nbtt-oks_1pe_text

Epan 4

¹ Ọ̀nẹba uùba, ubaka Ikristi jo oya ìwukpe, nẹ kọ ni iwu ẹẹ̀sa wuje akọ osisiye ọrọọrẹ ayẹ. Ubaka ẹfẹnẹfẹna è é je oya ìwukpe ke na bẹ iluwe jọmọ ì yẹ ẹrọ. ² Kpẹnẹkpẹnẹ akọ, ero ọla ẹgan, nẹ yọ ọgba nẹnẹ mi ku ya ìwukpe na, e me pila jọmọ nè erokoro inini abẹ, àmá nọ Osibina oòpin. ³ Ni lo ọgba ọyọyọ òsisiye ẹkẹna nẹnẹ ikuwero abẹ de ni osiye na, ọ̀mẹma iwukpe, , ọ̀wadefe, ìbi omumoro, òsisiye ẹjemẹ okpe abẹ, akà òsisiye ujun opupun okoriwu abẹ. ⁴ Bi roro ka a ma wa ẹkẹna nẹnẹ bọ ka ni me je gbeli ba òsiye gbọgba eèboju iwa ẹnanẹ, bi min a ga nẹ ẹga odudu. ⁵ Bá àka ganmowo nẹ ẹfẹna kọ esa wuje ka a ṣen ewẹrọ akà ekporo. ⁶ Ọnẹ uùba bẹ wasun ẹpẹpanoboro nẹ ka ekporo abẹ, kadakada ka, è é sisi gbe ka bẹ ṣẹn ba ẹkarẹ akọ erokoro abẹ na, bè èke di ma èfunwẹnfunwẹn akọ Osibina na. ⁷ Ẹpẹn fẹnyan ọ̀sẹpan turu à á ṣa. Ọ̀nẹbẹ uùba, ni teyi nẹ ẹyẹ e gule, akà ka nẹ sẹ ni iwu oòkpara í ni iroro ubaka na adura abẹ. ⁸ Fọra epẹn abẹ fenyan, ni su unini oṣusura na abẹn, ubaka unini de ri iluwe asanmasan abe. ⁹ Ni ki siye abẹn ọga nẹnẹ e è me su ihuhunu na. ¹⁰ Akọ anọ ọrọọrẹ siye na ọwa na, ni lo ẹ ki siye okoto kẹ na abẹn, ne fọ ikuwa ki ruwa Osibina eèse ì yọ ọla ọ̀rẹ ọyọyọ abẹ. ¹¹ È é su ẹfẹna nẹnẹ à á ga ẹga na, e wo Osibina eèga kẹ ga. Ẹ gbe ka oro è é siye okoto, ni tebi e wo ogbigben nẹnẹ Osibina à á nẹ ya na ṣa. Ni siye ẹkena enane kadakada ka òrẹ fẹnyan Osibina àka nu ugbugbodi Ijesu Ikristi uùba ọrẹ. ¹² Uniniro, ni ma balẹ ya àka ẹpẹn ọla ọbẹn ọmabalẹ ẹ̀ra nẹnẹ ṣẹlẹ to nu kẹ, na, e ki we akọ ẹpẹn ẹlẹla a ṣẹlẹ è é to nu. ¹³ Akọ ọnẹbẹ, akakọ nẹnẹ ni siye è é je Ijesu oòya abẹ na, nẹ kẹ bẹn, kadakada ka ka anọ e di bẹn ni diya rọnmẹyibe ọgbọna nẹnẹ bà a fọ yu ugbugbodi nyẹn na. ¹⁴ Bà a kparẹ we etun ni Ikristi iìwuru, u ṣina okurubilero, ubaka ugbugbodi eÈfunwẹnfunwẹn holo yẹrẹ nọ. ¹⁵ Àmá e me su ẹfẹna nẹnẹ èke je oya àka ọnwanoro, oyiri, osiyodudu, sa àka ọfọwo wo oro ọbẹn ẹga. ¹⁶ Àmá è é su ẹfẹna nẹnẹ è é je oya akọ Ikristẹni na, a ma kọ ẹpan, akọ ọnẹbẹ, a fọ iwuru ọnẹbẹ ki yeyi Osibina. ¹⁷ Ubaka ọgba re ka ẹkarọṣẹṣẹn a tọmẹ Òsibina uùba. È é gbẹ e ka wo ti iwu tọmẹ na, ẹna è èke mi wa ero abẹ nẹnẹ a à ma wọ ọtọn no Osibina ẹèpepanoboro a? ¹⁸ Akà, "È e gbe ka e numa ka bẹ na ọṣẹrẹro fan, ẹna è èke mi wa onẹmesiyakosibina akà iluwero na?" ¹⁹ Ọ̀nẹbẹ uùba ni tebi ẹnanẹ è é je oya ubaka Osibina oòpin na bẹ fọ bẹ ẹyẹ dọn Ẹma osiyikuwa ì bo oboro osisiye.