Yag ə bəd zɨ na hyyo? Zɨna ya uswon bumi əbun ka dənian shog ji i ga ya uswon a? Səm, kuna di ənnyo dag. Zɨd əbyo wa kən hwu bə əbun wu ni, ni ə zɨd na ngya uswon bə nku? Kə də nyi wa lyen naŋ ənied bə dɨdɨd byo əwa kə nyyo ba botisman ji bumi Kristi Yesu ni, ba lyen naŋ ə nyyo ba ndyo bumi əhwu gu əkyo dâ? Əku niad zɨd duŋduŋ bə ngu mbwag botisma bumi əhwu gu ka. Əku nyyo sɨkwǐ ni bənaŋ əku dərog bə Kristi Yesu nyyo bə ənied kukwi ba bɨ kyeŋkyay shi Əcyo ku, kû ga cyyo zɨ ncon bə sɨced fay. Kə zɨ yed əkwaŋ ənyyuŋ bə ngu bə əhwu gu ka, zɨ bɨ na yed əkwaŋ ənyyuŋ bumi dərəg gu ku. Zɨ lyen ku əni, əku kpaŋ huhwob əkwa zɨd wu bə ətyyem əhwu u duŋduŋ bə Yesu, zɨ ga bud əkwa lwam əbun əkwa ku.I di əni, naŋ zɨ na lag ya uswon bɨ yed əhwo əbun ku ni. Konyan ə əkə nhwu, ə kyag gu ətyə saŋ əbun dɨ ŋway ŋwwag əbun wu shi. Əwod kə zɨ kə nhwu duŋduŋ bə Yesu, zɨ ŋwwag cucug zɨ na swan duŋduŋ bə ngu. Zɨ lyen bəd naŋ əkə ndərog bə Kristi nyyo bə ənied kukwi ba. Əwod nini əbə yed kwom kwo dag. Əhwu ka nyyo tyog tuza gu dag. Bənaŋ ka əhwu əkyo gwo hwu dənian əbun wu ni, əku hwu bə unyyuŋ kyo dənian konyan.Bə kə ənnyo, sɨced ǝkwo gwo shyyo dyo ni, ə swan swad Əgwaza kwo. Bə dɨ gag ku, nyi kyag əpyo nyin nkwom nio tuza əbun ka, əwod nyi shyyo əced bə Əgwaza bumi Kristi Yesu . Nwad ənnyo, nyi yog wod əbun wu ə nyyo tyog bumi lwam nyin ku dag, kǝlag nyi nə ŋwwag əpyo nyin mbwag nkyaŋ shushog ndwam na. Nyi yog ŋwwag nkab ndwam nyi na bɨ kətug ku dag,nâ ga yed nkyaŋ ntəm əbun dag. Əwod sə nyî wa ŋwwag əpyo nyin bə Əgwaza u naŋ nkwom ənio shyyo əced nini ni. Sə nyî ŋwwag nkab ndwam nyi na bə Əgwaza u na yed nkyaŋ ntəm shin saŋ əbun. Nyi yog wod əbun wu ə nyyo tyog bə nyin dag. Nwad nyi shyyo mbwag doka zo dag, shog Əgwaza zo byyo ced ku bə nyin. Sə yag ə? Sə zɨ ya uswon bɨ nyyo ǝbun wu naŋ doka ji byyo tyog bə nzɨd dag, sə bɨ shog Əgwaza ji a? Sǝm, ku nə di ənnyo dag. Kǝ dǝ nyi lyen naŋ jen əzo nyi n ŋwwag əpyo nyin dɨ yed əhwo ǝnyin ni, nyi bwwag cyyo əhwo ətyo əwo dɨ hwi ǝlyyad guna ni a? Cucug ə kwo nyî yed əhwo ǝbun ə wo kwog lwag əhwu ni, kwo nyî yed əhwo hwi əlyyad Əgwaza na nio ti nyi coŋ cyyed saŋ ǝbun kwo ni. Əwod taŋ dɨdyeb wu əyed shin Əgwaza a! Nyi ku yed nnwan ntəm əbun nio, əwod nini nyi ŋwwag əpyo nyin nyyo bə ntsswo dɨ hwi lwag cyyed əkwo ə ŋwwag nyin ni. Ə kə fərəg nyin əwon bɨ hwo əbun ku, nwad ə bwwag nyin ə ncyyo nnwan ntəm saŋ əbun nio. Ndyyad bə nyin naŋ ǝtyɨbɨshyi ni dənian nyi shyyo bumi lwam kyo. Bənaŋ nyi kə ŋwwag nkab ndwam nyin na di yed əhwo shɨshɨg nyyo mbyyaŋ kətug, ənnyǒ bwo nini sə nyî ŋwwag nkab ndwam nyin na dɨ yed əhwo saŋ əbun mbyyaŋ əkwi nyin ə won zɨzərag. Naŋ nyi ku ngyed əhwo əbun ni, nyi ku swan swad səd kwo bɨ ŋway byyo saŋ əbun ku. Bə njen əzo, əsum yag ə nyi fway shyyǒ tuza nkyaŋ ənio nyi mbyyo nsum na nini ni? Nwad, nkyaŋ ənio ə yed əhwu kyo. Əwod nini, naŋ ə nfərəg nyin əwod mbwag əbun wuni, ǝsɨbo bwwag nyin ə ncyyo əhwo Əgwaza ni, nyi byyo əsum zɨzərag əkwa. Tan ulu hyyo ka, yed sɨced saŋ sɨsag kwo! Əwod tan +ulu hyyo əbun ji yed əhwu kyo. Zənaŋ Əgwaza ji yed sɨced saŋ sɨsag bumi Kristi Yesu Ətyə Uli zɨd wu. Zəm!