¹ Ala pano vyo vyasila Yesu wapitananga mu Galileya, amuno atakasi ukupita mu Yudeya umulandu awa Yuda wavwambanga ukumukoma. ² Nomba ukuzewela kwa wa Yuda ukwa ku mapombo kwanenentchezile. ³ Achaleka awanyina wakwe awati kwe weliwe, ''Usye amasyo yaa nu kuya ku Yudeya, ukuti awasambilizi wako nawo walole imilimo yino ukuwomba. ⁴ Pasi wino akawomba chimwi munkhama ndi akulonda weliwenye amanyikwe palwenze. Ndi ukuwomba vyoo, uyilolesye wewenye kunsi yapansi.'' ⁵ Amuno nawanyinanye watasuwilanga mweweliwe. ⁶ Achaleka Yesu ati kwe woliwo, ''Imphindi yane yitani yifike, kweni imphindi yinu yiliko penye. ⁷ Insi yitanga yiwapate, kweni yiphasile nene umulandu nkhusimichizya ivyakwe kuno imilimo yakwe ayiwipe. ⁸ Mwensi yani ku kuzewela; Nene nthasinje ku kuzewela koo umulandu imphindi yane yitani yifiswe.'' ⁹ Walile pano wavwanga ivinthu vyoo kwe woliwo, ayikala mu Galileya. ¹⁰ Kweni pano awanyina wakwe wapita ku kuzewela, nga nawe apita, asa palwenze kweni munkhama. ¹¹ Awa Yuda awamuvwamba weliwe pa kuzewela nu kuti, '''Alikwinye?'' ¹² Kwalinji ukuvwanzania ukukulu mu mawumba ivya kwe weliwe. Wamwi awati, '' Wee amunthu umuzima.'' Wanji awati, '' ¹³ Awe, akusovya amawumba.'' Kweni pasi wino avwanganga pa lwenze ivya kwe weliwe watinanga awa Yuda. ¹⁴ Pano ukuzewela kwafika pakasi, Yesu wakwezile nu kwinjila mu tempeli, nga atalika ukusambilizya. ¹⁵ Ngapano awa Yuda awazunguka awati, ''Nga umunthu wee amanyile wuli ivivule? atatela asambilile.'' ¹⁶ Yesu awatolelela nu kuti, ''Ukusambilizya koo asakwane, kweni akwe wino wanthuma. ¹⁷ Ndi wensi akasi awombe ukulonda kwekwe, alimanya ivya chisambilizyo choo, ndi chikufumila kwe Leza, pamwi ndi nkhuvwanga ivya kufuma kwe nene nenga. ¹⁸ Wensi wino akuvwanga ukufuma kwe weliwe wenga akavwamba uwuchindame wakwe, kweni wensi wino akuvwamba uwuchindame we wino wamutuma, umunthunye weyo awachisinkha, swinya musi chino asachilungamane mwe weliwe. ¹⁹ Wuzye Musa atawapile isundo? Naponye pasi nanthi wumwi uwe mwe weliwe wino asunzile isundo. Nga amulandu chani mukuvwamba ukunkhoma?'' ²⁰ Iwumba alitolelela, '' Uli nimphepo imbipe. Weweni akuvwamba ukuti akukome?'' ²¹ Yesu atolelela nu kuti kwe woliwo, ''Nawomvile umulimo wonga, nga mwensi amwazunguka umulandu wa chonye. ²² Musa wawapile uwusilamo (asakulikuti awakufuma kwe Musa, kweni awakufuma kuwa tatakulu), nga pa Sabata mukalemba uwusilamo u monsi. ²³ Ndi umunthu wapochelela uwusilamo pe Sabata ukuti isundo lye Musa litakamongolwe, nga mukumfulilwa chani umulandu napozizye umunthu pe Sabata? ²⁴ Mutati mupanzye ukulingana nimilolechele, kweni mupanzye muwulungamane,'' ²⁵ Wamwi mwe woliwo ukufuma mu Yerusalemu awati, ''Wuzye asa wenye wino mukuvwamba ukumukoma? ²⁶ Lola, akuvwanga pa lwenze, nga pasi chino wakuvwanga kwe weliwe. Chitanga chiwe kuno awatunguluzi nakawuzyenye zimanyile kuno wee we Kristu, avino chingawa? ²⁷ Naponye tumanyile kuno wee wafuma. Kweni pano e Kristu akwiza, pasi wino alimanya kuno akafuma. ²⁸ Ngapano Yesu apunda mu tempeli, asambilizya ati, ''Mwensinye mumanyile nene nu kumanya kuno nkhafuma. Inthizile mwe nene nenga, kweni wino wanthuma a chisinkha, swinya mutamumanyile. ²⁹ Nene mumanyile umulandu nafuma kwe weliwe swinya wanthumile. ³⁰ Welezyanga ukuti wamuleme, kweni pasi wino wawisile ikasa pe weliwe umulandu imphindi yachilinji ukwiza. ³¹ Kweni awavule mwi wumba wasuwizile mwe weliwe, awati, ''Pano Kristu wiza, aliwomba ivimanyisyo ukulusya pe vino wee wawomba?'' ³² Awa Farisi awivwa amawumba yakutokotezya vyo ivinthu ivya Yesu, swinya wa simapepo awakulu nawa Farisi awatuma awa nsambu ukuti waleme weliwe. ³³ Ngapano Yesu ati, '' Ntchili ndi na mwemwe pa kamphindi akafupi, nga kanonzi nkhupita kwe wino wanthumile. ³⁴ Muli wamvwamba kweni , mutalinzana; kuno napita, mutalikwanisya ukuti mwize.'' ³⁵ Achaleka awa Yuda awati mwe woliwo, '' Wuzye umunthu wee alipita kwinye kuno tulivilwa ukumuzana? wuzye aliya mu kusata pakasi pa wa Griki nukuwasambilizya awa Griki? ³⁶ Nga alizwichi lyoo lino atili, '' Muliwamvwamba kweni mutalinzana; kuno nkhupita, milivilwa ukwiza?'' ³⁷ Nomba pakulechelezya, pawanda uwukulu uwakuzewela, Yesu ayimilila nu kupunda, ati, ''Ndi wensi ali nulusala, ayize kwe nene amwe. ³⁸ Wensi wino akusuwila mwa kwe nene, ndivino iwaliko likati, induzi zya minzi yawulanzi zilitanthala ukufuma muwula wakwe.'' ³⁹ Kweni avwanga choo ku vya muzimu, wawo wano wasuwila mwe weliwe walipochela; Umuzimu walinji wutani wupwe umulandu Yesu walinji atani achindamikwe. ⁴⁰ Limwi iwumba, pano livwa amazwi yaa, aliti, ''Wee nakawuzyenye amutumwa.'' ⁴¹ Awanji awati, ''Wee we Kristu.'' Kweni wamwi awati, ''Wuzye Kristu akufuma mu Galileya? ⁴² Wuzye amawaliko yatavwanga kuno Kristu aliyiza afume mu luko lwa Davidi nu kufuma mu Betelehemu, akaya kuno Davidi walinji?'' ⁴³ Ngapano kwanyamusile ukupawunkhana mwi wumba imulanda wakwe weliwe. ⁴⁴ Wamwi awa woliwo nge wamulemile, kweni pasi wino wawisile amakasa pe weliwe. ⁴⁵ Nga awansambu awanyochela kwa simapepo wakulu na wa Farisi, wano watili kwe woliwo, ''Ngachani chino mutamuleta?'' ⁴⁶ Awansambu awatolelela, ''Pasi wino watela avwange ndivyo choo.'' ⁴⁷ Ngapano awa Farisi awawatolelela, ''Wuzye namwenye wawa wipa? ⁴⁸ Wuzye pali wumwi uwa watunguluzi wasuwila mwe weliwe, pamwi wumwi uwa wa Farisi? ⁴⁹ Kweni iwumba lyoo lino litamanyile isundo, awatipwe.'' ⁵⁰ Nikodemu (wumwi uwawa Farisi, wino wizile kwe weliwe pakutalichila) ati kwe woliwo, ⁵¹ ''Wuzwe isundo lyitu likapanzya umunthu pano kutani kuwe ukwivwa ukufuma kwe weliwe nu kumanya chino akuwomba?'' ⁵² Awatolelela awati kwe weliwe, ''Wuzye nawenye ufumile mu Galileya? Vwambilizyani nukulola kuno kusi umutumwa wino akwiza ukufuma mu Galileya.'' ⁵³ Ngapano awiliwensinye wayile ku ngánda yakwe.