wó gaxoxo kpɛteɛwó la nyi ȡoŋti ne miá hianhianwó, nɛ ȡeká nyinyi ya nanyi, ¹⁵ Shigbe letsi wó ŋluin bé : " mɛtsi nusugbɔ leshi lɔ, ŋȡe ŋde leshi kákáa; yí mɛtsi shi nuviȡé le lɔ, ŋde hian ŋȡeo. " ¹⁶ Wóa kafu Mawu tsi do lɔnlɔnu nyui Tito yo djimɛn, tsi ŋtsan ŋȡo nɔn mi lɔ. ¹⁷ Ðo elɔn mian biabia kúdo awuyaya yeye, bé ya teŋ woɛ, yí yi so yiŋtɔ yio lɔnlɔnu mɛ. ¹⁸ Yí nɔnvi ȡe kplɔɛ do, tsi tsɔtsiwó kpata káfu yió mawunyɔnkankan dɔwoawoa. ¹⁹ Sɔwú lɔ, tsɔtsiɛwó tsin, bé yia yi mɔndji kú mi, ne ya woa dɔmenyɔnnyɔn dɔ tsɛ, ne axoetɔ ŋtɔ yio ŋtikɔkɔɛ, yí ya ȡu ȡase ne mian lɔnlɔnnu nyuiɛ. ²⁰ Mi le nugbewɔ le nyɔnhɛnhɛn xomevi ȡekpikpi gbɔ, sɔkuȡo dɔmenyui nunáná tsi woawɔ mi le lɔ, le ŋtete ȡeshiaȡe mɛ. ²¹ Mi kpɔ ni nyuiȡe, bé mian woa nutsi ŋti bubu le lɔ, ŋde nyi axoétɔ ȡeka yió ŋmɛn, vɔ le agbetɔwó tsan wó ŋmɛn. ²² Yí mi sɔ nɔnvi ŋsu ȡeka sɔ kpe wó, tsi ŋtsi mi kpɔ awuyaya le, le dɔ sugbɔwó woawoa mɛ, yí yi gbele ȡeȡiɔfia zi ȡeká ke, ȡo kánȡodji tsi yi ȡo ȡó miá dji lɔ ŋtsi. ²³ Sɔkuȡo Tito yɛ ŋtsi lɔ, enyi végɔnyɛn kú hadɔwoatɔ nyɛn nɛ mi. Sɔkuȡo mian nɔnvi ŋsuwó ŋtsi lɔ, tsɔtsiɛwó dɔwó ȡéȡa nɛ Kristo yió bubu. ²⁴ Mi ȡe miá lɔnlɔn fiá wó, yí mi ȡí fia wó bé, mian nyɔn djɔ bé mian káfú mi le tsɔtsi kpɛtɛwó domɛn.