¹ Achaleka nene nkhuwakomelezya, wanawitu, mu nkhumbu zyakwe Leza, ukuti mupe imiwili yinu yiwe anzuwi ya wumi, iyitele, iyakuzumilizwa kwe Leza. Koo akuteweta ukwakwivwika. ² Mutakati muyikolanie ninsi yoo iya pansi, ukuwa mupiluke pakunyosezya ku wupya amelenganio yinu.Muchite choo ukuti mumanye chino achizima, chakuzumilizwa, swinya ukulonda kwa kufikapo kwakwe Leza. ³ Amuno nu wila wuno wapilwe kwe nene nkuti aliwensi mwakwe mwemwe: Mutati mwakwelengania ivya mwewenecho ukuwa papela nkhani ukulusya vino mungawa, ukuwa kweni, mwelenganie nipanzyo lyakuyilesya, wensi ukulingana ku chipimo cha suwilo Leza wapa mwemwe. ⁴ Amuno tuli ni vizawalo ivivule mu muwili wonga, ukuwa asa vizawalo vyonsi vili ni ntchito iyilingane. ⁵ Mwachonye, sweswe wano twe wavule swe muwili wonga mwakwe Kristu, swinya pa swenga swe vizawalo vya wenga nu muwuye. ⁶ Tuli ni vyawupe ivipusane ukuyana ku wila wuno wapilwe kwe sweswe. Ndi ichawupe cha wenga akunenela, lekani chiwombwe ukuyana ku chipimo cha suwilo lyakwe. ⁷ Ndi ichawupe cha wenga akuteweta, lekani atewete. Ndi wenga ali nichawupe chakusambilizya, mulekani asambilizye. ⁸ Ndi ichawupe cha wenga akuwomya, lekani awomye. Ndi ichawupe cha wenga a kupa, lekani achiwombe nu mwenzo wonsi. Ndi ichawupe cha wenga akutungulula, lekani chiwombwe umwa kusayila. Ndi ichawupe cha wenga akulanjizya inkhumbu, lekani chiwombwe ninsansa. ⁹ Lekani ulukundo luwe ulwasita uwukachenjezya. Muchipate chino achiwipe; lemensyani kwe chino achizima. ¹⁰ Ukukwafyania u lukundo lwa wanyina, muwe ni chitemwa wenga ku muwuye. Ukukwafyania nu muchinzi, muchndinkhane wenga nu muwuye. ¹¹ ukukwafyania ukukazana, mutakwawe awakata. Ukukwafyania nu muzimu, mukankhale. Ukukwafya i Mfumu, tewetelani weliwe. ¹² Muwe ni chimwemwe mu kuchetekela, mutekanie mu kuchula, muwe ni suwilo mwi pepo. ¹³ Gawilani ivya kulondeka ku wanthu watele wakwe Leza. Muzane inzila iziule pa kulolesya uwusunji. ¹⁴ Muwalote wawo wano wakuyimya mwemwe; mulote swinya mutakatipe. ¹⁵ Muwe ni chimwemwe na wawo wano wali ni chimwemwe; lilanji na wawo wano wakulila. ¹⁶ Muwe na melenganio yaliyonga wenga nu muwuye. Mutakelenganie mu nzila zya kuyikuzya, kweni zumilizyani awanthu awa pansi. Mutati muwe awa mano mu melengaanio yinu mwewnecho. ¹⁷ Mutakalipe nanthi wenga ichiwipe ku chiwipe. Wombani iinthu ivizima mu minso ya wanthu wonsi. ¹⁸ Ndi achakuchitika, vinonye chikupechela pe mwemwe, mwikale mu mutende na wanthu wansi. ¹⁹ Mutakanyosezye mwenga, wakundwe, ukuwa mulekele uwukali wakwe Leza. Amuno chawalikwa, ''''Ukunyosezya akwa kwe nene; Nenji ndinyosezya,' yikuti Imfumu.'' ²⁰ Ukuwa ''Ndi umulwani wako ali ni nzala, umulesye. Ndi weni ali nu lusala, mupe ichakung'wa. Amuno ndi ukuwomba choo, ulimuwunganichila amalasha ya mulilo pa mutwe wakwe. ²¹ Mutati muchimvwe ni chiwipe, ukuwa muchimvye ichiwipe ni chizima.