¹ Pansizi pa vinthu vyoo, Yesu waya kumbali yinji iya sumbi waku Galileya, yino yitwanga swinya e sumbi waku Tiberiyasi. ² Iwumba lya wanthu ilikulu alyakonkha weliwe umulandu waweni ivilolesyo vino wawombanga kwe wano walinji awalwale. ³ Yesu akwela mulupili nga kulyanye weni wikala pansi nawa sambilizi wakwe ⁴ (Nomba ukupitililwa, amasika yawa Yuda, kwalinji mupipi.) ⁵ Pano Yesu walola mupela nga waweni iwumba ikulu likwiza kwe weliwe, weni watili kwe Filipu, '''Wuzye tungaya kwinye ukuti tukale umukate ilyakuti awanthu waa walye?'' ⁶ (Kweni Yesu wavwanga choo ukuti ayelezye Filipu, amuno weni wenganye wamanyile chino wandi achite.) ⁷ Filipu atolelela weliwe, ''Imyanda yiwili iya mphiya zino zingakala imikake zitanga zikwane ukuti alye nanthi akatichinye.'' ⁸ Wenga muwa sambilizi, Andreya, umunyina nu Simoni Peturo, atili kwe Yesu, ⁹ ''Pali umulumendo wino ali nimikate yisano ninswi ziwili, kweni vingachita chani pa wanthu awavule waa?'' ¹⁰ Yesu atili, ''Lekani awanthu wikale pansi.'' Nomba palinji umulemvwe uwuvule sana pa masyo yayonye. Nga awanthu wikala pansi, walinji imyanda amakumi yasano mu mphendwa. ¹¹ Ngapano Yesu asenda imikate nga pansizi pa kusalifya, wapile ku wano wikazile pansi. Weni achita chilichonga ninswi, monsi muno walondelanga. ¹² Pano awanthu wikuta, atili ku sambilizi, ''Muwunganike ivimonthoke vino vyasyala, ilyakuti patakawe nanthi chimwi icha kononeka.'' ¹³ Achaleka wawunganisile nukwizuzya ivitundu nivimonthoke ukufuma ku mikate yisano vino vyasyazile kwe wano walile. ¹⁴ Lelo, pano awanthu waweni ichilolesyo chino wawomvile, awati, ''Wee achisinkha we mutumwa wino wandi wize kunsi.'' ¹⁵ Pano Yesu wiluka kuno wali mupipi ukuti wize nu kumulema pamaka ukuti wamuzwike uwufumu, weni wanyochezile swinya ku lupili wenganye. ¹⁶ Pano kawa kamanguzi, awasambilizi wakwe awisika ukuya kwe sumbi. ¹⁷ Awinjila mwi wato, nu kuya ukupitilila e sumbi ku Kapenamu. Kwalinji imfizi pa mphindi yoyonye, kweni Yesu atani ayize kwe woliwo. ¹⁸ Imphepo iya maka ayiputa, ne sumbi watalisile ukalipa. ¹⁹ Pano wapita apatali amatamba amakumi yawili na masano pamwi amakumi yatatu, awalola Yesu akupita pa minzi akwiza kupipi ni wato, nga awawa ni nthete. ²⁰ kweni atili kwe woliwo, ''Anene! Mutakati mutine.'' ²¹ Ngapano awawa nukulonda kuno wangapochelela weliwe mu wato, nga paponapapo uwato wafika pamulundu kuno wayanga. ²² Uwanda wa kukonkha, iwumba lino lyimilile kumbali yinji iya sumbi lyaweni kuno kutalinji nanthi a wato linji kweni lyonga, swinya kuno Yesu atinjizile mwenemo nawa sambilizi wakwe kweni awasambilizi wakwe wapisile wonga. ²³ Ukuwa, palinji amawato yamwi yano yafumile ku Tiberiyasi kupipi na masyo yano walile imikate pansizi pakusalifya kuno i Mfumu yapile. ²⁴ Pano iwumba lyazana kuno Yesu nanthi awasambilizi wasimwenemo, awinjila mu wato nu kuya ku Kapenamu ukuvwamba Yesu. ²⁵ Watili wamuzana ku mbali yinji iya sumbi, awati kwe weliwe, ''Rabi, wuzye wiza linye koo?'' ²⁶ Yesu atolelela kwe woliwo, akunena, ''Awenche, awenche, mukuvwamba nene, asa mulandu wa vilolwa vino mwaweni, kweni mwalile imikate swinya amwikuta. ²⁷ Mutakati mwawombela ichakulya chino chikakononeka, kweni wombani umulandu wa chakulya chino chingafika ku muyayaya chino u Mwana wa Munthu alipa mwemwe, amuno Leza e baba wakwe wawika ichimanyisyo pakwe weliwe.'' ²⁸ Ngapano awati kwe weliwe, ''Wuzye tungachita chani, ilyakuti tungawomba imilimo yakwe Leza?'' ²⁹ Yesu atolelela nu kuti kwe woliwo, ''Woo awuli mulimo wakwe Leza: Kuno musuwile mwe wenga wino weni watuma.'' ³⁰ Nga awati kwe weliwe, ''Wuzye ulichita chilolwachi fwandi, ilyakuti tungakulola nu kusuwila wewe? ³¹ Awa tata witu walyanga amana mulupalang'ang'a, ndivino kwawalikwa, ''Weni wapile woliwo umukate ukufuma mwiyulu ukuti walye.'' ³² Ngapano Yesu atolelela kwe woliwo, ''Awenche, awenche, asa Musa wino wapile mwemwe umukate wa chisinkha ukufuma mwiyulu, kweni walinji we Tata wane wino akuwapa umukate wa chisinkha ukufuma mwiyulu. ³³ Amuno u mukate wakwe Leza awili wuno wukwiza pansi ukufuma mwiyulu nga wukupa uwumi pansi yapansi.'' ³⁴ Nga awati kwe weliwe, ''Mukwayi, tupani umukate wowonye penye.'' ³⁵ Yesu atili kwe woliwo, ''Nene ne mukate wa wumi; weni wino akwiza kwakwe nene ataliwa ni nzala, swinya weni wino akusuwila mwakwe nene atalitela awe ninyota. ³⁶ Kweni nene nawanena kuno amolimo mwalola nene, nga mutakusuwila. ³⁷ Aliwensi wino Tata wampha aliyiza kwe nene, swinya weni wino akwiza kwe nene nthalitela mutaye kunzi. ³⁸ Amuno nene niza ukufuma mwiyulu, asakuti ntchite ukulonda kwane, kweni ukulonda kwe weliwe wino watuma nene. ³⁹ Koo akulonda kwe wino watuma nene, kuno nthakize nthaye nanthi wenga kwe wano weni wampha nene, kweni ndiwazyulupula pa wanda wawumalilo. ⁴⁰ Amuno choo akulonda kwakwe Tata wane, kuno wensi wino akulola u Mwana nu kusuwila mwe weliwe aliwa nu wumi wamuyayaya swinya ndi zyulupula weliwe pa wanda wawumalilo.'' ⁴¹ Ngapano awa Yuda wivwile uwuwi ivya kwe weliwe umulandu watili, ''Nene ne mukate wuno wukwika ukufuma mwiyulu.'' ⁴² Awati, ''Wee asa Yesu umwana wakwe Yosefe, wino e yisi nu nyina tuwamanyile? Chawa wuli kunonomba akuti, 'Nene niza pansi ukufuma mwiyulu?'' ⁴³ Yesu atolelela nu kuti kwe woliwo, ''Muleke ukuyilizyania pakasi pakwe mwemwenye. ⁴⁴ Nanthi wonga angiza kwe nene suka e Tata wino watuma nene wanyuntha weliwe, nga ndimukatusya pa wanda wawumalilo. ⁴⁵ Chawalikwa mu watumwa, 'Aliwensi alisambilizwa ne Leza.' Aliwensi wino wivwa nu kusambilila ukufuma kwe Tata akakwiza kwe nene. ⁴⁶ Asa kuti wensi amuweni e Tata, nga ndi wino wafuma kwe Leza -- weni aweni e Tata. ⁴⁷ Achisinkha, achisinkha, weni wino akusuwila ali nu wumi wamuyayaya. ⁴⁸ Nene ne mukate wawulanzi. ⁴⁹ Watata winu walile imana mu lupalang'ang'a, nga awafwa. ⁵⁰ Woo a mukate wuno wukwiza pansi ukufuma kwiyulu, alyakuti umunthu alye chimwi icha cho nanthi kufwa. ⁵¹ Nene ne mukate wawumi wuno wika ukufuma mwiyulu. Ndi wumwi walya icha mukate woo, aliyikal muyayaya. Umukate wuno ndipa amuwili wane kuwulanzi wansi ya pansi.'' ⁵² Awa Yuda awafulwa mwe woliwo nga awatalika ukupanzinkhana, awati, ''Wuzye umunthu wee angatupa wuli umuwili wakwe tulye?'' ⁵³ Ngapano Yesu atili kwe woliwo, ''Achisinkha, achisinkha, suka mulye umuwili wa Mwana wa Munthu nu kung'wa uwazi wakwe, mutaliwa nu wumi mwakwe mwemwe mwenga. ⁵⁴ Wensinye wino akulya umuwili wane nu kung'wa uwazi wane ali wumi wamuyayaya, swinya ndimukatusya pa wanda wawumalilo. ⁵⁵ Amuno umuwili wane achakulya icha chisinkha, nu wazi wane achakung'wa icha chisinkha. ⁵⁶ Weni wino akulya umuwili wane nu kung'wa uwazi wane akawa mwakwe nene, swinya nani mwe weliwe. ⁵⁷ Ngevino e Tata wawulanzi wanthuma, swinya ndivino ndi nuwulanzi umulandu wakwe Tata, achaleka winno akulya nene, aliwa nu wulanzi umulandu wakwe nene. ⁵⁸ Woo amukate wuno wika ukufuma kwiyulu, asa muno watata walile nukufwa. Weni wuno akulya umukate woo aliwa nuwulanzi penape.'' ⁵⁹ Kweni Yesu wavwanga vyoo mu sinagogi pano wasambilizyanga mu Kapenamu. ⁶⁰ Ngapano awa sambililizi wakwe awavule wano wivwile choo awati, ''Choo achisambilizyo ichitale; wuzye weweni wino angachivwa.'' ⁶¹ Yesu, umulandu weni amanyile mwe weliwe wenga kuno awa sambilizi wakwe awayilizyaniape choo, ati kwe woliwo, ''Wuzye choo chikuwalizyania? ⁶² Ngapano chingawa wuli ndi mungalola u Mwana wa Munthu akupita kuno walinji pakutalichila? ⁶³ A Muzimu wino wukamphanjisya ukuwa nu wulanzi; umuwili wusilundulusya chimwi. Amazwi yano navwanga kwe mwemwe a Muzimu, swinya ya wulanzi. ⁶⁴ Chingatenga pali wamwi mwakwe mwemwe wano watakusuwila.'' Amuno Yesu wamanyile pa nthaliko awawenu wano watalisuwila swinya wewenu wino alimupatika. ⁶⁵ Weni atili, ''A mulandu we choo chino navwanzile kwe mwemwe kuno kusi nanthi wumwi angiza kwe nene suka chipewe kwe weliwe ne Tata. ⁶⁶ Umulandu we choo, awavule wa wasambilizi wakwe wamusamazile nanthi kpita nawe swinya. ⁶⁷ Ngapano Yesu atili kwi kumi na wawili, ''Nawenye utakulonda unsamale, vwile?'' ⁶⁸ Simoni Peturo amutolelela, ''Mfumu, wuzye tungaya kwe weni? Wewe uli na mazwi aya wulalanzi wapenape, ⁶⁹ swinya tusuwizile nu kumanya kuno we Mutele wonga wakwe Leza.'' ⁷⁰ Yesu atili kwe woliwo, ''Wuzye nthasola mwemwe, ikumi na wawili nga wonga uwe mwemwe a chiwa?'' ⁷¹ Kanonzi wavwanganga vye Yudasi umwana we Isikariyoti, amuno walinji weni, wonga mwi kumi na wawili, wino alipatika Yesu.