¹ Pano wenga wakwe mwemwe ali nu mulandu nu wunji, akakwelezya ukuya kwi pembo lya wanthu paminso pa wakapanzya wanthasuwila, nanthi kuya paminso ya wanthu awatele wakwe Leza? ² Wuzye mutamanya ukuti awanthu awatele wakwe Leza walipanzya insi ya pansi? Nomba ndi mulipanzya insi, mutanga mukwanisye ukupanzya imilandu iyitichi? ³ Wuzye mutamanya kuno tulipanzya awangelo? Nga wuliwuli ukulusya, nomba, tungapanzya imilandu ya wumi woo. ⁴ Nomba ndi mungapingula vino vikupalamansya uwumi wanda nu wanda, nga chani fwandi chino mukuwika imilandu ya misango ngati yoo paminso pa wawo wano awavye mu chiwanza? ⁵ Nenji nkhulanda choo ukuti imbasozye insoni. Wuzye musi nanthi wenga mwakwe mwemwe uwamano ukuti ankgapanzya imilandu pakasi pa wanyina? ⁶ Ukuwa wenga umunyina akunyepa umunyina wunji, nga choo chikuwombwa paminso ya wa nthasuwila! ⁷ Pakuti mwemwe muli nimilandu wenga nu muwuye chikulanjizya ukupotwa kwinu. Achani fwandi mutanga mutamike ukuyifwa. Achani fwandi mutanga muyizumilizye mwenga ukuti mutumphikwe? ⁸ Ukuwa mwemwe mwenga mukuwomba iviwipe, mukuwipa uwufi, swinya mukuwomba choo ku wanyina winu mweka! ⁹ Wuzye mutamanya ukuti awanthalungamana watalipyana uwufumu wakwe Leza? Mutakasuwile uwufi. Awazelele, awa makolania, awa chilende, awa malaya awonsi, na wonsi wano wakuzelewula awonsi, ¹⁰ awang'o, awapafu, awachakolwa, wakatukana, na wakachenjezya -- nanthi wumwi mwakwe woliwo alipyana uwufumu wakwe Leza. ¹¹ Moo amuno wamwi mwakwe mwemwe walinji. Ukuwa mwemwe mwapwizwa, muswefizwe, mwemwe mupanzilwe walungamane nu Leza mwizina lyakwe Mfumu Yesu Kristu na mu Muzimu wakwe Leza witu. ¹² ''Vilivyonsi vikuzumilizwa kwe nene,'' ukuwa asa vyonsi vili nintchito. ''Vilivyonsi vikuzumilizwa kwe nene,'' ukuwa nthaliwa mulamulilwe na chimwi mwakwe vyolivyo. ¹³ ''Ichakulya acha mu wula, swinya u wula awa chakulya,'' kweni Leza alivimala vyonsi. Umuwili wusi wa wuzelele. Kweni, umuwili awa Mfumu, swinya i Mfumu yilitewetela umuwili. ¹⁴ Leza akatusizye wonsi i Mfumu nga alitukatusya swinya na maka yakwe. ¹⁵ Wuzye mutamanyile kuno imiwili yinu avyawi vyakwe Kristu? Wuzye nomba ningafumya ivyawi vyakwe Kristu nu kulemenkhania vyolivyo kwe malaya? Chitakawe wowonye nazina. ¹⁶ Wuzye mutamanya kuno weni wino wayilemenkhania nu malaya ukuwa muwili wonga na weliwe? Ndivino amawaliko yakuvwanga, ''Wawo wawili waliwa muwili wonga.'' ¹⁷ Kweni weni wino walemenkhana kwe Mfumu akuwa muzimu wonga na weliwe. ¹⁸ Samalani kweneko ku wuzelele! Lililyonsi linji iwembuko a munthu akuchita lyawa kunzi ku muwili, ukuwa umunthu umuzelele akuwembuchila umuwili wakwe wenga. ¹⁹ Wuzye wewe utamanyile ukuti umuwili wako ali tempeli ya Muzimu Mutele, wino akwikala mwakwe wewe, wino uli nawo ukufuma kwe Leza? Wuzye utamanyile ukuti wewe usa wakwe wewe we mwenecho? ²⁰ Amuno wakalwa nu mutengo. Achaleka umuchindamike Leza nu muwili wako swinya mu muzimu wako, wuno wawa uwakwe Leza.