¹ Xliajkutsayan katata xpuxkunama Josafat, puxku xalak Judá, Joram, xkgasa Acab, tsukulh puxkunaniy Samaria; wa xla puxkunalh ajkutuy kata. ² Wa xla tlawalh tuku nitlan klakatin PUCHINA, wampi nichuna la tlawakgolh xtlat chu xtsi; wa xla malakanilh talayaw xla chiwix tu xa santujnali xwan xla Baal tuku xkaxtlawin´nit xtlat. ³ Wantu xla tlawalh, wata wa tsukulh tlaway xtalakgalhin Roboam, xkawasa Nabal, wa tiku matlawilh talakgalhin Israel; ⁴ Wa Mesa, puxku xalak Moab, tiku xkamapaklhay kalhnilu. Wa xla xlimaxkit xwan puxku xalak Israel, akgtum ciento mil kalhnilu chu xmakchixit akgtum ciento mil xa skgataku kalhnilu. ⁵ Wampi akxni xninita Acab, wa puxku xalak Moab talatlawalh puxku xalak Israel. ⁶ Chuna nchu, wa puxku, Joram, makgaxtakli Samaria tima kilhtamaku xpalakata nakamatsojey putum Israel nak putalatlaw. ⁷ Wa xla malakgachannilh akgtum tamakatsinin Josafat, puxku xalak Judá, xkilhwama: “Wa puxku xalak Moab kintalatlawama. “¿Anakistalniya pal na anaw katalatlawayaw Moab?” Josafab kgalhtinalh: “ Kit nakan. Kit xtachuna la wix, wa kilakchixkuwin xtachuna mi´ lakchixkuwin kaliwxilhty, chu kinkawayus na xtachuna minkawayus kaliwxilhty.” ⁸ Chunanchu xla wá: “¿Xa niku natsukunyaw nakatalatlawayaw?” Josafaf kgalhtinalh: “Anta nak xa tiji xa kaskakni nak Edom.” ⁹ Wanchu napuxkun xalak Israel, Juda, chu Edom takgchokgonankoglh takgalspitawlakgolh akgtujun kilhtamakú, nitakgskholh chuchut xla xmaktakgalgnaninkan, nimpal xla xkawayukan, nipal wa xla amakgapitsin xtakgalhinkan. ¹⁰ Chunanchu puxku xalak Israel wá: “¿Tuku uma? “ ¿A wa katasaninit PUCHINA kgalhtutu napuxkun xpalakata nakamkamaxkiy nak xmakankan xalak Moab?” ¹¹ Wampi wa Josafat wá: “ ¿Aniti uynu chatum xmakatsinina PUCHINA, laku tlan xkgalskiw tuku kinkamakatsiniputunan, PUCHINA¿” Chatum xlakskujni puxku xalak Israel wá: “Eliseo, xkgawasa Safat unu lama, wanty xmakamawkay chuchut nak xmakan Elías.” ¹² Josafat wá: “Xtachiwin PUCHINA anta talamá.” Chuna nchu puxku xalak Israel, Josafat, chu puxku xalak Edom lakgtaktakgocha. ¹³ Eliseo wanilh puxku xalak Israel: “¿Tuku xpalakata kit kilakgtampat¿ Wa kakalakpit xmakatsininanin mintlat chu mintsí. “ Chu xla puxku xalak Israel wanilh xlá: “Ni wakawa PUCHINA katasaninit umakgolh kgalhtutu napuxkun la nakamakamastay nak xmakan Moab.” ¹⁴ Eliseo kgalhtinalh: “Chuna laku wí PUCHINA xla maktakgalhnanin, nak xlakatin kya, pala nikawa wa lilay pi akit kakniy Josafat, puxku xalak Jodá, kit nixak kgaxmatli tuku kiwanipat, nimpala xak lakukxhilhnin. ¹⁵ Wampi lanchiyu nchu kakilitani chatum tlakgna.” Chu tilalh akxni xtlakgnama arpa, wa xmakan PUCHINA tilakgmilh Eliseo. ¹⁶ Wa xla wá: WA PUCHINA noyma wan: ´Katlawatit lhuwa tapuwaxní xla chuchut nak xa kaxtum xa kaskakni tiyat,´ ¹⁷ Xpalata wa PUCHINA noyma wan: “Wixinin ni katiwkxilhtit unn, nimpala wa katiwxilhtit sen, wampi wa uma xa kaxtum tiyat nalitatsamay chuchut, wixinín nalikgotnanatit, wixinín chu mi wakaxkan chu putum mintakgalhinkan.´ ¹⁸ Wa uma lu nituwa nak xlakatin PUCHINA. WA xla na nakamaxkiy tatlajan moabitas. ¹⁹ Wixinin nakatalatlawayatit akgatunu lak tlanka kachikinin tuku laktliwakgan chu lakuan kachikinin, putum nakayatit tuku lakwan kiwi, nakgtalayatit putum tapuwaxni xla chuchut, chu nakalilaktlawatit chiwix nak tiyat niku tachanananit.” ²⁰ Chuna lichalí puntsisa, atsinu xtsankgay xkilhtamaku xla lilakgatay lilakgachixkuwin, lakmincha chuchut anta nak xa tiji Edom; wa tiyat litatsamalh chuchut. ²¹ Chu akan putum kgaxmakgolh moabitas piwa lak napuxkun xminkgonit katalatlawakgoy, wa xlakan lamamakxtumikgolh, xputumkan tiku tlan, liyankgolh xlikan´kan,wa xla´kan anta tayakgolh nak xlitakilhpastuknikan. ²² Wa xla´kan lakgawankgocha puntsisa chu chichí makgakganalh nak chuchut. Akxni moabitas ukxilhkgolh chuchut nak xlakatinkan, xtasiyuy xa spininí lan kgalhni. ²³ Xla´kan palha chuwinankgol: “¡Uma, wa kgalhni! ¡Wa napuxkun luxlikgana kalakxtlawaka, nalamaknikgolh chatunu amakgapitsin! ¡Lacchixkuwin xalak, Moab, kaw kamakgalhananaw!” ²⁴ Akxi xla´kan minkgolh nak xa tiyat Israel, Wa Israelitas laná lakawankgolh chu katalatlawaka moabitas, tiku tsaltaxtukgolh nak xlakatinkan. Wa makgtakgalhnanin xalak Israel kakstalanikgolh moabitas anta niku kitapaktay xtiyatkan, kakimaknikgoka. ²⁵ Israel masputulh lak tlanka kachikinin, chu lakgpaktsu tiyat tuku tlan xwen, chatunu lak chixkuwin limatsamakgolh chiwix tiyat niku lutlan xlanan, wa xla´kan masputukgolh chuchut la nak akgatunu tapuwaxni chu putum chu chukukgoh putum lakuan kiwi. Xman anta nak Kir Hareset makgaxtakgolh lak tlanka chiwix niku xlitawilat. Wampi wa makgtakgalhnanin tiku xlinkgoy xlitalatnakan katalatlawakgolh, kamaksputukgolh. ²⁶ Axni wa puxku Mesa xalak Moab ukxilhli piwa tatalatlaw ay xmakgatsankgama, Xla kamastokli aktujun ciento lakchixkuwin tuku liyankgolh kspadakan laku tlan namalakikgoy tiji nixwilacha puxku xalak Edom, wampi wa xla´kan nimatlanikgolh. ²⁷ Chuna xla tiyalh xa puxku xkhawasa, tiku wa xli puxkunat xliwnat xwa, timakamastalh la aktum xalhkuni lilakgatay nak patsaps. Chu titawi tlanka tasitsin xlakata Israel; chu makgtakgalhnanin Israelitas makgaxtakli puxku, Mesa chu taspitkgolh nak xtiyatkan.