¹ Umulandu wachoo nene, Pauli, ne wa muvingololo we Krisitu Yesu muno mwemwe amakandi. ² Nkusachizya kuno mwati mwivwa ivya muwuwombeli wawila wakwe Leza wuno wapilwe kwe nene muno mwemwe. ³ Nkuwalika ukulingana nuku wumbulikwa kwamanyikizye kwe nene. Woo awuchisinka uwuvwame pakwe chino nawa walichizile muwufupi. ⁴ Pano mukuwazya kuvye choo, muli kwanisya ukwivwichisya ivya mukasi vya wuvwame wa muchisinka kuvye Krisitu. ⁵ Mumakwatwa yanji ichisinka choo chitamanyisilwe ku wana wawantu. Kanonzi chati chiwumbulikwa nu Muzimu kuwa positole wakwe nawa kasesema wano wawisilwe pa mbali ku mulimo woo. ⁶ Woo uwuchisinka uwuvwame wuno wamakandi awa mpyani awanji, na wanji wavyawi vya muwili, swinya waliponga mwilayizyo lye Krisitu Yesu ukupitila mwilandwe. ⁷ Amuno nizile nawa ne muwomvi wi landwe lyoo pacha wupi cha wila we Leza uwupwe kwe nene ukupitila mu kuwomba kwa maka yakwe. ⁸ Kwakwe nene-- chingatenga ne muchepe ku wantu wonsi awatele awakwe Leza-- uwila woo wapilwe, ukulumbilila kumakandi nsawu zino zitanga zivwambwe zye Krisitu, ⁹ alyakuti njize ndete wuswepe pakwe aliwensi itanthiko--- uwutundume uwuvwame mu myaka ni myaka mwe Leza, wino we lewuzile ivintu vyonsi. ¹⁰ Imitanthanizyile yoo yamanyisilwe ukupitila mu keleziya achino intunguluzi ni nsambu mu masyo ya mwiyulu wangize wamanye uwuvule-imbali imiwele ya mao yakwe Leza. ¹¹ Choo cha wonvilwe ukulingana na mutanthiko wa muyayaya wuno wa fichilisizwe mwe Kristu Yesu imfumu yitu. ¹² Amuno mwe Krisitu tulinu kujimbilizya swinya tukufika mwenemo umwakuyisuwila umulandu wi suwilo lyitu mwakwe weliwe. ¹³ Achaleka nkuwalenga mutati mulefulwe umulandu wa pechino nkutamika pakwe mwemwe, wuno awuchindami winu. ¹⁴ Pa mulandu wakwe choo nkunyongania amakokola yane kwe Tata, ¹⁵ ukufuma kwe wino imbumba yonsi ya mwiyulu na pansi vikutakwa. ¹⁶ Nkupepa ukuti awa zumilizye, ukulingana naku nsawu zya wuchindami wakwe, paku womelezwa na maka ukupitila mu Muzimu wakwe, wuno wuli mwakwe mwemwe. ¹⁷ Nkupepa kuno Kristu angikala mu mwenzo yinu ukupitila mwi suwilo, ukuti mwize musimpisye nukwikalisya mu lukundo lwakwe ¹⁸ akuli kuti mungakwanisyaukwivwa, apaliponga nawantu watele awe Leza, uwufupi chi, uwutali, ukutalimpa, swinya ukwinjila, ¹⁹ nu kumanya ulukundo lwe Kristu, luno lukuchila ichimanyisyo, ukuti muzipizile ukwizulwa ni vifiko vyonsi ivya kwe Leza. ²⁰ Lelo kwe weliwe wino akukwanisya ukuwomba ukulusya vyonsi vinotungalenga pamwi ukwelengania, ukulingana na ku maka yakwe yano ya kuwomba mwakwe sweswe, ²¹ kwakwe weliwe kuwe uwuchindami muchiwanza na mwe Kristu Yesu kwi kwatwa lyosi ichiyeye nape. Amen.