ALNICH'ANETIK YU'UN TE DIOSE. ¹ Ilawilik te chajp'nax xk'uxul yot'an ta jtojoltik te Jtatik Dios te bit'il la yak'botikix jbiiltik te yal-snich'anotikixe, smelelil me te yal-snich'anotike. Ja yu'un, te ma la sna'botikbatik te mach'atik ayik ta balumilale melel ma la sna'bey sbaik te Diose. ² Kermanotak te k'uxex ta jkot'ane, yal-snich'anotikix me te Diose, sok ma jna'tik te bit'il ya xk'ootik pajel-chaweje. Ya me jna'tik te k'alal ya xtal te Cristoe, jich me ya xk'ootik te bi yilel te Cristoe melel ya me jkiltik nix a te bi yilel te k'alal ya xtale. ³ Spisil te mach'atik jun yot'anik yakalik ta smaliyel te bi yilel te Cristoe, ya me sk'an te mayuk smulik jich te bit'il te Cristoe. ⁴ Spisil te mach'a ya sle te smule yak ta xk'axintesel te smantal te Diose; melel te mulile ma xch'uun spasel te beluk toj te ya yal te mantale. ⁵ Te ja'exe ana'ojik stojol te Cristo tal ta balumilal yu'un te tal yak' sba ta lajel yu'un te jmultike, sok ana'ojik te mayuk smul stukele. ⁶ Mayuk tuluk te mach'a ayix ta stojole, ya spas xan te mulile. Mayuk tuluk te mach'a yak ta spasel te mulile, ma yiloj sok ma sna'bey sba te Cristoe. ⁷ Jkal-jnich'nab te k'uxex ta jkot'ane, ma me xa awak'ik te ay mach'a ya yak'ex ta ch'ayele. Te mach'a ya spas te beluk toje, ja me toj abi, jich te bit'il toj te Cristoe. ⁸ Te mach'a ya spas te mulile ja me yu'un te pukuje, melel te pukuje stalel yat'elinoj spasel te mulil ta xjajch'ibale. Ja yu'un te la yich' ak'el na'el stojol te Snich'an te Diose, swenta yu'un ya slajinbey sk'oplal te yat'el te pukuje. ⁹ Te mach'a bejk'ajem ta stojol te Diose, ma me ya spasix te mulile, melel te Ch'ul Espíritu yu'un te Diose ayix ta stojol. Ma me stak' xan spas mulil melel bejk'ajemix ta stojol te Diose. ¹⁰ Jich me ya jna'tik a te mach'a snich'an te Diose sok te mach'a snich'an te pukuje. Te mach'a ma spas te beluk toje sok te mach'a ma k'ux ta yot'an te yermanoe ma jauk yu'un te Diose. ¹¹ Melel jai k'op to ja te la awaiyik stojol ta sneelal toe: Ja te k'ux ya jkaiybatik ta jpisiltike, ¹² ma me jichukotik te bit'il te Cain te ja amene sok te ja la smil te yijts'ine.¿Bistuuk te la smile? melel ma ba lek te yat'ele yan stukel te yijts'ine lek te yat'ele. ¹³ Ma me chamuk nax awaiyik, jkermanotak, teme ya awich'ik ilayel yu'un te mach'atik ayik ta balumilale. ¹⁴ Jna'ojtikix te lajemotik a jauk me to kuxulotikix melel k'ux ya jkaiybatik sok te kermanotaktike. Spisil te mach'a ma k'ux ya yaiy sbaike yu'un nanix ay to ta lajel abi. ¹⁵ Spisil te mach'a ya yiley te yermanoe jich me k'oem te bit'il milwale. Ya me ana'ik te mayuk tuluk te mach'a ya xmilwane mayuk me xkuxinel sbajt'el k'inal. ¹⁶ Ta swenta in to jna'ojtik te xk'uxul ot'anile, melel te Cristoe la yak' te xkuxinel ta jtojoltike. Jich me ya sk'an ya jpastik uuk te ya jkak'tik te jkuxineltik ta stojol te jkermanotaktike. ¹⁷ Teme ay mach'a ay beluk ay yu'un ta balumilale, teme ya yil te yermano te ay swokole jauk me to teme ma ya xk'uxtaye, ¿Bit'il me ya yak' ilel te ay xk'uxul yot'an Dios ta stojole? ¹⁸ Jkal-jnich'nab te k'uxex ta jkot'ane, manchuk me k'ux ya jkaiybatik ta jk'optik nax, yu'un uuk me ta smelelil ya jpastik. ¹⁹ Ja yu'un ya jna'tik te ayotik ta smelelile sok mayuk beluk ya ya'an jkot'antik ta stojol. ²⁰ Melel teme ya yalbotik ta jkot'antik te ay jmultike, te Diose ja k'ax muk' xan stukel te bit'il te jkot'antike, sok ja sna'oj spisil te beluk aye. ²¹ Jkermanotak te k'uxex ta jkot'ane, teme ma ba ya yalbotik ta jkot'antik te mayuk jmultike, jun me jkot'antik ta stojol te Dios abi. ²² Spisil te beluk ya jk'antike, ja me ya yak'botik stukel, melel ya jk'ejbeytik te mantalil yu'une sok ya jpastik te beluk ya smulan stukele. ²³ Ja in to ja te mantalil yu'un te Diose: Te yakuk jch'uunbeytik sbiil te Snich'ane te ja te Jesucristoe sok te k'ux ya jkaiybatik ta jpisiltike, jich te bit'il la yak'botikix te mantalil yu'une. ²⁴ Te mach'a ya sk'ejbey te mantalil yu'un te Diose, stalel me ay ta stojol, sok nix te Diose ay me ta stojol uuk. Jich me ya jna'tik te ay ta jtojoltik ta swenta te Espíritu te la yak'botike.