¹ Utakakalipile umunthu songo kwe wewe. Mu malo mwakwe, umuwomye weliwe ngati we tata. Uwomelezye awalumendo ngati awanyina wako, ² awanachi awasongo ngati wa mayo, na wakazyana ngati ankhazi, mu wuswepe wonsi. ³ Uchindike awanachi awafwilwe, awafwilwe mu chisinkha. ⁴ Ukuwa ndi umufwilwe ali nawana pamwi awizukulu, waleke woliwo pakutalichila wasambilile umuchinzi mu zyang'anda zyawo. Wasyani wayosezye awakwasi wawo, umulandu choo acha kusechelezya kwe Leza ⁵ Lelo weyo wino amufwilwe umwenecho, wino asyazile wenganye, ukuchetekela kwakwe kuli mwakwe Leza swinya akatwalila ukwiwuchizya nu kupa amapepo umusanya nu wusiku. ⁶ Lelo, umwanachi wino akakwikalila ukuzewela amufwe napano achili a mulanzi. ⁷ Usambilizye na vyonye vyoo, alyakuti atakize wawe na pakusamalila. ⁸ Ukuwa ndi wumi atakusunjililaawa luko lwakwe, sanasana kwe wawo wano awa mung'anda yakwe, weni akanile isuwilo swinya amuwipe ukuchila wa nthasuwila. ⁹ Lekani umwanachi awalikwe ngati amufwilwe wino imyaka yakwe yitandi yifike 60 (amakumi mutanda), e muka monsi wonga. ¹⁰ Afwile amanyikwe ni milimo iyizima, ndi achakuti asunjilizile awana wakwe, pamwi akapochelela awalendo, pamwi asukuzizye amatamba ya wanthu awatele wakwe Leza, pamwi ayavwilizizye awayimbe, pamwi ayipile ku milimo iyizima. ¹¹ Ukuwa awafwilwe awatichi, mukane ukuwalika woliwo pa mita ya wafwilwe. Amuno ndi wapotwa ukulesya ku vwakulonda vya muwili ukususya Kristu, wakulonda ukuti watwalwe. ¹² Mu nzila yoo wakuwa na kamphisya umulandu wakusya chino wasozile pakutalichila. ¹³ Pa mphindi yiliyonga, wakusambilila ukuwa nu wukata swinya wakupitapita mu zyang'anda. Asa wukata wenga wuno wakuwa, ukuwa wakalanda swinya ivya wupuwa swinya awawufi, ukuvwanga ivinthu vino visilondeka ukuti vivwangwe. ¹⁴ Achaleka nenji nkhulonda awanachi awatichi ukuti awatwalwe, ukuti wakwate awana, awasunjilile izya ng'anda zyawo, nga ukuti umulwani akapelwe ulongo lwa kutusamula. ¹⁵ Amuno wamwi wapiliwuchizile kwe Satana. ¹⁶ Ndi wumi umwanachi umusuwile ali na wafwilwe, mulekani awavwilizye, alyakuti ichiwanza chitakapyoke, alyakuti chavwilizye awafwilwe awenecho. ¹⁷ Lekani awasongo wano wakutungulula ichete wawe awayane umuchinzi kawiri, sansana wawo wano wakuwomba nizwi swinya mu kusambilizya. ¹⁸ Amuno amawaliko yakuti, ''Utanga uvwimbe kumulomo inkhambaku yino yikwavwilizya ukusinza'' swinya ''Umuwomvi ayanine amilipilo yakwe.'' ¹⁹ Mutakapochelele umulandu ukususya e songo penga ndi pali awa kamboni wawili pamwi watatu. ²⁰ Uyololosye awawembuke paminso ya wonsi alyakuti awanji wawe ni nthete. ²¹ Nenji umwakuyisya nkhulamulila wewe, paminso yakwe Leza nu Kristu Yesu na wangelo awasolwe, ukuti usunge amalamulo yaa nanthi kuwikila kunsizi awakundwe witu, swinya utakawombe nanthi chimwi umwa kutemwela wamwi. ²² Utakalambalike amakasa zuwazuwa pakwe nanthi wumwi. Utakankhane amawembuko ya winji umunthu. Usunjilile uwuswepe wako wemwenecho. ²³ Utakati wakung'wa aminzi yeka mphela. Mu malo mwakwe, wakung'wa utupala katichi muno mu uwula ni zyandwala zyako izya pipipipi. ²⁴ Amawembuko ya wanthu wamwi yakamanyikwa pa lwenze, swinya yakuwatungululula ukuya kuwupinguzi. Lelo amawembuko yamwi yakakonkha pisinda. ²⁵ Achilichonga, imilimo yimwi iyizima yakamanyikwa pa lwenze, ukuwa yamwinye yatanga yafisame.