¹ Peru ca Israelita bi'nica ni cadi biaasi de ca xiixa ni ma biree chu para guni dé cabe. Acán xiiñi Carmi, xiiñi Zabdi, xiiñi Zera, de ca lizaa ni za de Judá, gucuaabe ca xiixa ni ma biree chu para guni dé cabe qué, ne XPIXUÁNANU bidxichi ne guidxi Israel. ² Josué biseenda cadxi hombre de Jericó ché ca' Hai, ni nuu gaxa de Bet Avén ni riaana neza riaza gubidxa de Betel. Laabe gudxibe laaca: "Laché ne lagundaachi guidxi ca'".Ne saqué ca hombre que biree cabe ne bindaachi cabe Hai. ³ Ora laacabe bigueta cabe ra nuu Josué, gudxi cabe laa: "Cadi guseendalu interu naca ejercitu para ché Hai. Biseenda Chupa o Chonna bixiapa si de hombre para che ca ne gucaalu ca' Hai. Cadi gúnilu' tinde interu naca ejercitu tinde, purti laacabe huaxie' cabe. ⁴ Ne zaqué gaxa de chonna bixiapa si de hombre de ejercitu qué guyé, peru ca ndi' bixooñe cabe de ca hombre xti Hai. ⁵ Purti ca hombre xti Hai biitica bia' gande ne chii nuu xoopa lú de hombre ni ridindé laga nándacabe laaca de ra puerta xti guidxi qué,ne iza' zítu de ra riindaa cabe ra ruyubi cabe guie ni risáca, ne biiti cabe laaca laga zi yete ca' uria dáni qué. Ne guidxi qué guyuu dxiibi ndaani ladxido ca' ne guenda nadxibalú xti ca' birá. ⁶ Gudi'disi ngué Josué guchéza ca lari nacú. Laabe ne ca ni nagóla xti Israel bichá cabe yu dé ique cabe, ne bisuxíbi ca' neza lú guiña xti XPIXUÁNANU, ne raque biaana cabe de ra biaazi gubidxa. ⁷ Gudidi si ngué Josué guni': "¡Ah, XPIXUÁNADU DIUXI! ¿Xiñee bidiilu que ca binni di' tidi ca' xti ladu Jordán ca pue? ¿Ñee bidiilu guiábadu lu na ca Amoreu para gunduuxe ca laadu la? ¡Pa ñanda si que nididi du xti ladu guiigu Jordán! ⁸ ¡XPIXUÁNADU! ¿Xi zanda guinie', yanna que gudíñecabe Israel ne bixooñe de neza lú ca ni cadinde né que pue? ⁹ Yanna ca Cananeu ne guira xixe ni nabani ndaani guidxilayú zunadiaga ca' de ndi'. Laacabe zuguu cabe le' laanu ne zúni cabe que ca' binni de ndaani guidxilayú gusiaanda ca' tu lá nu. Ne oraqué ¿Xi zúni lu' lii pur lá ndxo' xti lu pue?" ¹⁰ XPIXUÁNANU gúdxibe Josué, "¡Biása! ¿Xiñee nabaqui lucuá lu' layú? ¹¹ Israel ma bichee. Laacabe que ñunicabe ni bidiie xtiidxa ni naa biseenda gúni cabe. Gula'nacabe cadxi cosa ni ma biree chu. Laacabe ma gula'nacabe ne zaqueca ma bicaachi cabe xquenda ruchee cabe, ra guluu cabe ni gula'nacabe lade ca ni naca xti cabe. ¹² Pur nga, ca Israelita que ganda quiñecabe ca ni cucaa lú cabe. Ne bixooñe cabe de ca ni cucaa lú cabe, purti laca laacabe ruyúbicabe gaca dé cabe. Ziuaa nia laatu dxi laatu guni dé tú ca ni biquiiñe ñudi dé tú ne naga'chi napatu ca ní. ¹³ ¡Biása! Bisuchaahui guidxi ca' para naa ne guidxi laacabe: 'Lagusuhuaa chahui, la gusiá laca laatu para ixi'. Purti XPIXUÁNANU, DIUXI xti Israel ná: "Nuu cadxi xiixa ni biree chú para gaca dé ne nuu ru' caní ladetú, Israel, que zanda gudxii lú tu ca ni cucaa lú tu hasta que cuee tú ira xixe ca ni ma biree chu para gaca dé." ¹⁴ "Irá si gueela, naquiiñe guidxiña guira tu pur cada lizaa de ra zá tú. Ne cada lizaa ni XPIXUÁNANU cuídxi zadxiiña pur binni lidxi. Lizaa ni XPIXUÁNANU cuídxi naquiiñe guidxiña ira ca hombre, tobi pur tobi. ¹⁵ Ne záca que ni laa cuidxibe ne nápa ca ni biba'na di'; ndi' zacá guí be, laabe, ira binni lídxibe ne ira xixe ni nápabe, purti laabe ma bichee ne be ni gulaqui xtiidxa XPIXUÁNANU ne ma bichee ne be Israel." ¹⁶ Ne zaqué, Josué biása nacanda ru' ne bedanebe Israel gaxa, lizaa pur lizaa, ne gulí cabe ca lizaa ni zá de Judá. ¹⁷ Josué bedanebe ca lizaa ni zá de Judá gaxa ne gulí be lizaa xti Zera. Ne bedanebe lizaa xti Zera tobi pur tobi ne gulí cabe Zabdi. ¹⁸ Laabe bedanebe lizaa xti Zabdi, binni pur binni, ne Acán xiiñi Carmi, xiiñi Zabdi, xiiñi Zera de lizaa' xti Judá, gulí cabe laa. ¹⁹ Oraque Josué gudxibe Acán: "Xiiñe', guni' ni dxandi' neza lú XPIXUÁNANU, DIUXI xti Israel, ne gudxi LAABE xi bínilu'. Rinábani lii, gudxi naa ¿Xi bínilu'? Cadi gucaachilu gaxti de naa." ²⁰ Acán bicábi: "Dxandi dxandi pe', ma bichee nia XPIXUÁNANU, DIUXI xti Israel. Ndi nga ni bíne': ²¹ Ora biiya lade guira ca ni bidopa qué ti lari sicarú xti Babilonia, chupa gayuaa bichi'chi' de plata, ne ti trozo de oro ni nanaa mediu kilu, biua ladxe ñapa ca ní, ngue runi gucuaa ca ní. Ga'chi ca ní xaguete yú, galahui yoo de lari xtine', ne ca bichi'chi' de plata qué xaguéte'. ²² Josué biseendabe cadxi binni, ne bixooñecabe yendá cabe ra nuu yoo huiini de lari qué, ne raque nuu ca xiixa qué. Ora biiya cabe ndaani ní, bidxela cabe caní, ga'chi caní ndaani yoo huiini de lari qué ne xaguete qué nuu ca bichi'chi de plata qué. ²³ Laacabe gucuaa cabe caní galahui yoo de lari qué ne bedané cabe caní ra nuu Josué ne ra nuu interu naca guidxi Israel. Laacabe gulaqui cabe caní neza lú XPIXUÁNANU. ²⁴ Ne oraque Josué, ne interu naca Israel ne laabe, gucuaa cabe Acán xiiñi Zera, plata qué, lari qué ne trozo de oro qué, ca badu nguiiu ne ca badu dxaapa xtibe, ca xpuey be, ca ndxácu xtibe, ca xtendxu be, yoo de lari xtibe, ne guira xixe ni nápabe, ne yené cabe guira ca' ra na lade dáni ra napampa xti Acor. ²⁵ Ne oraque Josué guni': "¿Xiñee bedanelu' guenda naná luguiadu pue? XPIXUÁNANU sedanébe guenda naná luguia lu' yanadxí. "Interu naca Israel bicha guie laacabe ne bisaaqui laacabe. ²⁶ Laacabe gundisa cabe ti dáni de guie luguiabe ni nuu raqué dede yanadxí. Ne oraque ru' XPIXUÁNANU gúxa xiána ro' xti'. Ngue runi, ndi nga la ni bidii cabe raqué,dede yanadxí, lade dáni 'ra napampa xti Acor'.