¹ Lekani wonsi wano wali mu wuzya walole awa bwana wawo ngati wayanine umuchinzi wonsi. Awawombe choo alyakuniti ilyita lyakwe Leza swinya ichisambilizyo chitakasamulwe. ² Awazya wano wakusuwila awa bwana wawo watakasamule woliwo umulandu a wanyina. Mu malo mwakwe, wawatewetele umwa konjelezya. Amuno awa bwana wano wakakwavwilizwa ni milimo yawo awasuwile swinya awakundwa. Usambilizye nu kwikazya ivinthu vyoo. ³ Ndi wumwi ukusambilizya ichisambilizyo cha wufi swinya atakwivwana ni visambilizyo ivizima ivyaku Mfumu Yesu Kristu swinya ni visambilizyo vya wuleza, ⁴ weni akuyitunthumula swinya atakwivwichisya nanthi chimwi. Ali nivya kulondesya iviwipe mu vyakususyania swiya ukupazinkhana ivya mazwi vino vikuleta uwuzuwa, ulombwa, ukutuka, sita kusuwilana, ⁵ nu kulya kwa penye pakasi pa wanthu wano imyenzo yawo ayiwipe. Awasovizye ichisinkha swinya wakwelengania ukuti uwuleza awakuzanila imphiya izivule. ⁶ Lelo uwuleza uwakwikuta awuzima nkhani, ⁷ amuno tutaleta nanthi chimwi munsi ya pansi, swinya tutanga tusende nanthi chimwi ukufuma mwenemo. ⁸ Mu malo mwakwe, zanji twikute ni chakulya swinya ivizwalo. ⁹ Lelo wawo wano wakulonda wawe wachinondo wakuponela mu vyelezyo, mu vipingo. Awakuponela mu vyawupuwaswinya ivyakulonda iviwipe, swinya mu vilivyonsi ivinji vino vikapanga awanthu winjile mu chononeko. ¹⁰ Amuno ulukundo lwa mphiya awuli a musisi wa yonsi imisango ya viwipe. Wamwiawanthu wano wakulondesya zyenezyo wasovyilwe ukufuma kwi suwilo swinya wachisile awenecho ni chilanda ichikulu. ¹¹ UKuwa wewe, munthu wakwe Leza, samala ukufuma ku vinthu vyoo. Usamazye uwulungamane, uwuleza, uwusuwilwa, ulukundo, ukujimba, nu wuzima. ¹² Ulwe uwulwe uwuzima wi suwilo. Lemansya uwumi wasita kumala kwe wuno twapundwa, swinya ivya wuno mwapile ukuzumilizya ukuzima paminso pa wakamboni awavule. ¹³ Nenji nkhukupa ipatichizyo wewe paminso yakwe Leza, wino akupa uwumi ku vinthu vyonsi, na paminso pakwe Kristu Yesu, wino apanzile ukuzumilizya ukuzima paminso ya Pontyasi Pilate, ¹⁴ ukuti asunge ipingulo nanthi akanyale pamwi akamphisya ukufika pano Imfumu yitu Yesu Kristu yililoleka. ¹⁵ Leza aliwumbula ukuloleka kwa Kristu pa mphindi iyilungame--Leza, umulotwe swinya wenganye e Kayiwele, Imfumu wuno ukulamula swinya i Mfumu yino yikutungulula. ¹⁶ Wenganye ali nu wuntalifwa swinya akakwikala pa wuswepe wutakapalamile. Pasi nu munthu wino akulola weliwe pamwi angalolechesya weliwe. Kwe weliwe kuwe umuchinzi na maka yamuyayaya. Ameni. ¹⁷ Wanene awa chinondo wansi ya pansi ukuti watakawe wakuyitutumula swinya watakachetekele mu chuma, chino chitanga chisuwilwe. Mu malo mwakwe, wachetekele mwakwe Leza. Akupa sweswe ichuma chonsi chakusimichila ukuti tuzewele. ¹⁸ Wenene ukuti wawombe ichizima, ukutu wawe ni chuma mu milimo iyizima, swinya wawe nu kupa swinya ukuyipa pa kupa. ¹⁹ Munzila yoo waliyusunjila awenecho ulufula uluzima kwakwe chino chili nukwiza, alyakuti walilemansya pa wumi uwenecho. ²⁰ Timoti, uchinjilile chino nkhupile wewe. Uleke ivya kuvwanga vya wupuwa swinya ukususyania wachino chikwitwa umwa wufi ukuti chimanyisyo. ²¹ Awanthu wamwi wakuwizya vyoo ivinthu ngapano wawinda isuwilo. Uwila wuwe na wewe.