JA TEK'EL TA K'OP JKU'UNTIK TE CRISTOE. ¹ Jkal-jnich'nab, ya jts'ibuybeyex in k'op to ta swenta te ma me awaiyikix mulweje. Jauk me to teme ay mach'a la yaiy mulweje, ay me mach'a ya skolteyotik ta k'op ta stojol te Tatile, ja' te Jesucristoe, te ja toj stukele. ² Ja la stojbotikix spisil te jmultike, sok ma jauk nax ta jwentatik te jo'otike, janix me jich ta swenta te spamal te balumilale. ³ Ja ta swenta in to te ya jna'beytik sbae: Teme ya jk'ejtik te mantaliletik yu'une. ⁴ Te mach'a ya yale: ''Ya jna'bey sba te Diose'' jauk me to teme ma sk'ejoj te mantalile, yak ta spasel lot abi, ma yak ta yalel te beluk smelelile. ⁵ Jauk me to te mach'a sk'ejobey te xch'ul sk'op Dios ta smelelile, ja tul ants-winik te k'axel ayix k'uxul yot'an abi. Jich me ya jna'tik te ayotik sok te Kajwaltike. ⁶ Te mach'a ya yal te junax ayix sok te Diose, jich me ya sk'an xkuxin te bit'il Jesucristoe. ⁷ Kermanotak te k'uxex ta jkot'ane, ma me yakon ta sts'ibuybelex ach' mantalil ta atojolik, janix me te pokol mantalil te awich'ojikix ta sneelal toe. Te mantalil te namey ak'bilixe, janix me te la awaiyikix stojole. ⁸ Jauk me to, yakon me ta sts'ibuybelex yach'il mantalil, ja te smelelil ta swenta te Cristoe sok ta atojolik uuk, melel te ijk'al k'inale yakix me ta k'axel stukel, sok te sakil k'inale yakix me ta tilel stukel. ⁹ Te mach'a ya yal te ayix ta sakil k'inale jauk me to ya skontroin te yermanoe, yu'un nanix ay to ta ijk'al k'inal abi. ¹⁰ Te mach'a k'ux ta yot'an te yermanoe ay meix ta sakil k'inal, sok ma me ya xyalix ta mulil abi. ¹¹ Jauk me to te mach'a skontroinoj te yermanoe, ay me ta ijk'al k'inal sok yak ta beel ta ijk'al k'inal; ma ba ya sna' te ba ya xbeene melel makbil sit yu'un te ijk'al k'inale. ¹² La jts'ibubeyex in to, jkal-jnich'nab te k'uxex ta jkot'ane, melel pasbilatikix perdón yu'un te amulik ta swentanax te sbiil te Jesucristoe. ¹³ La jts'ibubeyex ja'ex te me'el-tatilexe, melel ja ana'ojikix te mach'a ay ta xjajch'ibale. La jts'ibubeyex ja'ex te ch'iel ants-winikexe, melel la atsalikix te beluk ma lekuke. La jts'ibubatikix ja'ex te alalexe, melel ja ana'obey sbaikix te Tatile. ¹⁴ La jts'ibubeyex ta atojolik, ja'ex te me'el-tatilexe, melel ana'ojbey sbaikix te mach'a ay ta xjajch'ibale. Ja la jts'ibubeyex ta atojolik, ja'ex te ch'iel ants-winikexe, melel ja'ex te tulanexe, sok te sk'op te Diose ay ta atojolik, melel ja atsalojikix te beluk ma lekuke. ¹⁵ Ma me k'uxuk ta awot'anik te balumilale sok te beluk ay ta balumilale. Teme ay mach'a k'ux ta yot'an te balumilale, te xk'uxul yot'an te Diose ma me ayuk ta stojol abi. ¹⁶ Melel spisil te beluk ay ta balumilale, te beluk ya smulan te bak'ete, te beluk ya smulan yilel te jsitike sok te toyol ya jkak'batik ta kuxinele, ma jauk yu'un te Jtatike, ja yu'un te balumilale. ¹⁷ Te balumilale sok te beluk ya smulan spasele, yakix me ta k'axel. Yan te mach'a ya spas te sk'anjel yot'an te Diose sbajt'el k'inal ay stukel. ¹⁸ Jkal-jnich'nab, ayotikix me slajibal k'aal. Jich te bit'il la awaiyikix stojol te ya xtal te anticristoe, sok bayal anticristoetik talikix. Jich ya jna'tik stojol te slajibalix k'aal ayotike. ¹⁹ Ja lok'ik bael ta jtojoltik, jauk me to yu'unanix ma junuk ayotik sok a. Melel te junuk ayotik soke, k'axel ayotik sok te jichuke. Jauk me to te k'alal lok'ik baele, le' la yak'ik ilel a te ma junuk ayotik soke. ²⁰ Jauk me to te ja'exe awich'ojikix te Ch'ul Espíritue sok ja na'ojikix te beluk smelelile. ²¹ La jts'ibubatik in to, ma yu'unik ma ana'ojik te smelelile, ja ana'ojikix, melel ana'ojik te mayuk lotil k'op te ya xtal ta stojol te Diose, te ja te smelelile. ²² ¿Mach'a te yak ta lote ma ba jauk te mach'a ya yal te ma jauk te Cristo te Jesuse? ja bi ja te anticristoe melel ya smuk ta yot'an te Tatil sok te Nich'anile. ²³ Spisil te mach'a ya smuk ta yot'an te Nich'anile ma ba ay ta stojol te Tatile. Yan te mach'a xch'uunej te Nich'anile, ja me ay ta stojol te Tatile. ²⁴ Te beluk awaiyojikix stojol ta sneelal toe, k'axel ainuk me ta awot'anik. Teme k'axel la awak' abaik ta stojol te beluk la awaiyikix stojol ta sneelale, jich me junax ayex sok te Nich'anile sok te Tatile. ²⁵ Jich k'axel yaloj ta jtojoltik te Jesuse: Te ay jkuxineltik ta sbajt'el k'inale. ²⁶ La jts'ibubeyex in to, ta swenta te ayuk abijilik yu'un te mayuk mach'a ya slo'layexe. ²⁷ Jauk me to te bit'il awich'ojikix te Ch'ul Espíritue, te ay ta atojolike, ma me yejt'aluk te ay mach'a ya snojp'tesatike. Melel te Ch'ul Espíritue ja me ya yak'batik ana'ik stojol spisil, smelelil me, ma me lotiluk, jich bit'il la yak'batik anopike, k'axel junax me awak' abaik ta stojol. ²⁸ Jich yu'un ta ora to, jkermanotak te k'uxex ta jkot'ane, k'axel me awak' abaik ta stojol, jich me te k'alal ya xtale jun me jkot'antik yakotik ta smaliyel a sok jich me ma jtatik k'exlal a te k'alal ya xtale. ²⁹ Teme ana'ojik te toj stukel te Jesuse, ja ana'ojik me te mach'a ya spas te beluk toje ja me bejk'ajem ta stojol te Diose.