1
Mè e gbe anọ nẹnẹ nẹ wa isuda abẹ na, amẹ, nẹnẹ e gbe ka osuda akà ubedin e wa ni Ikristi oòya abẹ na, i diya wa ẹfẹna nẹnẹ è èke ruwa ùgbugbodi nẹnẹ bà àka a nyẹn na.
2
Nẹ kẹ ṣẹlẹ Osibina uùdudu nẹnẹ nẹ fọ anyen à á ta na, ni siye a ma wa ka ọgbadọ siye, àmá ubaka ni ya osiye, akọ Osibina siye è é ni ka ni siye ẹ na-a ma wa nọ usi ẹèkerẹ àmá ẹ̀gaara.
3
U me siye akọ ọga yẹrẹ ẹro abẹ nẹnẹ nẹ fọ anyen à á ta na.
4
Akọ ọnẹbẹ, nẹ da ni ijin. Ọgbọna nẹnẹ Ọṣẹlẹ ududo ẹẸ̀pan nẹnẹ à á han na.
5
Ọ̀rẹ ọrọọrẹ ọnẹ, anọ na. Anọ fẹnyan, nẹ fọ ọtọmẹpan file ni diye ki siye okoto kẹ na abẹn. Ubaka Osibina de bila ẹfa anyẹn to ọkẹkẹrẹro, àmá a da fọ ese nọ ọtọmẹpan
6
Ọ̀nẹbė uùba nẹ tọmẹ ẹpan Osibina uùba ọkẹ ka igben kadakada ka e di fọ wọ kpo ògba nẹnẹ tọ na
7
Bila wo onini fẹnyan ṣuwa ẹ ubaka à á balẹ nọ.
8
Ni wo ọkpara, ni diya kẹ ṣẹlẹ ni iwu. Ne ebero nẹnẹ wa eṣu na jejen è é nẹnẹ è èke je na.
9
Ni fura tọ ẹ. No ṣile ì nọ ọnawọ. Ni din ka nọ ọnawọ oòbuwe ẹ́ro fi iwu à á na oya ọla ẹgan.
10
Nà a fọ ọgba keke je oya na, Osibina nẹnẹ wa ese fẹnyan ẹka na, nẹnẹ ye nu ṣa yu ùgbugbodi otututun ẹka ìkristi, è èke nyin nẹ ẹba, a fọ ni ikpisi ṣẹrẹ, aká e gben ni iwu.
11
Nẹ ya a wa afọrẹ otutunmotutun. Aamin.
12
Ẹ bale Isilvanọsi akọ ọda nẹnẹ su ikuwa na, i mi ṣana fọ ẹwọrẹ file ẹ nẹ nọ. Mè e gbe no uloko i diya nu ubedin nẹ nọ ka mẹ ẹwọrẹ wa Osibina ese ikuwa ẹka. Ni jọmọ wo yi ibe.
13
Iyaro nẹnẹ wo Ebabilọni na, nẹnẹ bi bile nu tiye na, à á gan no ka Ẹ̀maki, mo ogben, à á gan nọ.
14
Nẹ fọ unini oòfowodaṣiṣin gan abẹn. Iwọbẹbẹrẹ a da na anọ fẹnyan nẹnẹ wo Ikriti ibe na.