¹ Wana witu, ukukumbwa kwa mwenzo wane nu kulambilizya kwane kwe Leza akwe woliwo, kukutulwa kwawo. ² Amuno nene nkhusimichila ivya kwe woliwo kuno awakuyipa kwe Leza, kweni asakulingana ni mimanyile. ³ Amuno, ukuvilwa ukumanya u wulungamane wuno wukafuma kwe Leza, nu kuvwamba ukuti wikazye uwulungamane uwawo nu wawo, watayichefizye kuwu lungamane wakwe Leza. ⁴ Amuno Kristu akufiswa kwi sundo lya wulungamane kwe wensi wino akusuwila. ⁵ Amuno Musa akuwalika ivya wulungamane wuno wukufuma mwi sundo: ''U munthu wino akuwomba uwulungamane wama sundo aliyikala mu wulungamane wowonye.'' ⁶ Kweni uwulungamane wuno wukufuma mwi suwilo wukuti vyoo: ''Utati wati mu mwenzo wako, 'Weweni alikwela ukuya mwiyulu?' (akuli kuti, amulete Kristu pansi); ⁷ swinya utakati, 'Weweni aliyika ukuya ku kwilowelwe?''' (akuli kuti, amulete Kristu ukufuma kuwafwe). ⁸ Kweni likuti chani? ''Izwi lili papipi nawewe, mu mulomo wako na mumwenzo wako.'' Alizwi lya suwilo, lino tukuwizya. ⁹ Amuno ndi nu mulomo wako ukuzumilizya Yesu a Mfumu, nu kusuwila nu mwenzo wako kuno Leza wamukatusya ku wafwe, ulipusuka. ¹⁰ Amuno nu mwenzo wumwi akusuwila swinya ali nuwulungamane, swinya nu mulomo wumwi akazumilizya nga apusuka. ¹¹ Amuno iwaliko likuti, ''Aliwensi wino akusuwila pakwe weliwe ataliwikwa ku nsoni.'' ¹² Amuno pasi ukupusana pakasi pa wa Yuda na wa Griki. Amuno yiliyonga Imfumu a Mfumu yawonsi, swinya amukankhala kwe wonsi wano wakwita pe weliwe. ¹³ Amuno aliwensi wino akakwita pi zina lya Mfumu alipusuka. ¹⁴ Ngafwandi wangita wuli pe weliwe mwe wino watasuwizile? Ngafwandi wangasuwila wuli pe weliwe mwewino watamwivwa? Ngafwandi wangivwa wuli ukwawula e kawizya? ¹⁵ Ngafwandi wangawizya wuli, suka ndi watumwa? -- Ndivino chawalikwa, ''Awuzimachi kuwa matamba ya wawo wano wakuwizya ilandwe zima!'' ¹⁶ Kweni asawonsi wivwizile ilandwe zima. Amuno Yesaya akuti, ''Mfumu, nga weweni wasuwila chino wivwile ukufuma kwe sweswe?'' ¹⁷ Achaleka ukusuwila kukwiza ukufuma pakwivwa, nu kwivwa mwizwi lya Kristu. ¹⁸ Kweni nkhuti, ''Wuzye wativwile?'' Eta, amolimonye, ''Ichiwulumo chawo chiyile munsi yonsi, swinya amazwi yawo yayile kunsilo yansi.'' ¹⁹ Umwakonjelezya, nkhuti, ''Wuzye Izirayeli atamanyile?'' Ukutalichila Musa akuti, ''Ntali kuyoyomvya wewe kuwuzuwa pe chino asa luko. Pakusula uluko sita kwivwisya, nene ndiwavulungania ku kuvitwa.'' ²⁰ Apano Yesaya wayitutuwalisile nkhaninye pano akuti, ''Nazanilwe na wawo wano watamvwambanga nene. Nalolesile kwe wawo wano watawuzichizyanga nene.'' ²¹ Ukuwa kwe Izirayeli weni akuti, ''Uwanda wonsi uwutali nayolosizye amakasa yane ku wanthayivwila swinya chinthivwa.''