¹ Mumanda yayo, kwalinji iwumba likulu swinya watalinji ni chakulya ichakuti walye. Nga Yesu ayita awa sambilizi wakwe nga awanena ati, ² ''Ichilanda chandema nkhaninye kuwanthu waa amuno wikala nani amanda yawa yatatu kanonzi wasini chakulya nanthi chimwi. ³ Nga chakuti ningawawezya ukuti wanyochele kumisolo yawo nanthi kulya, wanganyuluka pakuwela muzanzila. Amuno wamwi wafumile kutali.'' ⁴ Ngawasambilizi wakwe awatolelela awati kwakwe weliwe, ''Wuzye akwinye kuno tungawuzana umukate mumphanga yalupalang'ang'a ndivino moo ukuti awanthu waa walye wikute.'' ⁵ Nga awakolowozya ati, '' Nga muli ni mikate yinga?'' Awasuka awati, ''Munenula mbali (7). ⁶ Ngawanena iwumba umwakupatichizya ati yikalani pansi. Nga asenda imikate yoyo munenula mbali asalifya, nga amontola. Awapa awasambilizi wakwe ukuti walele iwumba, avyo awasambilizi wachita wowonye. ⁷ Swinya walinji ninswi nthichi, ukufuma papo asalifya, awapatichizya awasambilizi ukuti wape awanthu. ⁸ Nga walya awikuta, awasola nimvongonyo zino zyaponanga pansi, ivitundu munenulambali ivikulu. ⁹ Kwalinji awanthu awakuyana imyanda ikumi imphindi zini (4000). Avyo awtuma ati pitanji. ¹⁰ Mwezuwazuwa akwela muwato ponga nawasambilizi wakwe, nga awaya muvipya vya kaya ka Dalamanutha. ¹¹ Apo awa Falisi awapanzanie ivya kumwelezya. Achaleka awamunena ukuti achite chimwi ichizungusyo ichakulanjizya ndi uwufumu Leza ali nawe. ¹² Achuchutika mumwenzo wakwe nkhaninye nga awanena ati, ''Wuzye ngachani chino inkhwatwa yoo yikuvwamba yimanye ichimanyikwilo? Nkhuwanena ivisinkha mwemwe ukuti, pasi chimwi ichimanyikwilo chino chilipwa kwe mwemwe kunkhulo yoo.'' ¹³ Avyo awasya afumapo aya ayinjila mu wato swinya, nga aya kumbali yinji. ^{14 15} Avyo awa awasambilizi wiwilizile ukusenda umukate watalinji nanthi kamwi akakulusya pekonga akamukate muwato. Apano awalanjilila, ati, ''Muwe aminso, nukuchenjela ku mutawa wawa Falisi nu wakwe Herodi.'' ¹⁶ Awasambilizi awapanzania wonganye, '' Umulandu muno tutasenzile umukate.'' ¹⁷ Yesu walanga amanyile kali pakwe vyoo, nga avwanga kwe woliwo ati, '' Ngachani chino mukupanzania muno musi nichakulya cha mukate? Wuzye mutani mumanye? Mutani mwiluke? Wuzye imyenzo yinu mutani muwe namano? ¹⁸ Aminsi muli nayo, wuzye mutakulola? Amakutu muli nayo wuzye musikwivwa? Wuzye mutakukumbuka? ¹⁹ Pano namontholanianga imikate yisanu pakasi piwumba lwawanthu imyanda ikumi imphindi zisano (5000), wuzye avitundu vinga vino mwasenzile'' Nga awamutolelela awati, '' Ikumi natuwili'' ²⁰ Pano namontholanianga imikate munenulambali, kuwanthu imyanda kumi imphindi zini, wuzye ivitundu vinga ivyamvongonyo ivya mukate vino mwasenzile?'' awati kwe weliwe, ''munenulambali.'' ²¹ Nga avwanga ati, '' Wuzye nanombanye muchili ukwivwichisya?'' ²² Nga awiza ku Betisayida. Avyo awanthu wakulyanye awiza nu munthu wino walinji anthonkho kwe weliwe, nga inthonkho ayilenga kwe Yesu ukuti amuleme. ²³ Yesu alema inthonkho namakasa nga awamukolelela awafuma mukaya, Nga Yesu aswila amati muminso yanthonkho, awika amakasa yakwe pe weliwe amuuzya ati, '' Wuzye ukulola chimwi?'' ²⁴ Nga alola mupela, avwanga ati, ''Nkhulola awanthu ngati amiti yino yikuzyelenguka.'' ²⁵ Nga Yesu nayoka awika amakasa yakwe pa minso yanthonkho, nga umunthu alolechesya nkhaninye, aminso yakwe ayapola, alola ivinthu vyonsi ichete. ²⁶ Yesu amunena ati yanga kumwinu nukumukomelezya ukuti, '''utize unyochele mukayaka naswinya.'' ²⁷ Yesu afuma mukaya ponga nawasambilizi awaya mukaya ka Sizeliya Filipi. Lyo wali munzila awakolowozya awasambilizi wakwe, '' Wuzye awanthu wakuti ne weni?'' ²⁸ Awamwasuka awati, '' Yohani Kabatizya. Wanji wakuti, 'Eliya', nga swinya wanji wakuti, 'we wumwi wawa nthumwi.''' ²⁹ Ngawakolowezya woliwo, '' Nga mwemwe mukuti neweni?'' Apano Peturo avwanga kwe weliwe ati, '' Wewe we Kristu.'' ³⁰ Yesu awachenjezya woliwo kusikwenza ukunena wumwi ivya kwenene. ³¹ Nga atalika ukuwasambilizya ukuti umwana wa munthu afwile ukuyimba nkhaninye, swinya wasongo wamukaya, nawazyamfumu, nawachemi nawa Kawalika wamasundo, nga wamukome, palipita amanda yatatu ali zyulupuka. ³² Achaleka awanena ichetenye. Nga Peteri asenda Yesu kumbali atalika ukumukalipila. ³³ Yesu apiliwuchila kuwasambilizi wakwe nga amukalipila Peteri ati, '' Fuma paa, we satana! Amelenganio yako ayano yatakusakamala ku vya u Leza, ukuwa wasakamala nivinthu ivy wanthu.'' ³⁴ Nga ayita iwumba ponga nawasambilizi wakwe, nga awawuzya ati, ndi wumi akisi ukwiza kwe nene wazipila ayiwilila umwenecho, asende uwuchingane wakwe, ankhonkhe. ³⁵ Ndi wensi akulond ukutula uwumi wakwe aliwulovya, swinya ndi wensi wino ukulovya uwumi wakwe muno anene swinya alilandwe zima aliwuzana. ³⁶ Wuzye umunthu angafungulachi ndiwawa ninsi yonsi ukuwa alovye uwumi wakwe? ³⁷ Patawa chimwi chino umunthu angakawunkhania nu wumi wakwe? ³⁸ Amuno wensi wino wafwila nene insoni na na mazwi yane mumphindinye yoo imbipe iykukana manya Leza, nawe Umwana wa Munthu alimufwila insoni pano wiza wiza mukuchindamikwa kwe Tata wakwe nawangelo awimichile.