¹ Yesu ayile pa mwamba wa Olivi. ² Akachelochelo weni ayiza ku tempeli swinya, na wanthu wonsi awiza; Weni ayikala pansi nga asambilizya woliwo. ³ Awakawalika na wa Farisi awiza nu mwanachi wino alemizwe ali pakasi pa wuzelele. Awawika weliwe pakasi. ⁴ Ngapano awati kwe weliwe, ''Musambilizya, umwanachi wee alemwizwe pakasi pa wuzelele. ⁵ Nomba mwi sundo, Mose alamulizile sweswe ukuti tuponkhole na mawe awanthu wa musango woo; wuzye wewe ukuti chani ivya weliwe?'' ⁶ Wavwanzile choo ukuti wateye weliwe alyakuti wangazana chimwi ichakuti wape weliwe umulandu, ukuya Yesu afukama pansi nu kuwalika pansi nu lusalala lwakwe. ⁷ Pano wapitilizizye ukukolowozya weliwe na mawuzyo, weni ayimilila nukuti kwe woliwo, ''Wenga mwakwe mwemwe wino asi nu luwembu, mulekani awe wakutalichila ukusumba iliwe pakwe weliwe.'' ⁸ Swinya ayinamila pansi, nu kuwalika pansi ni lusalala lwakwe ⁹ Pano wivwa chenecho, awafuma wenga na wenga, ukutatalichila nu songo nkhani. Pakupelechela Yesu wasazyile wenga, nu mwanachi wino alinji pakasi. ¹⁰ Yesu ayimilila nu kuti ku mwanachi, ''Mwanachi, walikwinye awakukususya? Wuzye nanthi wenga akukusunda? ¹¹ Umwanachi atili, ''Nanthi wenga, Mfumu.'' Yesu atili, ''Naninye nthakukusunda. Yanga swinya utakonjelezye ukuwembuka.'' ¹² Yesu avwanzile swinya kwe woliwo, atinji, ''Nene ne wuswepe wansi ya pansi; weni wino akunkhonkha atalipita mu mfizi ukuwa aliwa nu wuswepe wa wulanzi.'' ¹³ Awa Farisi watili kwe weliwe, ''Unyamuzile uwukamboni uwako wemwenecho; uwukamboni wako asa wakusimichila.'' ¹⁴ Yesu atolelela nu kuti kwe woliwo, ''Napano inyamuzile uwukamboni uwa nemwenecho, uwukamboni wane a chisinkha. Nenji imanyile kuno nafuma swinya kuno nkhuya. ¹⁵ Mukupanzya ukuyana nu muwili; nenji nthakupanzya nanthi wenga. ¹⁶ Kweni ndi nkhupanzya, ipanzyo lyane a chisinkha umulandu nenji nthali nenga; ukuwa indi nu Tata wino watuma nene. ¹⁷ Amolimo, swinya mwi sundo lyinu chawalikwa kuno ukusimichila kwa wanthu wawili a chisinkha. ¹⁸ Nene ne weni wino nsenzile uwukamboni uwa nemwenecho, swinya e Tata wino watuma nene ali nu wukamboni uwavyakwe nene.'' ¹⁹ Awati kwe weliwe, ''Alikwinye e Tata wako?'' Yesu atolelela, ''Mwemwe mutamanya nanthi anene pamwi e Tata wane; Ndi mwemwe mwamanyile nene, nge mwamumanya ne Tatanye.'' ²⁰ Weni wavwanga yaa amazwi mu masyo ya nsawu lyo akusambizya mwi tempeli, ukuwa nanthi wenga alemile weliwe umulandu i ola lyakwe litani lifike. ²¹ Achaleka atili swinya kwe woliwo, ''Nenji nkhufuma penepo; muliwavwamba nene swinya mulifwa mu luwembu lwinu. Kuno nene nkhuya, mwemwe mutanga mwize.'' ²² Awa Yuda watili, ''Wuzye aliyikoma wenga?'' Acho fwandi weni akuti, 'Kuno nenji nkhuya mutanga mwize'?'' ²³ Yesu atili kwe woliwo, ''Mwemwe mukufuma pansi; Nenji nkhufuma kupela. Mwemwe mwe wansi yoo; Nenji asa ne wansi yoo. ²⁴ Achaleka, nenji nkhuti kwe mwemwe kuno mulifwa mu mawembu yinu. Amuno suka musuwile kuno NENJI ANENE, mwemwe mulifwa mu mawembu yinu.'' ²⁵ Achaleka awati kwe weliwe, ''Wuzye we wenu wewe?'' Yesu ati kwe woliwo, ''Chino mbanenile mwemwe ukufuma pakutalichila. ²⁶ Nenji indi ni vinthu ivivule imvwange nu kupanzya ivya mwemwe. Ukuwa, weni wino wanthuma a chisinkha; swinya ivinthu nivwa ukufuma kwe weliwe, ivinthunye vyoo nene nkhuvwanga kunsi ya pansi.'' ²⁷ Wativwichisizye kuno weni wavwanganga kwe woliwo ivya Tata. ²⁸ Yesu ati, ''Pano mwamukwezya u Mwana wa Munthu, apano mulimanya kuno NENJI ANENE, swinya kuno nsiwomba nanthi chimwi icha nemwenecho. Ndimuno Tata wasambilizya nene, nkhuvwanga ivinthunye vyoo. ²⁹ Weni wino watuma nene ali nane, swinya atansyile nenga, umulandu nenji nkhuwomba penye chino chikumusechelezya.'' ³⁰ Lyo Yesu akuvwanga ivinthunye vyoo, awavule wasuwizile mwakwe weliwe. ³¹ Yesu ati kwe wawo Awa Yuda wano wasuwizile weliwe, '''Ndi mwikala mwizwi lyane, apano muliwa awa sambilizi wane mu chisinkha; ³² swinya mulimanya ichisinkha, nga ichisinkha chiliwasupula mwemwe.'' ³³ Awatolelela weliwe, ''Sweswe swe mbeyu yakwe Abrahamu swinya tutatela tuwe swe wazya wa aliwensi; wuliwuli ungati, 'Mwemwe mulisapulwa'?'' ³⁴ Yesu atolelela woliwo, ''Awenche, awenche, nkhuwanena, aliwensi wino akuwembuka a muzya ku luwembu. ³⁵ Umuzya asikwikala mu ng'anda myayaya; umwana akakwikala mwenemo myayaya. ³⁶ Achaleka, ndi u Mwana wasapula mwemwe, muliwa awasapulwe muchisinkha. ³⁷ Nene imanyile kuno mwe mbeyu yakwe Abrahamu; mukuvwamba ukuti munkhome umulandu izwi lyane lisi na masyo mwakwe mwemwe. ³⁸ Nkhuvwanga vino mviweni nu Tata wane, swinya namwenye mukuwomba vino mwivwa ukufuma kwe tata winu.'' ³⁹ Awatolelela awati kwe weliwe, ''E Tata witu we Abrahamu.'' Yesu atili kwe woliwo, ''Ndi mwalinji mwe wana wakwe Abrahamu, nge mukuwomba imilimo yakwe Abrahamu. ⁴⁰ Kweni, nomba mukuvwamba ukuti mukome nene, u munthu wino awanenile ichisinkha nivwa ukufuma kwe Leza. Abrahamu atawomvile choo. ⁴¹ Mwemwe mukuwomba imilimo yakwe tata winu.'' Awati kwe weliwe, ''Tutakwatwa mu wuzelele; tuli nu Tata wenga: Leza.'' ⁴² Yesu ati kwe woliwo, ''Ndi Leza alinji we Tata winu, ngali mwakunda nene, amuno nene niza ukufuma kwe Leza nga indi koo; Amuno nenji nthizile mwakwe nenga, ukuwa weni wanthuma. ⁴³ Fwandi achani chino mutakwivwa amazwi yane? aAmulandu mutanga mwivwe amazwi yane. ⁴⁴ Mwewa kwe Tata winu, umuwipe, swinya mukulondesya ukuwomba ivya kukumbwa vyakwe Tata winu. Alinji we chikoma ukufuma kunthaliko swinya atanga ayimilile mu chisinkha umulandu musi nanthi achisinkha mwakwe weliwe. Pano akuvwanga uwufi, akuvwanga ukufuma ku miwele yakwe umwenecho umulanda awa wawufi swinya e tata wa wufi. ⁴⁵ Kweni, umulandu nkhuvwanga ichisinkha, mutaku suwila nene. ⁴⁶ Weweni mwakwe mwemwe ukundema nene mu luwembu? Ndi nkhuvwanga ichisinkha, achani fwani mutakunsuwila nene? ⁴⁷ Weni wino awakwe Leza akwivwa amazwi yakwe Leza; mwemwe mutakwivwa yeneyo umulandu asa mwe wakwe Leza.'' ⁴⁸ AWa Yuda awatolelela nu kuti kwe weliwe, ''Tutakulanda ichisinkha pano tukuti we mu Samariya swinya uli ni demoni?'' ⁴⁹ Yesu atolelela, ''Nenji nsinayo i demoni, ukuwa nkhuchindika Tata wane, nga mwemwe mukusamula nene. ⁵⁰ Nenji nthakuvwamba uwuchindame wane; pali wenga akuvwamba nu kupanzya. ⁵¹ Nakawuzyenye nkhuwanena, Ndi wumwi akusunga izwi lyane, weni atalitela alole imfwa.'' ⁵² Awa Yuda awati kwe weliwe, ''Nomba twamanya kuno uli ni demoni. Abrahamu na watumwa wafwa; kweni ukuti, 'Ndi wumwi akusunga izwi lyane, weni atalitele awonje imfwa.' ⁵³ Wewe asa we mukulu ukulusya e tata witu Abrahamu wino wafwa, amolimo? Awatumwa nawonye wafwa. Wuzye ukuyipanga ukuti wewe wenga we ukuwa weweni?'' ⁵⁴ Yesu atolelela, ''Ndi nkhuyichindamika nenga, uwuchindame wane awavye; a Tata wane wino akuchindamika nene -- ivya wino mukuti weni we Leza winu. ⁵⁵ Mutamumanyile, ukuwa nenji imumanyile. Ndi ningati, 'Nenji nthamumanyile,' nenji nge nalinji ngati amwemwe, wawufi. Ukwa, nenji imumanyile swinya nkhusunga izwi lyakwe. ⁵⁶ E tata winu Abrahamu alinji ni chimwemwe pa kulola uwanda wane; weni wawuweni uwanda swinya asechelela. ⁵⁷ Awa Yuda awati kwe weliwe, ''Uchili utani ufike imyaka amakumi yasano uwa songo, nga umuweni Abrahamu?'' ⁵⁸ Yesu ati kwe woliwo, Nakawuzyenye, nkhuwanena, pano Abrahamu atani, NENJI ANENE.'' ⁵⁹ Ngapanno wasewa amawe ukuti wasumbile pakwe weliwe, kweni Yesu ayifisa wenga nu kufuma mu tempeli.