¹ Nomba ukuyana ni vya milandu yino mwawalisile: ''Achizima ukuti umonsi atakapalamansye umwanachi.'' ² Ukuwa pa mulandu wa myelezyo muno imilimo iyiwipe iyivule, umonsi wensi awe nu muchi wakwe wenga, swinya umwanachi wensi awe nu mulume wakwe wenga. ³ U monsi afwile ape ku muchi chino amutwalila nu muchinye afwile ape u mulume chilichonga. ⁴ Asa mwanachi wino ali na maka pa muwili wakwe umwenecho, kweni u mulume a wino. Achilichonganye, u mulume atawa na maka pa muwili wakwe umwenecho, kweni u muchi a wino. ⁵ Mutakati mwakanizyana, ukufumyako ndi mwivwana swinya muno imphindi zimwi. Muwombe choo alyakuti muyipe mweka ku mapepo. Ngapano mwize muwe ponga swinya, alyakuti e satana atakelezye mwemwe umulandu musi nanthi akuyelesya. ⁶ Ukuwa nkhuvyanga ivinthu vyoo kwemwe ndivino ukwivwana swinya asa kulamula. ⁷ Nkhulondesya ukuti wensi angawa ndivino nene indi. Lelo aliwensi mwakwe mwemwe ali ni chawila chakwe umwenecho ukufuma kwe Leza. Wonga ali nu musango woo uwa cha wila, nu muwuye umusango wowoo. ⁸ Kwe wano watatwalwa na wafwilwe nenji nkhuti achizima kwe woliwo ndi wangikala nanthi kutwalwa, ndivino nene indi. ⁹ Ukuwa ndi watanga wayilesye, wafwile watwalwe. Amuno chilichete kwe woliwo ukuti watwalwe ukulusya ukuti wachule ni vyakulonda mu miwili yawo. ¹⁰ Lelo kwe wano wali pa nthwalwa nkhupa ipingulo lyoo--asa nene, kweni Imfumu--u mwanachi atakalekane nu mulume ¹¹ (ukuwa ndi ayifumya ku mulume, ayikale nanthi kutwalwa pamwi iyinji inzila anyochele ku mulume), swinya u monsi atakatele amazye inthwalwa nu muchi. ¹² Ukuwa kwe wano wasyala nenji nkhuti--nene, asa Mfumu awe--ukuti ndi u munyina witu ali nu muchi wino we nthasuwila, swinya ndi u muchinye weyo asi ni nthazi na weliwe, u mulume atakati amuleke umuchi. ¹³ Ndi u mwanachi ali nu mulume e nthasuwila, swinya ndi u mulumenye weyo asi ni nthazi nawe, u muchi atakatele amazye isendwa nu mulume. ¹⁴ Amuno u mulume e nthasuwila akasolwa muno u muchi, swinya u muchi e nthasuwila akasolwa muno u munyina. Ndi chitalinji wonye lyo awana winu awa nthasamba, ukuwa nomba nawonye awasolwa. ¹⁵ Ukuwa ndi u wakwe e nthasuwila apita, muleke apite. Mu milandu ngati yoo, umunyina pamwi inkhazi yitanyepwa ku malayizyo yawo. Leza atwisile sweswe ukuti twayikala mu mutende. ¹⁶ Amuno wuzye wamanya wuliwuli, we mwanachi, ukuti pamwi ulitula u mulume wako? Pamwi ungamanya wuli, monsi, ukuti pamwi ulitula uwako? ¹⁷ Muleke aliwensi ayikale uwulanzi Imfumu yimupile weliwe, wensi ndivino Leza iyisile weliwe. Choo achili chisambilizyo chane mu viwanza. ¹⁸ Wuzye pali wumwi wino waputulwa pano ayisilwe ukuti asuwile? Atakelezye ukuti ayilolesye ngati ataputulwa. Wuzye wumwi ataputulwa pano ayisilwe kwi suwilo? Atakaputulwe. ¹⁹ Amuno asa kuputulwa pamwi kunthaputulwa kuno kukalondeka. Ichakulondeka achili kutonthela amasundo yakwe Leza. ²⁰ Aliwensi ayikale mu mwito muno alinji pano Leza amwisile weliwe ukuti asuwile. ²¹ Wuzye walinji we muzya pano Leza akwisile wewe? Utakati usakamale. Kweni ndi ungize uwe we mupusuke, womvya ulongo lwenelo. ²² Amuno wumwi wino Imfumu yamwisile ndivino a muzya a mupusukwe wa Mfumu. Achilichonga, wonga wino amupusukwe pano Leza amwisile kwi suwilo a muzya wakwe Kristu. ²³ Mwemwe mwakazilwe nu mutengo, achaleka mutakatele muwe mwe wazya wa wanthu. ²⁴ Wanawitu, mu wuliwonsi uwumi wuno aliwensi mwakwe sweswe alinji mwenemo pano sweswe twisilwe ukuti tusuwile, lekani tuwe wowonye. ²⁵ Nomba ukulingana na wonsi wano watatela wawe mwi twalwa, nenji nsi nipingulo ukufuma kwe Leza. Ukuwa nkhupa amelenganio yane ndivino wonga wino, mu nkhumbu yakwe Mfumu, a musuwalilwa. ²⁶ Achaleka, nene nkhwelengania ukuti pa umulandu wa nthazi zino zikwiza, a chizima ukuti umonsi ayikale nanthi kutwala. ²⁷ Wuzye wewe watwala ku mwanachi, Utakati uvwambe ukumusya. Ndi utatwala, utakati uvwambe u mwanachi. ²⁸ Ukuwa ndi watwala, utawembusile, swinya ndi u mwanachi usita kutwalwa atwalwa, atawembusile. Ukuwa wawo wano wakwinjila muntwalwa wali mu nthazi izivule zya munsi yapansi, acho nene nkhulonda ukuti imbachinjilizye mwemwe ukufuma kwe choo. ²⁹ Ukuwa choo nkhuti, wanawitu: Imphindi ayifupi. Ukufuma nomba ukuya kunkholelo, muleke wawo wano wali na wachi wikale ngati wasi nawo. ³⁰ Wawo wano wakulila wachite ngati watakulila, watakuzewela, swinya wawo wano wakukala ngati wasi nanthi chimwi, ³¹ swinya wawo wano wakuyiwomvya insi ya pansi wawombe ngati watakuyiwomvya nkhani. Amuno insi ya pansi ndivino yili nomba yandi yimale. ³² Nenji ningalonda ukuti mutakasakamale. U monsi wino atali munthwala akasakamala ni vinthu ivya kwe Mfumu, ukusechelezya wuli weliwe. ³³ Ukuwa umonsi umutwale akasakamala ni vinthu vya munsi ya pansi, ukuti angasechelezya wuliwuli umuchi wakwe-- ³⁴ akuyigawa. U mwanachi wino atatwalwa pamwi umukazyana akasakamala ni vinthu vya kwe Mfumu, ukuti awe pambali mu muwili na mu muzimu. Ukuwa umwanachi umutwalwe akasakamala ni vinthu ivya nsi ya pansi, ukuti angasechelezya wuliwuli u mulume wakwe. ³⁵ Nene nkhuvwanga choo ku longo lwinu, swinya ukuti nthawike icha kuwanyosya pakwe mwemwe. Nenji nkhuvwanga choo muno achili chisinkha, alyakuti muyipe kwe Mfumu nanthi kuwapo ichakupinzania. ³⁶ Ukuwa ndi wumwi akwelengania ukuti ata ayileme ndi ali nu mukazyana wakwe -- ndi ali mu nkhulo ya nthwala swinya achakuzumilizwa -- afwile awombe chino akulonda. Atakuwembuka. Awatwalane. ³⁷ Kweni ndi wajimba mu mwenzo wakwe, ndi asi nanthi achakumukomelezya kweni angayilema mu kulonda kwakwe, ukusunjilila umukazyana wakwe, aliwomba ichete. ³⁸ Achaleka wonga wino akutwala umukazyana akuwomba ichete, swinya na wonga wino asola ukuti atakatwale alichita ichete ukulusya. ³⁹ U mwanachi amunyepwe ku mulume wakwe lyo achili amulanzi. Kweni ndi umulume wakwe afwa, amupusapukwe ukuti atwalwe kwe aliwensi wino akumulonda, kweni makwe Mfumu mwenga mphela. ⁴⁰ Lelo mu melenganio yane u mwanachi angawa amusechele ndi angikala wenga. Swinya nkhwelengania ukuti nanenye indi Mupasi wakwe Leza