nbtt-oks_1pe_text

Epan 3

¹ Ọ̀rẹ ọnẹ, anọ nẹnẹ nẹ wa iwore na nẹ fọ ni iwo wo ni iforo abẹ aàgalẹ. Ni siye ọnẹ ubaka e su ọnẹ nẹnẹ a à ma wọ ọtọn nẹ ega ayẹ na, ni di je bẹ ẹkẹrẹ nè e me sisi ga ẹga na, ì ba oworo iìwa uùba ọrẹ. ² Ubaka bà àka gba ni iwa ẹgba àka otomẹpan. ³ Ni ma fọ itikpa ọla akọ ẹpẹn ọwiwo, iwura, sa ẹsa nẹnẹ wo ọgba na. ⁴ Akọ ẹgan, nẹ fọ ibe oòrokoro nẹnẹ wo ẹyẹ ẹka na, akà uro ọlọn ẹka nẹnẹ a à ṣana e fu na akà ẹfunwẹnfunwẹn oṣuṣu ẹka, nẹnẹ rọnmuro Ósibina ẹrẹn na. ⁵ Ubaka akọ iyaro ọnwọnwọn abẹ èsubu nẹnẹ fọ anyẹn yẹrẹ Osibina na siye guru bi iwu, òtọtọmẹpan nẹ bọ oforo abẹ ⁶ Ọrẹ ȯnẹ ayẹ isẹya à á wọtọn nọ Abrahamu e min e ye ẹ yi Idu nẹ. Ne wa ye egben abẹ akana nè e siye ẹkẹna nẹnẹ rọnmuro akà ka nà a ma sọn ẹnyankata ọrọrẹ ⁷ Ọ̀rẹ ọrọọrẹ, anọ iforo nẹ fọ odidin ma no oworo abẹ kẹ ma, akọ èlo ẹẹ̀pẹn nẹnẹ e è me ṣile na. Ne gba ka, ni kuru nẹ ba akọ obile je ẹrọ eèse. Ni siye ọnẹ ubaka na adura abẹ e me su ọjọrẹ ⁸ Ọ̀sẹpan, anọ fẹnyan, ni su ibẹ ọọre, nẹ sọn abẹn eèyi, ni ni abẹn akọ ẹda abẹ na, ni su ẹyẹ eèyi ẹka, ni diya bere ni iwu wuje. ⁹ Ni ma fọ odudu duna odudu sa etun ne etun. Akọ ọnẹbẹ, ni ki kuru ki bile ba, ubaka ̣ọnẹ uùba wọrẹ ba ye nu, ka ni di je ẹkẹrẹ oògun. ¹⁰ "Ẹfẹna nẹnẹ è é ki ni ka ni ero ẹẹ̀ga ka e diya gba isubu iboro na a sẹ yẹ ẹlarẹ jọmọ fura odudu akà yo owokpe abẹ fura awọrẹ ọgẹga. ¹¹ E bila fura ẹkẹna nẹnẹ wa odudu na e mi ki siye oboro. E ki ni iwọbẹbẹrẹ e diye ki gu ya. ¹² Idu aànyẹn à á gba ọṣẹrẹrọ, akà yọ ọtọn à á wọ bẹ ẹbẹlẹ abẹ. Àmá Idu aàyẹn bila tọ abẹ nẹnẹ è é siye odudu na." ¹³ Ẹra àka vẹ no oron a è é gbẹ ka nà a nwọn iwu ka ni siye ọnẹ nẹnẹ wa oboro na. ¹⁴ Àmá è é gbe ka nẹ kpẹrẹ ọṣẹrẹ uùba è é je oya, okurobilero ayẹ ọ wa. Ni ma sọn ẹkẹna bà a sọn yọ ọrọrẹ na ọọ̀rọre. Wi me bi ibe fuwa. ¹⁵ Akọ ọnẹbẹ, ṣẹrẹ Idu Ikristi ì nẹ ẹyẹ akọ ọnwọnwọn na. Nẹ fọ ogba fẹnyan kọ ẹsa wuje oguna ẹfẹnẹfẹna è é ṣin nọ ọfanyẹnyẹrẹ nẹnẹ ni su na oòwo. Nẹ fọ ọlọn akà ẹpan ọtọtọmẹ siye ọnẹ. ¹⁶ Ni su ẹyẹ uùbedin kadakada ka ero abẹ nẹnẹ à á kpare nẹ ero oboro Ìkristi etun usi e di sẹ ba ubaka bà a ga wẹ ẹga akọ osiye odudu abẹ na. ¹⁷ A kẹsẹ ka, è é wọ Osibina iìnini, ka ni je oya no oboro osisiye fọra ka akọ osiye odudu abẹ na. ¹⁸ Ka Ikristi fọ ọgba ọọrẹ je oya ni iluwe abẹ. Ẹfẹna wa ọṣẹrẹro na je oya nẹ tọ, atọ nẹnẹ à á ma wo wọ ọṣẹrẹro na, ubaka e di fọ tọ ṣa Osibina ẹfa. Bẹ nwam ya iwukpe, àmá bẹ sẹ ya wo ẹrọ Ẹfunwẹnfunwẹn uùba ọrẹ. ¹⁹ Ẹ́funwẹnfunwẹn uùba ọrẹ, a yọ a wasun nẹ ẹfunwẹnfunwẹn abẹ nẹnẹ wo ẹnwan akana na. ²⁰ Bi ma wọ ọtọn ọgbona nẹnẹ Osibina ọòlọn wọ ọkẹkarẹ ìnowa iìsubu abẹ, ìsubu abẹ nẹnẹ biya ma ọkebi ayẹ na, nẹnẹ Osibina fan ero keke ẹbẹn-usi ọnọkọnọkọnọ abẹ-èbi ọọrẹ. ²¹ Ọnẹ a wa orimomo ọọ̀manyẹn nẹnẹ fan nọ akana na-a ma wa no opuwa isisin fura iwukpe, àmá akọ ọfọ ẹyẹ uùbedin oboro ṣerẹ no Osibina-Ijesu Ikristi ọọ̀sọmapalẹṣa uùba ọrẹ. ²² Ikristi wo Osibina uùba ojijen. A fon ososi yọ. Angẹli abẹ, iburu abẹ, akà iwogbigben abẹ gbadọ tọmẹpan nẹ ya.