nbtt-oks_rom_text

Ẹpan 6

¹ Ẹna ta ka ga? Itẹ kẹ ki luwe họn? Ti ki ka taka gbọ ese họn? ² Ẹke gbadọ siyẹn gada. Ato nẹnẹ fo nọ iluwe na, gana te ke siye kẹ mana amọna? ³ Ume din ka abẹ ọyọyọ nẹ bi rimomo fọn mọn Ijisọs Ẹkraist na, ibi riba imomo fọn mu ufo? ⁴ Bí re tu bile aka ayẹ imomo oriri fọn mọ ufo. Ọnẹ siye ubaka akọ Ẹkraist siye palẹ ṣa ekporo na Ẹdẹda yọ ugbugbodi ka atọ ti di jenjen ẹrọ ọwọwọw. ⁵ Adaka ti di fọ iwu gbeli ya ọrẹ ọlọnẹ ayọ fo na, te ke diya fọ iwu gbeliya iyọ ọpalẹṣa. ⁶ Ti din ọnẹ, ka tọ iwukpe oṣunṣun bẹ káyan wọ ọgbalati aka ahẹ uba ka iwukpe nẹ wọ iluwe ẹka na édi fu. Ọnẹ ṣe siye ti me pile ṣino ọvan nọ iluwe. ⁷ Ẹfẹna nẹnẹ fọ na, bi rorẹ wọ ọ ọṣẹrẹ ro iluwe ọ́rẹ̀. ⁸ Ama te fọ aka Ẹkraist, tẹ nawọ ka te ke diya mẹma. ⁹ Ti din ka, kaba ọgbọna Ẹkraist we palẹṣa ekporo na, eke pile fo, ufo eme pile jobin wọ iyo ẹpan. ¹⁰ Sọ ọ ufo nẹnẹ efo nọ iluwe na, éfò isi ọyẹrẹ nọ ero fenyan. Akọnẹ e siye ki wa na, ẹrọ nẹnẹ ámà na ama nọ ọ Osibina. ¹¹ Ọrẹ ọnẹbẹ, kanọ aka gba niwu ka ni fo nọ iluwe, ama ni wo ẹrọ nọ Osibina Ijisọs Ẹkraist. ¹² Ọnẹbẹ uba, ume ya ka iluwe eje obin iwọ iwukpe úme na yọ ọlarẹ wọ. ¹³ Ume fọ wọ iwu -ukpe kọyẹrẹ yọrẹ nọ iluwe, na ka da aka utun mẹpẹn nẹ bi lo nọ ọna ma wọ ọsẹrẹ na. Amá nẹ fọ niwu nọ Osibina àkà ẹnanẹ bi yin fura ekporo yọ ọ ẹrọna, nẹ fọ nọ iwukpe nọ Osibina akọ ọ utun mẹpẹn nẹ be ke lo nọ ọṣẹrẹ osisiye na. ¹⁴ Ume yaka iluwe ẹje obin yẹrẹ wọ ẹpan. Ubaka ka ume wọ ọ ububuru igben ama ẹse igben ọma. ¹⁵ Ẹna emi wa? Itẹ ke mi ki siye iluwe ubaka teme wo ububuru igben, ama ese yọ igben họn? Ẹgbadọ adẹgan. ¹⁶ Ni din ka nafo niwu yẹn akọ ọvan na, ẹvan nẹwa nọ ẹfẹna na wọ yẹka na? Udi ya doȯ ọvan na, nọ iluwe na ka foro yọ ufo na, tabi ọvan nọ ọtọn ọwọwọ, na ka foro yọ ọsẹsẹrẹ osisiye na. ¹⁷ Tẹ han mọ Osibina ẹba! Ka ọvan nẹ tayẹ wa nọ iluwe na, ama ni mi wọtọn kaba nọ ọ ulono otite ọlọnẹ bi tenu na. ¹⁸ Bẹ tọra wọ fura iluwe, bi mi diya sẹwọ ṣina ọvan nọ osiye ọṣẹrẹ. ¹⁹ Ẹgẹga aka oforo na nọ iwukpe iwogbigben nẹnẹ umesu na. Aka u siye fọ wọ iwukpe aka ọvan nọ ọna ma wọn na aka ububuru na ma yẹrẹ na, ni diye mi fọ ọtọn oṣiṣi sa na, diye wo ọrẹ ọnẹbẹ akana fọ wọ iwukpe aka ọvan na nọ ọṣẹrẹ diya nọ ẹsẹwọn. ²⁰ Ọgbọna ọ́wọ̀ ovan nọ iluwe na, emesu ọnẹ towu aka ọṣẹrẹ osisiye na. ²¹ Ọgna ọnẹbẹ, ilukutu ọ ọna usu a nẹ mi wọrẹ ẹpan akọ wọ na? Ẹpẹnẹ nabẹ yọ urun ba ufo ya. ²² Ama akana ọnẹ nẹ bẹ torawọ veṣa fura iluwe na, bi mi sẹwọ ọvan nọ Osibina, usu wọ ilukutu nọ ẹsẹwọn. Yọ ọsẹpan awọ ẹrọ ne me su ọta. ²³ Ẹkẹrẹ nẹ wo iluwe ẹka na ufọ ya, ama Osibina yọ ẹse ero ne mesu ọta na ya Ijisọs Ẹkraist tọ Idu.