¹ Ẹna teke mi ga ka Abraham, tọ ẹdẹda ọkẹkọkẹka, iwukpe ọọrẹ gba? ² Ada utun nẹ Abraham siye na biya ṣẹn yese ébana akẹ tu buloka, ama, ama wa Osibina ẹrẹn. ³ Ẹna Osibina ẹga ga? "Abraham nọ ọ Osibina wọ, bẹ ganya akọ ọṣẹrẹ osisiye na nẹyan." ⁴ Akanọnẹ ẹfẹna siy utun na, yọ uba nẹ beke dunẹ na, ama wa aka ọfẹ na ama wa uba nẹ bi Jẹna. ⁵ Ama ẹfẹna eme siye utun na, ama a anọ ẹfẹna da ṣẹn nese nọ ẹnanẹ eme siye Osibina eka na, yọ onawọ bẹ gan ya akọ ọṣẹrẹ osisiye na. ⁶ Idevid gẹ ka okukurubile aka da nọ oforó nẹnẹ Osibina gan wọ ọṣẹrẹ osisiye neme siye utun na. ⁷ Agẹ ka, "Okukurubile ya nọ ẹnanẹ me siye ọsẹrẹ nẹ bẹ fọ ẹpan gbun na, nẹnẹ bi diye ri bọ ọ iluwe na. ⁸ Okukurubile ya nọ oforo nẹnẹ Idu ama gan iluwe no na." ⁹ Okukurubile ọne wanọ enane bẹ fuwẹsẹ na abayẹrẹ họn, sa kọ ẹnanẹ bima fuwẹsẹ na? Ubaka tẹ gẹ ka, onawọ be ganya nọ Abraham aka oṣẹrẹ osisiye na." ¹⁰ Gana bi siye ganya nẹyan? Ṣana biya fuwẹsẹ ya họn? Sa ọgbọna bẹ fuwẹsẹ ya ke na? Ème gbeke ọgbọnẹ bẹ fuwẹsẹ kena, ama ṣana biya fuwese! ¹¹ Abraham gna okpikpeli ne wọ ifuwẹsẹ ẹka na aka ofifile ọnẹ wọ ọṣẹrẹ na, nẹnẹ esu ọnawọ na, ọgbọna ne bé mi fuwẹsẹ na. Ẹkẹ na wọrẹ na awaka bi siyẹ Ẹdẹda nọ ẹnanẹ nawọ fenyan na, nẹnẹ bememi fuwẹsẹ na, bí di gan ¹² mọ ọṣẹrẹ na ẹdẹda eme gbeka ọfuwẹfuwẹsẹ aya yẹrẹ, bi diye ti yọ ipisi ọnẹ wa onawọ nẹnẹ tọ ẹdẹda Abraham suna ṣana biya fuwẹsẹ na. ¹³ Ẹkẹna bẹga ka be kesiye nọ Abraham aka yọ ubanẹ na, ka aka dọ ẹrọ ọkogun ama yọ ọ ububuru ọ ọrẹ ṣa ama o siye ọsẹrẹ yọ ọnawọ. ¹⁴ Adaka ẹna nẹ eme wo ububuru na aka dọ ọkogun, baka sẹ onawọ siye ufolo aka ọnẹ bẹ ka be ke siye na ṣinọ ufolo. ¹⁵ Ubaka ububuru ada fọ ọ ọkẹkan ṣa, ama ẹfẹna nẹnẹ ububuru ama wanọ na oṣi siye ẹfẹnẹbẹ. ¹⁶ Ọnẹ uba, onawọ ọnẹ baka ke siye na edi jọmọ yẹrọ ese aka edi su ofayẹn yẹrẹ nọ Abraham yọ ubanẹ fenyan ama wan no ẹnanẹ wo ububuru ayayẹrẹ na, kọ ẹnanẹ su ọkpa Abraham yọ onawọ na. Aya wa ẹrọ fenyan ẹdẹda, ¹⁷ akọnẹ bi siye wọrẹ wije na, "Itiye wu akọ ẹdẹda na nọ iken nọ yọyọ abẹ." Abraham wọ ẹfẹna afọ anyẹn yẹrẹ na ẹrẹn oro newo Osibina, nẹnẹ fọ ẹrọ nọ ẹnanẹ fo ¹⁸ Ọfa áyẹn eme pila nawọ ọfanyẹnyẹrẹ ayẹ ka ayẹ eke ṣinọ ẹdẹda no iken ọyọyọ, akọ nẹnẹ bi siye ga nẹba na, "Ẹgan wọ ubanẹ abẹ eke siye da nẹ." ¹⁹ Nẹnẹ eme ren onawọ na, abalẹ yi iwukpe aka efo na (ubaka ere ẹyẹn ipi ẹrọ ọnẹ) aka Iserah yọ ọ ogben nu bu nẹ fo na. ²⁰ aka ka Osibina yọ owo ọrọrọn, Abraham eme yuru ọne ama nawo na. Ama, eṣile ọnawọ afọ ugbugbodi nọ Osibina. ²¹ Esu áyẹn nosise dá dá, ka ẹkẹnẹ-kẹna Osibina ága ka áye eke siye na, è de siye. ²² Unẹ uba, bí di ya "gan ya ne ya akọ ọsẹrẹ osisiye na." ²³ Áma ẹga abẹ "Bẹ gan ya nẹyan" ba ma wọ ọrẹ nẹyan ayayẹrẹ. ²⁴ Ka tọ ayẹ bẹ wọrẹ nọ, aka baka gan ya kẹ atọ nẹnẹ nọ ọ ẹfẹna palẹ Ijisọs tọ Idu ekporo ²⁵ ṣa nawọ na. Ọnẹ awọ ẹfẹna nẹ bẹ tọra fura ṣa nọ ọ ti iluwe aka bi diya payan fura nọ tọ ese ọṣẹnṣẹn.