Naŋ ə ntwərag zɨd san ku dənian ŋwwag tsswo zɨd ku ni, zɨ shyyo kay nda bə Əgwaza u mbwag Ətyə Uli zɨd u Yesu Kristi. Mbwag gu əkyo zɨd bwo mbyyo lwag ku dənian ŋwwag tsswo bumi shog ji kwo cyyo zɨ ngyoŋ kpəmkpəm ni. Zɨ byyo əsay tsswo dənian gbugbag əkwo Əgwaza ə joŋ zɨd dɨ twərag utswon ji. Ku gbugbag əkwi ni na cyyo zɨ nshyyo kunuŋ zɨd bumi kyenkyay shi Əgwaza u. Ikwo ənyin ku dag, zɨ mun gyərəb bə sswo zwod zɨd ku. Zɨ lyen naŋ zwod ku coŋ bə gbaŋ əlyo. Gbaŋ əlyo ku coŋ bə shim, shim ku sɨ coŋ bə gbugbag bə nkyaŋ utswon ji. Gbugbag zɨd ku kwoy əbyin dag. Nwad cad Əgwaza ku kwo gwo kwərog bumi ntsswo zɨd na mbwag Zɨzərag Ntswa əwo əjoŋ zɨd ni. Bə njen əzo naŋ zɨ byyo kpaŋtɨn dag, Yesu ə sɨ hwu danian zɨd, zɨd ənied əba ŋway lyen gu ni. Ku nə byyo ced bəd əyin əhwu danian ətyog əwo ə saŋ əbun duyi Əgwaza ni. Shim dag ku bu byyo ced əyin əhwu dənian ətan əyin. Əwod Əgwaza u ə twərag zɨd cad gu ku bəd, naŋ zɨ nɨ yed ənied əbun byo, Kristi əsɨ hwu dənian zɨ ka. Mbəle nini əkay, ə kwi zɨd bə əswog guna, ku na tɨn zɨd mbwag ndyen Əgwaza ku. Kənaŋ zɨ yed +nəndwan Əgwaza byo, əsɨ jyi swad zɨ ku bə Əgwaza u dənian əhwu ŋgwon gu ka . Də məta əka ə njyi swad zɨd ku ni, zɨ na shyyo san ku dənian sɨced gu ku. Kaŋ bə sɨkwǐ ni, əwod zɨd bwo zɨ gyərob bumi Əgwaza mbwag Ətyə Uli Yesu Kristi zɨd wu kyo mbwag gu kyo zɨ nsan jyi swad zɨd əkwǐ ni. Kukwo mbyyo, mbwag ətyog ənyyuŋ kyo əbun ə nŋwwo bumi swanta ku, ənnyǒ bwo əhwu ka sɨ nŋwwo mbwag əbun ka. Əhwu ka sɨ kub ənied ba, nwad, konyan ə byyo əbun. Nwad ənnyo, nyyo naŋ əka tɨb doka ji dag, naŋ əbun wu nshyyo bɨ swanta ku. Əwod əbun ə nshyyo dulwo əka doka nsyyen ni dag. Əmgbom bə ənnyo, əhwu ka nyyo tyog də njen Adamu byoŋ ba nad jen Musa. Had ba nad bə ənied əba da ba ku byyo əbun tad doka naŋ sɨn Adamu ku ni dag, byo ə yed təŋkəy guku wo təbay də utswon ji ni. Əwod kənaŋ ənnyǒ, zənaŋ ji di naŋ bwwo əbun ni dag. Bə kə bwwo əbun ətyo nyyuŋ, dɨdɨd ənied ə nkwi, ni ə shog Əgwaza ji bə zənaŋ mbwag ətyog ənyyuŋ Yesu Kristi, sə +zənaŋ guji na shyyo tuza ənied bədɨdɨd. Əwod, zənaŋ ji də jî di naŋ əbun wo ə nyyo mbwag bə ətyə nyyuŋ ni dag. Bə əfam ə nyyuŋ, fyyed əlyyad əhwu ku bay dənian bwwo əbun ətyog ənyyuŋ ə. Had nini bə əfam sɨka, zənaŋ əzo ə nfərog zɨd əwon ni, bay məta dɨdɨd bwoy əbun kyo. Bə kənaŋ bwwo əbun ətyə nyyuŋ cyyo əhwu ka nyyo tyog mbwag ətyə nyyuŋ, ənnyǒ əsɨba san gbəŋdaŋ nshog mbyyaŋ zənaŋ byoŋ saŋ əbun na nyyo tyog mbwag sɨced ətyə nyyuŋ Yesu Kristi. Nwad ənnyo,naŋ bwwo əbun ətyə nyyuŋ mbay bɨ fyyed əlyyad əhwu tuza ənied dɨdɨd ni, ənnyǒ mbwag kwog cucug ətyə nyyuŋ mbay bɨ saŋ əbun, kwo bay bɨ san shyyo sɨced tuza konyan ni. Bənaŋ mbwag ətyog ənyyuŋ lag tswoŋ guku sɨ cyyo ənied bədɨdɨd sɨ yed ənied əbun ni, ənnyǒ bwo mbwag hwi əlyyad ətyə nyyuŋ cyyo ənied bədɨdɨd ə shyyo saŋ əbun ku. Doka ji bay i sɨ cyyo əbun wu ətə mban, ənnyǒ bwo ulwo əka əbun wu ətə mban ni, shog ji sɨ mbyyaŋ də kpa də kpa. Ə nyyo sɨkwǐ ni dənian əbun wu ə nyyo tyog bə əhwu ka, ənnyǒ bwo shog ji nyyo tyog mbwag saŋ əbun ku tɨnad sɨced saŋ sɨsag mbwag Yesu Kristi Ətyə Uli zɨd wu.