¹ Giyagni pogirchi ga wa Gaman tsru niklu yegi yatkana Pguro Gistila yegi. ² Gepi gogne chininri, rutspagako pshinrona winga, pogirchi wane chinro Gistila: "Girni wa panjitanru, pguro Gistila? Ga wa peneko ¿Girni wa panjire? Ganikaji mpogirewle peneeko." ³ Giyagni wa Pguro Gistila gigita: "Ga wa pixa getanuya nukshiklu pushiniklewle, pogirchi, ga wa pugleretlu, ga wa nuwekinri neneka gita, tyenwa nanjitanru, nanjitkoxlu nopokchi chinanu. ⁴ Gi rixanu gishagkakalunenwu, gita ga wa nopokchi, nikatikolupna, ruylatkonna ga wa nikakpotutkonna. Wayegretikowakapjemka galikaka wushagkaako, saletkalune pixka jejine ga wa suxone, ga wa gita pochkepno, maleshlu tye pixkalutu kojwawakchi, ga wa gi wa wkojwakanru wa pogirchi" ⁵ Giyagni wa pogirchi Gaswero wane chinro Gistila, Pwuro: " ¿Katni wale? ¿Ginaka rukshikika wale yineru wa paji tsepotanatachri pagixanu kamrutikolupa? ⁶ Gistila wane china: "¡Wa jeji pnuko gixachri, wale wayegixjeru, wa tye mshinikanutu Gaman!" Giyagni Gamanni tsru piklu rixana pogirchi-yma ga wa pguro-yma. ⁷ Wa pogirchi, gimtuwnachri, winga ruranatyawakna tunwata tsru niklu yegi, ga wa pogirchi-pji kagwuru rutakyakna ya seyni Gaman gituka pguro Gistila giweklepa chinanu. Ga wa rumatjemamtatkalu wale psoluko kojwakjeru mugletu wale yegiko gwachrini. ⁸ Giyagni pogirchi satokatka wa pogirchi-pji kagwuru rutakyawakna wa winga rutspaganatyawakna gruko. Xani potuko tuplapijeya rujrukyanatka Gamanni Gistila gwanatyawaka. Pogirchi wane china: "¿Wale giylatanunro pguropni gita getanuya, nopjiypotuyako? Giyampotuko tye tokanchi pogirchi nama gishpakyachriye ga wa wayegrene gishyagojitatkalu Gaman. ⁹ Giyagni wa Garbona, walenwa satu solone pogire pogirchi gipxakjenatachri, china: "Yotukanruna pamyomole tsojere tennu rostunoslewatyawakapna Gaman pjistsi yotukyaluna. Wale yotuklu Martokeyo chinanupa, gi rukta yanumatanu wale yostamyoyegitanru pogirchi". "Pogirchi wane china: "Wane gixripkakaganru" ¹⁰ Giyagni wanna chikakanatkalu Gamanni ga wa rostunojitanatkaluna waleko kamrunatanru Martokeyo chinanupmaka. Giyagni wa pogirchi rujgekangamtatka.