¹ Ora Jabín, xaique xti Hazor, binadiaga ndi la?, bisendabe ti diidxa ra nu' Jobab, xaique xti Madón, ra nú xaique xti Simrón ne ra nú xaique xti Acsaf. ² Ne laca bisendabe diidxa que ra nú ca xaique ni nú ca lu ca dani ladu guia' que, ndani Guigu Jordán ni nú ladu guete de Cineret, lú ca layú la?, ne ca dani ngola xti Dor ni nú neza ria'zi gubidxa. ³ Ne laca bisenda be diidxa que ra nú ca Caneneu cani nú neza rinda'ni ne neza ra ria'zi gubidxa, ra nú ca amorreu, ra nú ca hititas, ra nú ca ferezeu, ra nú ca jeduseu nda guidxi ra dxa dani ne ra nú ca heveu ni nú gaxha de Dani Hermón ndani guidxi Mizpa. ⁴ Guiraa xixé ca dxu xtibe biré né ca laacabe, xtale ca dxu que, casi ca ñaca ca yuxi ni nú guriá nisadó. Napa ca xtale mani ne carru. ⁵ Guiraa ca xaique di bidxagalú ca ora modo pe biana ca, ye'guiana cabe gaxha ca nisa xti Merom para ti tinde né ca Israel. ⁶ Ná' Señor rabi Josué, "Cadi guidxibu neza lú be, ti guixi bia' ora ri la? chi gudié guiraa xixé cabe Israel para guti laacabe. zuzuhua'dxi lu ca mani xti cabe ti zuga'lu ñee ca ne zuzaqui lu ca carru xti cabe." ⁷ Josué ne guiraa cani rié ri tinde que la? gueyé ca. Málasi yendá ca cá ranisa xti Merom, ne bica'lú ca ni nanala'dxi laca que. ⁸ SEÑOR la? gulaquibe cani nanala'dxi Israel que ndani ná' ca, ne bininá cabe laaca ne espada y guzabinanda cabe laaca Sidón, Msrefot Maim, ne ndani Mizpa neza rinda'ni gubidxa. Bininá cabe laaca dede que nusaana cabe guirutu nabani. ⁹ Bi'ni né Josué laacabe casi pe gudxi SEÑOR la. Guxha be ñee ca mani que ne bizaqui be ca carru que. ¹⁰ Josué bigueta ca dxii que ne gunáze be Hazor. Bi'niná be xaique xtibe né espada. (Hazor nga ni jmá bisaca de lade ca xaique que.) ¹¹ Bi'niná cabe ne espada tobi pur tobi de cani nabani ra que, ne gulé chu'be laaca ti gunidé be laaca, ne zaqué la? guiruti nibani ru. Ne laabe bizaqui be Hazor. ¹² Gunaaze Josué guiraa ca guidxi xti ca xaique di. Ne laca gunazebe guiraa ca xaique xtibe ne bininá be laaca ne espada. Binidé be laaca ne espada, casi pe modo Moisés ni runi dxiña xti SEÑOR gudxi laabe guni be. ¹³ Israel la? que nuzaqui di nin tobi de ca guidxi ni zuhua' lú ca dani di', Hazor si bizaqui cabe. Ndi si nga bicágui Josué. ¹⁴ Ca dxu de Israel que gucuá ca ne yené ca guiraa ni nú ndani ca guidxi que ne ca yuzee que. Bi'ti cabe guiraa xixé ca binni que ne espada. Nin tobi que nusana cabe ni nabani. ¹⁵ Casi pe SEÑOR gudxi Moisés guni, zaqueca la?, Moisés gudxi Josué guni, ne zaqué, bi'ni Josué. Ne laabe que nusaana be de ñuni be nin tobi de ca ni SEÑOR gudxi Moisés guni. ¹⁶ Josué gucuá de guidxi di, neza ra nú dani, guidubinaca Néguev, guiraa guidxi xti Gosén, ca guidxi guete, ra ridiidi Guigu Jordán, guidxi xti Israel ra nú dani ne ra gaxti dani. ¹⁷ Dede ra nú Dani Halac gaxha de Edom, ne ra zé cabe neza guiá casi Baal Gad lade ca dani gaxha de Líbano xaguete de Dani Hermón, gunázebe guira ca xaique xti be ne bi'ti be laaca. ¹⁸ Josué gudinde xadxi ne ca xaique que. ¹⁹ Nin tobi de ca guidxi que qué nucuezadxi di ca cá dxu xti Israel, ca heveus ni nabani ndani Gabaón si co. Israel gunaze guiraa ca xcadxi guidxi ni cadinde que. ²⁰ Ti SEÑOR nga biquiidxi ladxidó cabe ti guedacabe ne tinde né cabe Israel, ti zacá ganda Diuxi guxuxe lacabe, ne que guia' laacabe, casi pe bisiidi be Moisés. ²¹ Ra qué Josué guye ca dxii que' ne binidé be ca anaceu. Bi'ni be ndi ra nú guidxi napa dani ndani Hebrón, Debir, Anab ne guiraa guidxi xti Judá ra nú dani, ne guiraa guidxi xti Israel ra nú dani. Josué binedé laacabe ne ca xquidxi cabe. ²² Nin tobi de ca aneceu que ñana di ca ndani ca guidxi xti Israel, ndani si Gaza, Gat ne Asdod biana cabe. ²³ Zacá gunaze' Josué guiraa xixé guidxi que, casi pe SEÑOR gudxi Moisés. Josué bidii ni Israel casi ñaca bisigade be ni laaca, ne zacá laca ganda guicá cada tobi de ca ni zaa de Israel. Ne za qué bizila'dxi de ca guendaridinde que.