¹ Lelo u Muzimu wukuvwanga pa lwenze ukuti mu mphindi zaku nkholelo awanthu wamwi walitaya isuwilo nu kwivwila ku muzimu ya wufi ni visambilizyo vya ma demoni ² ukuwawipa mu miwombele, swinya imyelenganio yawo yochizwe. ³ Awalilesya awanthu ukuti watakasende pamwi ukusendwa swinya ukuwalondela ukuti waleke ukulya vimwi ivyakulya vino Leza walewuzile ukuti vipochelezwe nu kusalifya na wawo wano wakusuwila swinya wamanya ichisinkha. ⁴ Amuno chilichonsi chino chalewulwa nu Leza a chizima. Nanthi chimwi chino tukulya nu kusalifya chingakanizwa. ⁵ Amuno chipatuluzilwe nizwi lyakwe Leza ni pepo. ⁶ Ndi ukuwika vyoo ivinthu paminso ya wanyina, uliwa we muwomvi umuzima uwa Yesu Kristu. Amuno ukuliswa na mazwi yi suwilo swinya ni chisambilizyo ichizima chino wakonsile. ⁷ Ukuwa kanani amalyasi yansi ya pansi yano awanachi awakote watemwa. Mu malo mwakwe, uyisambilizye we mwenecho mu wuleza. ⁸ Amuno ivisambilizyo vya kuyolola umuwili avyakulondeka katichi, kweni uwuleza awakulondeka pa vinthu vyosi. Wukulemelezya ilayano ku wulanzi woo nu wulanzi wuno wukwiza. ⁹ Ilandwe lyoo alisuwilwa swinya lyenelizwe ukuzumilwa kwakufikapo. ¹⁰ Amuno akwe choo kuno tukulwa nu kulemansya ukuwomba. Amuno tukuchetekela e Leza umulanzi, wino a Mutuli wa wanthu wonsi, ukuwa sana sana ku wasuwilwa. ¹¹ Wizyani swinya musambilizye ivinthu vyoo. ¹² Patakawe nanthi wumwi uwakukwelengula uwutichi wako. Mu malo mwakwe, kwe wawo wano wakusuwila, uwe chakusambililapo mu kavwanjile, michitile, ulukundo, ukusuwilwa, nu wuswepe. ¹³ Ukufika pano niza, uwombe ivya kuwelenga, ku miwomelezyo, na kuvisambilizyo. ¹⁴ Utakati uchilekelezye ichawupe chino chili mwakwe wewe, chino chapilwe kwe wewe ukupitila mu kusesema, ponga nu kulmbalika kwa makasa ya wa songo. ¹⁵ Usunjilile ivinthu vyoo. uwe muvyenevyo, alyakuti ukufikapo kwako kungaloleka mu wanthu wonsi. ¹⁶ Uwe minso pakuyilolela wemwenecho na ku chisambilizyo. Utwalilile mu vinthu vyoo. Amuno pakuwomba wowonye, uli yitula wenga na wawo wano wakwivya kwe wewe.