¹ Gudxi SEÑOR Josué: "Cadi guidxi'bu'; cadi chuulu' naguundu. Gucuaa guiraxixe binni ridinde. Gudxi'ba guidxi Hai. Biiya', naa ma gudixhe lu nálu' xa ique xti' Hai, xpinnibe, xquídxibe ne ca layú xtibe. ² Chigunu' Hai ne xa ique xti' casica bi'nu' Jericó ne xa ique xti', xisi yanna la, laguicaa guirá' ni risaca xticabe ne guirá' ca mani' xticabe para laatu. Gula'qui ti xa le' laacabe deche guidxi ca". ³ Ne zaque biasa Josué ne yené guirá' ca hua'chu' xti' ra guidxi Hai. Raqué guli Josué gande ne chii guixhiapa hombre, hombre nadipa' ne nadxibalú, ne biseendabe laaca guireeca' lu gueela'. ⁴ Gudxibe laaca gunica': "Lagu'ya, laquixhe ti xa le' guidxi ca, neza deche ni. Cadi chéditu zitu de guidxi ca, xisi guirátu lagataná. ⁵ Naa ne guiraa ca hombre niá di', zadxiñadu guidxi ca. Ne ora guireecabe guiaaxhacabe luguiadu, zuxooñedu zitu de laacabe casi ca dxiqué. ⁶ Zare guxooñecabe zedanandacabe laadu dede ra ma chuucabe zitu de guidxi ca. Raqué zani'cabe: 'Cuxooñecabe de laadu casi ca bixooñecabe dxique'. Ngue runi zuxoñedu. ⁷ Ti ora que guireetu de ra nucachilutu que ne zutegunátu guidxi ca. Señor Diuxi xtitu zaguixhe guidxi ca lu natu. ⁸ Ora ma nutagunatu guidxi ca, la cuaqui guí ni. Zunitu guirá' ndi ora gunitu ni bidii xtiidxa Diuxi gaca'. Laguuya', naa cayabe' laatu gunitu ni." ⁹ Biseenda' Josué laacabe ne zeecabe ra chitixhecabe xa le' que, ne bicachilucabe lade Betel ne Hai, neza ra riaazi gubidxa de guidxi Hai. Xisi gusi Josué gueela que lade ca binni que. ¹⁰ Biasa Josué siado' guie' ru' ne yeguuya pa ma zuhuaa chaahui ca hua'chu' xti' que, Josué ne ca binnigola xti' Israel, ne laacabe biabacabe luguia' guidxi Hai. ¹¹ Guirá' ca hombre ridinde zine laabe que biasaca' ne bidxiñaca' guidxi que. Bidxiñacabe guidxi que ne biaanacabe bizila'dxicabe ti guia' de guidxi Hai. Yanna, nuu ti neza layú lade dani de ra nuucabe que ne ra nuu guidxi Hai. ¹² Laabe zinebe gaayu' guixhiapa hombre ne bisaanabe laaca ra naguixhecabe xa le' que, neza rindani gubidxa gaxha de guidxi Betel ne Hai. ¹³ Bizuhuaa chaahui cabe guira' ca hua'chu' xticabe que, ca ni jmá nadxibalú que biaana ca' neza guia' de guidxi que, ne xcaadxi hua'chu' que biaanaca' neza ra riaazi gubidxa de guidxi que. Biaana Josué gueela que lu ca layú nuu lade ca dani que. ¹⁴ Ora xaique xti' Hai que biiya' laabe, laa ne ca hua'chu' xti' que biasa ca' siado' guie' ru' ne bizuluca bidxi'luca guidxi Israel, gaxha de xa layu xti guiigu' Jordan. Laabe la, que nica gannadibe pa naguixhecabe ti xa le' laabe ti guiabacabe luguia' guidxi que neza deche. ¹⁵ Josué ne guidubi guidxi Israel que, bi'nisica casi ñaca ma binitica' nezalú cabe ne bixooñecabe neza desiertu que. ¹⁶ Guirá' ca ni nuu ndani guidxi que gucuáridxica' ti sa nandaca' laacabe, yenandacabe Josué ne bixalecabe de guidxi que. ¹⁷ Nin ti hombre que ñaana de ca guidxi Hai ne Betel que nizananda Israel. Bisaanacabe guidxi que ne bisanaxale cabeni ra zizabinanda cabe Israel. ¹⁸ Rabi Señor Josué: "Bizaabi lanza naazelu' lu nalu' ca neza Hai purti zusaana' Hai lu nalu'." Bizaabi Josué lanza naaze que neza ra nuu guidxi que. ¹⁹ Ca hua'chu' ni nucachilú ra naguixhecabe xa le' que, guzacabe ne bireecabe ora bi'yacabe bizabinabe neza que. Laaca bixooñeca', guyuuca' ndani guidxi que ne bitaguna cabe ni, ne nagueenda ca gula'qui' guí cabe guidxi que. ²⁰ Ca hombre de guidxi Hai bidxiiluca' ne biyadxica neza decheca'. Biiyaca' xa gu'xhu' ni caree de guidxi que ziyasa guibá' ne que ñanda nuxooñedica' gabati'. Ca hua'chu' israelita ni bixooñe ra desiertu que biguetaca' ne bidxiiluca' laacabe. ²¹ Ora Josué ne guidubi guidxi Israel bi'yaca' ca ni biaana ra xa le' que ma bitagunaca' guidxi que ne ma caree gu'xhu que, laaca biguetaca' ne bi'ti ca' ca hombre de guidxi Hai. ²² Xcaadxi hua'chu' xti' Israel, ca ni biuu ndani guidxi que, bireeca' ne bidxiiluca' laacabe. Ngue runi, ca hombre Hai biaanaca' lu ná' ca hua'chu' xti' Israel, caadxi cherica' ne xcaadxi cheri'. Guyé Israel luguia' ca hombre de guidxi Hai; guiruti nilá lu nácabe ne guiruti' nuxooñe'. ²³ Que ñutidicabe xaique xti Hai ra gunaazecabe laa ne bedanecabe laa nezalú Josué. ²⁴ Ni beda guizaaca dxi Israel biluxe biiti guirá' binni nabeza Hai que la, ra nuu ca layú gaxha de desiertu ra bixooñecabe que, ne ora guirácabe, dede ra ma que ñaana nin tobi de laacabe que ñati ne filu de espada, guidubi guidxi Israel biguetaca' Hai. Bitagunácabe guidxi que ne ca xquiibacabe. ²⁵ Guira' ca ni guti dxi que, hombre ne gunaa, bia'si chii ne chupa guixiapa guti, guidubi naca guidxi Hai. ²⁶ Que nindetedi' Josué ná', ni bizabinabe naazebe lanza que, de ra birá binduuxecabe guidxi Hai. ²⁷ Ca binni de Israel gucuaaca ca yuze si ne ca ni risaca si de guidxi que, casica bisaana Diuxi guni Josué. ²⁸ Gula'qui' guí Josué guidxi Hai ne bisaanabe laa nisi yoo laa ni ma que zaca chaahui. Guirutiru' nibeza ndaanini de yanadxí. ²⁹ Bigaandabe xaique xti' Hai lu ti yaga gunda si huadxi que. Bia' ora ma ziyaazi gubidxa, bicaa Josué laacabe guindetecabe ladi xaique que lu yaga que ne bilaabicabeni ruaa puerta ro' guidxi que. Raqué la, bi'nicabe ti nduni guié luguiani. Nduni guié que la nuuruni raqué de yanadxí. ³⁰ Raqué bi'ni Josué ti mexa' ni gusisacanebe Señor, Diuxi xti' Israel, lu Monte Ebal, ³¹ casica maca bisaana Moisés siervu xti' Diuxi guni guidxi Israel, casica maca cá ni bisaana Moises lu Ley xti' gaca': "Ti mexa' guié casi naca, ni guiruti' huabagu guiiba' lú ". Ne lú ndi bidxiibabe gu'xhu ni bisisacanebe Diuxi, ne bi'ticabe mani' bisisacanecabe laabe casi ti ofrenda de paz. ³² Ne raqué, nezalú guidubi guidxi Israel, bicaabe lu ca guié que, lacaca ni cá lu Ley xti' Moisés. ³³ Guidubi guidxi Israel, ca binigola xti', ca dxu' ne ca rulidxi binni guidxi bizuhuaaca' guiropa cue' arca que nezalú ca xaique guidxi, ne ca levita, ca ni nua' guiña ni bichaaga ná' Diuxi, ne biini' ca dxu casi ca binni guidxi que, galaa de laacabe bizuhuaacabe gaxha de Monte de Gerizim, ne xti galaa que bizuhuaa gaxha de Monte Ebal. Laacabe guluu ndaayacabe guidxi Israel, casica Moises siervu xti' Diuxi bisaana gunicabe de dxiqué. ³⁴ Gudi'disi guirá' ngue, biinda' Josué guirá' ca diidxa cá lu Ley que, ca guendanacha'hui'ne ca guendanadxaba', casica cá lu ca xqui'chi Ley que. ³⁵ Que ñaana di diidxa, de guira' ca diidxa' biseenda' Moises gaca que, que ñuunda' Josué nezalú asamblea xti' Israel que, ne ca gunaa, ca xcuidi ne ca dxu' ni nabeza ladecabe.