TE ESPÍRITU YU'UN TE DIOS SOK TE ESPÍRITU YU'UN TE ANTICRISTOE. ¹ Jkermanotak te k'uxex ta jkot'ane, ma me xa ach'uunik spisil te mach'atik ya yalik te yich'ojik te Espíritue. Jauk me to, tsajteyame awilik neel uuk teme janix a te Espíritu yu'un te Dios te yich'ojike o teme ma jauke, melel bayal me lotil alwanejetik te lok'ikix tel ta balumilale. ² Jich yu'un te ja'exe le' me ya ana'ik a teme janix te Espíritu yu'un te Diose: Spisil te mach'a ya yal ta jamal te Jesucristo te ja' la yich' sbak'etal te k'alal tale, ja me yu'un te Diose, ³ spisil te mach'a ya yal te ma la yich' sbak'etal te Jesuse, ma me jauk yu'un te Diose. Ja in to ja me Espíritu yu'un te anticristoe, te ja'atike awaiyojikix stojol te ya xtale, sok ta ora to le' ayix ta balumilal. ⁴ Jkal-jnich'nab te k'uxex ta jkot'ane te ja yu'unex te Diose, te ja'exe ja waiyojikix tsalaw, melel te mach'a ay ta atojolike ja mero muk' stukel yan te mach'a ay ta balumilale pek'el stukel. ⁵ Te mach'a ayik ta swenta te balumilale ja ya yalik te beluk yu'un te balumilale. Jich ya x-aiybot stojol sk'opik yu'un te mach'a pajal ayik ta swenta te balumilale. ⁶ Te jo'otike ja me snich'anotik te Diose. Spisil te mach'a ya sna'bey sba te Diose ya me x-aiybot stojol te sk'ope. Yan te mach'a ma yu'un uuk te Diose ma me ya x-aiybot stojol te sk'ope. Le' me ya jna'tik stojol a te mach'a yik'oj te Espíritu yu'un te smelelile sok te Espíritu yu'un te lo'laywaneje. ⁷ Jkermanotak te k'uxex ta jkot'ane, jich me ya jkalbeyex te k'uxuk me ya jkaiybatik ta jpisiltik, melel te xk'uxul ot'anile ya xtal ta stojol te Diose, spisil te mach'a ay xk'uxul te yot'ane ja me bejk'ajem ta stojol te Diose sok ya sna'bey sba te Diose. ⁸ Te ants-winik te ma k'ux ta yot'an te yermanoe ma sna'ojbey sba te Diose, melel te Diose ja xk'uxul ot'anil stukel. ⁹ Ja yu'un la yak' ilel te xk'uxul yot'an te Dios ta jtojoltik, te la stikun tel koel te tul Snich'an ta balumilal swenta yu'un ya xkuxinotik ta stojol te Jesuse. ¹⁰ Le' ya jna'tik stojol a te bit'il ay te xk'uxul ot'anile, te ma jo'okotik neel k'ux la jkaiytik te Diose, ja neel k'ux la yaiyotik stukel, ja yu'un te la stikun tel te tul Snich'ane, la sjelolinotik ta stojel te jmultike. ¹¹ Jkermanotak te k'uxex ta jkot'ane, te Diose k'ax k'ux la yaiyotik ta yot'an, janix me jich ya me sk'an te k'uxuk ya jkaiybatik ta jpisiltike. ¹² Mayuk tuluk mach'a yiloj te Diose. Jauk me to teme k'ux ya jkaiybatik ta jpisiltike, te Diose ay me ta jtojoltik, sok te xk'uxul yot'ane ya me stojtesotik bael. ¹³ Jich me ya jna'tik stojol te ayotik ta stojol te Diose, sok te ay ta jtojoltik uuke, melel ja yak'ojbotik te Espíritu yu'une. ¹⁴ Janix jich, jkilotik sok jkak'ojbatik ta testigo yu'un te Tatil te ja la stikun tel te tul Snich'an swenta yu'un ja koltaywanej yu'un spisil te balumilale. ¹⁵ Spisil te mach'a ya yal te ja' Jesús te snich'an te Diose, janix me jich te Diose ya me x-ain ta stojol uuk sok janix me jich uuk ya x-ain ta stojol te Diose. ¹⁶ Janix jich jna'ojtik stojol, sok jch'uunejtik te k'uxotik ta yot'an te Diose. Te Diose ja xk'uxul ot'anil, sok te mach'a ya x-ain ta xk'uxul yot'ane, ay me ta stojol te Dios abi, sok janix me jich te Diose ya me x-ain ta stojolik uuk. ¹⁷ Jich yu'un, te xk'uxul ot'anile ja me la stojtesotik ta jpisiltik, jich ay me smuk'ul jkot'antik te k'alal ya xk'ootik ta ich'el ta k'ope, melel teme jich ya xkuxinotik te bit'il te Jesuse, jich me lek ya xkuxinotik ta balumilal. ¹⁸ Mayuk me xiwel ta stojol te k'uxul ot'anile. Te banti ay te xk'uxul ot'anile ya me xch'oj lok'el spisil te xiwele, melel te xiwele ja yu'un te kastigoe. Jauk me to te mach'a ya xiwe ma me yich'oj tojtesel yu'un te xk'uxul ot'anile. ¹⁹ Te jo'otike k'ux me ya jkaiybatik ta jkot'antik melel ja neel k'ux la yaiyotik stukel te Diose. ²⁰ Teme ay mach'a jich ya yale: "K'ux ta jkot'an te Diose,'' jauk me to teme ya yiley te yermanoe, yu'unanix pas lot abi. Melel te mach'a ma k'ux ta yot'an te yermanoe, te mach'a yiloje, ma me stak' ya yal te k'ux ta yot'an te Dios te ma ba yiloj stukele. ²¹ Janix me jich, te mantalil jkich'ojtik yu'un te Diose: Te mach'a k'ux ya yaiy ta yot'an te Diose, janix me jich ya sk'an k'ux ya yaiy te yermano.