¹ Nene, achaleka, ukuwa ne wa muvingololo wa Mfumu, nkhukomechezya mwemwe muwapita ukuyanana nu wito mwe wuno mwisilwe. ² Nkhuwakomechezya muwayikala nu kuyisya ukukulu nu wuzima nu kutonthelela, nu kuwa ponga mulukundo. ³ Wombesyani ukuti musunge uwuponga wa Muzimu mukumanthilani kwa mutende. ⁴ Kuli umuwili wonga nu muzimu wonga, ndivino swinya mwisilwe mu kuchetekela konga ukwa mwito winu. ⁵ Swinya kuli iMfumu yonga, isuwilo lyonga, ukubatizya konga ⁶ swinya e Leza wonga nu Tata wa wensi, wino ali papela pa vyonsi ukupitila mu vyonsi na vyonsi, ⁷ Kwe aliwensi u wila wupilwe ukuyana ni chipimo cha chawupe chakwe Kristu. ⁸ Chili ndivino amawaliko yakuvwanga: ''Pano akwezile mupela, akolelezile awalemwe ku kulemwa, swinya apile ivyawupe ku wanthu.'' ⁹ Wuzye kukusula chani ''akwezile,'' ukufumyako kuno weni swinya ayika ukuya ku viputulwa vya pansi ivya nsi? ¹⁰ Weyo wino wika a munthu wuliwonga wino akwezile ukutali mupela mu mayulu yonsi, ukuti angakwanisya ivinthu vyonsi. ¹¹ Kristu apile ku wamwi ukuti wawe wa positole, wamwi kasesema, wamwi awavangeli, wamwi awa chemi na wasambilizya. ¹² Apile vyonsi vyoo ukuti alemeke awanthu awatele wakwe Leza ku ntchito ya mulimo, muno ukuzenga kwa muwili wakwe Kristu. ¹³ Akutwalilila ukuzenga u muwili wakwe ukufika pano wafisya vyonsi mu wuponga wi suwilo ni chimanyisyo cha Mwana wakwe Leza, swinya ukuti tuwe swe wasongo mu miwombele nga pano tufike mu chipimo cha wizule wa Kristu. ¹⁴ Kristu akutuzenga sweswe alyakuti tutatwalilile ukuwa awana wano wakusunkwa na minzi, wakusendwa ni mphepo zilizyonsi zya visambilizyo swinya nu kuteya kwa wanthu mu miwombele yawoiya wufi. ¹⁵ Mu malo mwakwe, ukuvywanga ichisinkhamu lukundo, tufwile tukule munzila zyonsi mwakwe weliwe wino a mutwe, awili we, Kristu. ¹⁶ Kristu akazenga u muwili wonsi, swinya wumanthiline nu kulemana ponga nivya kwavwilizya vonsi, ngapano imbali yiliyonsi yikuwomba ponga, choo chikupanga umuwili wukule alyakuti wuyizenge wenga uwenecho mu lukundo. ¹⁷ Achaleka, nenji nkhuvwanga swinya nkhulondesya pe choo mu Mfumu, kuno mwemwe mutakatele mwikale swinya ndivino a makandi yikala, mu myelenganio yawo ayavye. ¹⁸ Wali ni mfizi mu kwivwichisya kwawo, wafumizwe ukufuma ku wulanzi wakwe Leza umulandu wu nthamanya wuno wuli mwakwe woliwo, umulandu wa miwomyezwe ya mwenzo yawo. ¹⁹ Watali nanthi a nsoni swinya wayilemesile wenga awenecho kuvya kuyivwa mu miwili, swinya wakutwalilila ukuwomba imisango ya vilivyonsi ivinyale. ²⁰ ukuwa asa muno mwemwe mwasambilizile ivya Kristu. ²¹ Nkhwelengania ukuti mwivwa ivya kwe weliwe, swinyakuno mwemwe mwasambilizwa mwe weliwe, ndivino ichisinkha chili mwakwe Yesu. ²² Mwemwe mwasambilizwa ukuti muzule vino vyalinji vya myikalile iya kali, mumuzule u munthu wa kali. A munthu wakali wino a muwipe umulandu wa vyakulonda vyakwe iviwipe. ²³ Mwemwe mwasambilizizwe ukuti muwe mwe wapya mu muzimu wa myenzo yinu, ²⁴ swinya ukuti muzwale u munthu umupya wino walewuzilwe mu chikolania chakwe Leza--mu wulungamane wa chisinkha swinya mu wutele. ²⁵ Achaleka, fumyani uwufi, nga muleke aliwensi avwange ichisinkha nu mupalamani wakwe, umulandu swe waliwonga. ²⁶ Mufulwe kweni mutaka wembuke. Mutakaleke ilanzi lyinjile pe mifulizwe yinu. ²⁷ Mutakamupe umuwipe ulongo. ²⁸ Weyo wino wiwanga atakatele iwe swinya. Afwile awombe, ukuwomba imilimo yakulondeka na makasa yakwe, alyakuti angawa na chimwi icha kugawana na wawo wano wasi nanthi chimwi. ²⁹ Mutakaleke imivwanjile iyiwipe yifume mu mulomo winu. Womvyani amazwi yano yakwavwiizya ukuzenga awanji, ukuyana ni vyakulonda vyawo, kuno amazwi yinu yawe yakwavwilizya kwe wawo wano wakuwivwa. ³⁰ Swinya mutakape ichilanda u Muzimu Mutele wakwe Leza, amuno a mwakwe weliwe muno mwemwe mwamatilwa ukufika pa wanda wakupusukwa. ³¹ Muvitaye vyonsi ivyakuluma mu mwenzo, uwukali, ukufulwa, swinya ukutuka, ponga ni viwipe vya misango yiliyonsi. ³² Muwe mwe wawila kuwawuye, ni myinzo iyizima, ukutetelana wenga nu muwuye, ndi vino Leza mwakwe Kristu watetela mwemwe.