¹ Nomba nkhulanda, wuzye Leza wawakanile awanthu wakwe? Chitakize chiwe wowonye. Amuno nanenye ne mu Izirayeli, uwa nkhwatwa yakwe Abrahamu, mu luko lwa kwe Benjamini. ² Leza atawakanile awanthu wakwe, wano weni wawamanya lyo watakwasilwe. Wuzye mutamanya chino amawaliko yakuvwanga ivya Eliya, vino walambilizizye Leza ukususya Izirayeli? ³ ''Mfumu, wakomile wakasesema wako, wamongolinie amasyo yako iya nzuwi. Nene nenganye nsyazile, swinya wakuvwamba uwumi wane'' ⁴ Kweni ukupilula kwakwe Leza ku kuvwanga chani kwe weliwe? ''Nayisunjila nenga awanthu imyanda amakumi munenulambali(7000) wano watasokowalizile kwe Bala.'' ⁵ Naponye, pa mphindi yoo pali wamwi wano wasyazile pa mulandu wa kusola kwa nkhumbu. ⁶ Ukuwa ndi amuno nkhumbu, chitanga chiwe muno antchito. Ukuvwanga kunji lyo inkhumbu yitanga yiwe swinya a nkhumbu. ⁷ Achani nomba? Ichinthu chino Izirayeli wavwambanga, atachizanile, kweni awasolwe wachizanile, nga awanji wonsi wawomilwe. Chili ndivino chawalikwa: ⁸ ''Leza wawapa umuzimu uwutumphe, aminso alyakuti watakalole, na makutwi alyakuti watakivwe, ukufika ilelo.'' ⁹ Apano Davide akuti, ''Lekani i tebulo lyawo liwe alikonde ni chipingo, ichakupunuzya swinya ichakuwanyosezya kwe woliwo. ¹⁰ Lekani aminso yawo yawe ni mfizi alyakuti watakalole, swinya munyonganike insizi zyawo nanthi kuleka.'' ¹¹ Apano nkhuti, ''Wuzye wapunuzile ukuti wapone?'' Chitakawe wowonye. Mu malo mwakwe, muno ukupotwa kwawo, ukupusuka kwiza ku Makandi, ukuti wawasonjelezye ku wuzuwa. ¹² Nomba ndi ukupotwa ansawo zya nsi ya pansi, swinya ndi ukusowezya kwawo ansawo zya Makandi, wuliwa wuli uwukulu ukufichilisya kwawo? ¹³ Ukuwa nomba nkhuvwanga kwakwe mwemwe mwe Makandi, swinya pano intchili ne mu positole ku Makandi, nene nkhuyitutumula mu mulimo wane. ¹⁴ Pamwi ningasonjelezya ku wuzuwa wawo wano awa muwili wane. Pamwi tungapususya wamwi mwakwe woliwo. ¹⁵ Amuno ndi ukukanwa kwawo kukupiliwula ukunyuswa ponga insi ya pansi, wuzye ukuzumilizwa kwawo kungawa wuli kweni uwumi ukufuma ku wafwe. ¹⁶ Ndi ivikomwa ivya kutalichila avitele, nu munya nye achilichonga. Ndi imisisi ayitele, ni nsambanye achilichonga. ¹⁷ Ukuwa ndi insamba zimwi zyafumako ku muti, ndi wewe, wensamba zya mu mphanga, mwamamanthilwa mwakwe zyolizyo, swinya ndi mwankhine na zyolizyo mu musisisi uwukankhale wa muti wa mungungu, ¹⁸ utakayikwezye ukulusya insamba. Kweni ndi ukuyikwezya, asa wewe wino ukakwavwilizya umusisi, kweni umusisi wuno wukakwavwilizya wewe. ¹⁹ Apano muliwati, ''Insamba zyakonthosileko alyakuti ningamamanthilwa mwenwemo.'' ²⁰ Amwelimo. Umulandu wa wunthasuwila wawo wakonthosilweko, ukuwa wewe wasimphisya umulandu wa suwilo lyako. Utakati uyikwezye mu myelenganizye, ukuwa awatina. ²¹ Amuno ndi Leza atasyile insamba izyelewuzilwe ponga, namwenye atanga awasye. ²² Lolani, fwandi, imiwombele swinya uwu lumila wakwe Leza: uwulumila wizile pa wa Yuda wano waponile, kweni uwila wakwe Leza wukwiza pakwe wewe, ndi watwalilila mu wila wakwe. Ndiwapotwa nawenye uliputulwa. ²³ Swinya nawonye, ndi watakutwalilila mu wu nthasuwila wawo, walimanthililwa mwenemo. Amuno Leza ali namaka iya kuwamanthilila swinya mwenemo. ²⁴ Amuno ndi waputuzilwe ukufuma ku chino acha chikomwa mu cha mumphanga mumiwele, swinya umwakulekana ni miwele mwamatilizilwe ku muti wa chikomwa ichizima, chingawa wuli ukulusya vyoo, ivya miwele iyiyane, yimanthililwe ukunyokela ku muti wuno yafuma kweneko? ²⁵ Amuno nthakulonda ukuti mwemwe mutakamanye, wanawitu, kwe choo icha nkhama, alyakuti mutakawe na mano mu myelenginizizye yinu: Ukuwoma kwa myenzo ukutichi kwiza pakwe Izirayeli ukufika imphendwa iyikwane iya Makandi yinjile mwenemo. ²⁶ Amo wonsi iwa Izirayeli walipusuka, ndivino chawalikwa: ''Ukufuma mu Ziyoni kuliyiza e Katula. Alifumya uwu nthamanya, Leza ukufuma kwe ²⁷ Yakobi, swinya lyoo liliwa a lilayizyo lyane na woliwo, pano ndifumya imbembu zyawo.'' ²⁸ Ukuyana na muno ilandwe zima lyatanthikwa, awalwani umulandu na mwemwe. Ukuwa ukuyana na muno ichisolwa chatanthichizilwe, awakundwe umulandu wa wakwasi awa kale. ²⁹ Amuno ivya wila nu lwito uwa kwe Leza visipiluka. ³⁰ Amuno kali mwalinji wa nthivwila kwe Leza, ukuwa nomba mwapochela uwila umuandu wa wunthivwila wawo. ³¹ Mu nzila yiliyonga, nomba awa Yuda waa wawa wanthivwila. Ichakukonkha penepo chalinji kuno ukupitila mu wila wuno walanjizizwe kwe mwemwe nawonye nomba wakupochelela uwila. ³² Amuno Leza wiyalila wonsi mu wunthivwila alyakuti angalanjizya uwila pe wonsi. ³³ Iye, uwukulu wa nsawo zya yonsi amano nu kumanya kwe Leza! kuli wuli ukunthavwambilizya kwa ma pnzyo yakwe, ni nzila zyakwe zyalusya ukuzana! ³⁴ ''Amuno weweni wamanya amelenganio yakwe Mfumu pamwi weweni angawa a nkhombe yakwe? ³⁵ Pamwi weweni wino watalichila ukupa chimwi e Leza, ukuti Leza amunyosezye?'' ³⁶ Amuno ukufuma kwe weliwe swinya ukupitila mwakwe weliwe swinya kwe weliwe kuli vyonsi ivinthu. Kwakwe weliwe kuwe uwuchindame muyayaya.