¹ Paulo pia alikuja Derbe na Lystra; na tazama, pale palikuwepo na mwanafunzi aitwaye Timotheo, mwana wa mwanamke Myahudi ambaye ni muumini lakini baba yake alikuwa Myunani. ² Ndugu wa Listra na Ikonia walimshudia vyema. ³ Paulo alimtaka ili asafiri naye, hivyo akamchukua na kumtahiri kwa sababu ya Wayahudi waliokuwako huko kwani wote walimjua kuwa baba yake ni Myunani ⁴ Walipokuwa wanapitia kwenye miji, walikuwa wakipitisha amri ya kutii ambayo iliamuliwa na mitume na wazee huko Yerusalemu. ⁵ Hivyo makanisa yakaimarishwa katika imani na walioamini waliongezeka kwa idadi kila siku. ⁶ Paulo na mabingwa wake wakaenda Firigia na Galatia, kwani Roho Mtakatifu aliwakataza kuhubiri neno huko kwenye jimbo la Asia. ⁷ Walipokaribia Misia, walijaribu kwenda Bithinia, lakini Roho wa Yesu akawakataza. ⁸ Hivyo wakapita Misia walikuja mpaka Mji wa Troa. ⁹ Maono yalimtokea Paulo usiku, kulikuwa na mtu wa Makedonia amesimama, akimsihi na kusema "Njoo Makedonia utusaidie ". ¹⁰ Wakati Paulo alipokuwa ameona maono, mara tukatafuta kwenda Makedonia, tukihitimisha kwamba Mungu ametuita kwenda kuwahubiria injili. ¹¹ Hivyo tukaondoka kutoka Troa, tukaenda moja kwa moja Samothrake, na siku iliyofuata tukafika mji wa Neapoli. ¹² Kutoka hapo tukaenda Filipi ambao ni mji wa Makedonia, mji muhimu katika wilaya na utawala wa Kirumi na tukakaa mji huu siku kadhaa. ¹³ Siku ya Sabato, tulikwenda nje ya lango kwa njia ya mto, sehemu ambayo tulidhania kutakuwa na mahali pa kufanyia maombi. Tulikaa chini na kuongea na akinamama waliokuja pamoja. ¹⁴ Mwanamke mmoja aitwaye Lidia, muuzaji wa zambarau, kutoka katika mji wa Tiatira, mwenye kumwabudu Mungu, alitusikiliza. Bwana alimfungua moyo wake na kuweka maanani maneno yaliyosemwa na Paulo. ¹⁵ Baada ya kubatizwa, yeye na nyumba yake yote, alitusihi akisema, "ikiwa mmeniona kuwa mimi ni mwaminifu katika Bwana, basi nawasihi muingie na kukaa kwangu". Akatushawishi sana. ¹⁶ Ikawa kwamba, tulipokuwa tunaenda mahali pa kuomba, msichana mtumwa mmoja aliyekuwa na pepo ya uaguzi akakutana nasi. Aliwaletea bwana zake faida nyingi kwa kubahatisha. ¹⁷ Mwanamke huyu alimfuata Paulo pamoja na sisi, akipiga kelele na kusema, "Hawa wanaume ni watumishi wa Mungu aliye Mkuu, wanaowatangazia ninyi habari ya wokovu". ¹⁸ Alifanya hivyo kwa siku nyingi, lakini Paulo akiwa amekasirishwa na tendo hilo, aligeuka nyuma na kumwambia pepo, " Nakuamuru kwa Jina la Yesu umtoke ndani yake." Naye akatoka na kumwacha mara moja. ¹⁹ Mabwana zake walipoona ya kuwa tumaini la faida yao limeondoka, waliwakamata Paulo na Sila na kuwaburuza sokoni mbele ya wenye mamlaka. ²⁰ Walipowafikisha kwa mahakimu, walisema, "Hawa wanaume ni Wayahudi na wanasababisha ghasia kubwa katika mji wetu. ²¹ Wanatangaza desturi zisizo halali kwa Warumi kukubali au kufanya mazoezi." ²² Basi umati ukawainukia kinyume Paulo na Sila, mahakimu wakararua nguo zao na kuwavua na kuamuru wachapwe viboko ²³ Baada ya kuwachapa viboko vingi, waliwatupa gerezani na kumuamuru askari wa gereza kuwalinda vyema. ²⁴ Baada ya kupokea amri hiyo, askari wa gereza aliwatupa katika chumba cha ndani ya gereza na kuwafunga miguu yao kwenye sehemu alipowahifadhi. ²⁵ Wakati wa usiku wa manane, Paulo na Sila wakawa wakiomba na kuimba nyimbo za kumsifu Mungu, huku wafungwa wengine wakiwasikiliza, ²⁶ Ghafla kukatokea tetemeko kuu na misingi ya gereza ikatikiswa, na mara hiyo milango yote ya gereza ikafunguka, na minyororo ya wafungwa wote ikalegezwa. ²⁷ Mlinzi wa Gereza aliamka kutoka usingizini na akaona milango yote ya gereza imefunguliwa; hivyo akachukua upanga wake maana alitaka kujiua kwa sababu alifikiri wafungwa wote walikwishatoroka, ²⁸ Lakini, Paulo akapiga kelele kwa sauti kuu, akisema, "usijidhuru kwa sababu wote tuko mahali hapa". ²⁹ Mlinzi wa gereza aliomba taa ziletwe na akaingia ndani ya gereza kwa haraka, akitetemeka na kuogopa, akawaangukia Paulo na Sila, ³⁰ na kuwatoa nje ya gereza na kusema, "Waheshimiwa, nifanye nini ili nipate kuokoka?" ³¹ Nao wakamwambia, "Mwamini Bwana Yesu nawe utaokoka pamoja na nyumba yako." ³² Walinena neno la Bwana kwake, pamoja na watu wote wa nyumbani kwake, ³³ Mlinzi wa gereza aliwachukua usiku ule na kuwaosha sehemu walizoumia, yeye pamoja na watu wa nyumbani mwake wakabatizwa mara. ³⁴ Akawaleta Paulo na Sila nyumbani kwake na kuwatengea chakula. Naye akawa na furaha kuu pamoja na watu wa nyumbani mwake, kwamba alikuwa amemwamini Mungu. ³⁵ Ilipokuwa mchana, mahakimu walituma ujumbe kwa yule mlinzi wa gereza wakisema, "Waruhusu wale watu waende". ³⁶ Mlinzi wa gereza akamjulisha Paulo juu ya maneno hayo ya kuwa, "Mahakimu walituma ujumbe niwaruhusu mwondoke. Hivyo tokeni nje na mwende kwa amani." ³⁷ Lakini Paulo akawaambia, "Walitupiga hadharani, ingawa sisi ni raia Warumi bila kutuhukumu na wakatutupa gerezani; halafu sasa wanataka kututoa kwa siri? Hapana! wao wenyewe waje kututoa mahali hapa". ³⁸ Walinzi wakawajulisha mahakimu maneno haya, na waliposikia kuwa Paulo na Sila ni Warumi , waliogopa. ³⁹ Mahakimu wakaja na kuwaomba msamaha na wakawatoa nje ya gereza, wakiwauliza watoke nje ya mji wao. ⁴⁰ Kwa hiyo Paulo na Sila wakatoka nje ya gereza na wakaja nyumbani kwa Lidia. Paulo na Sila walipowaona ndugu, waliwatia moyo na kisha kuondoka katika mji huo.