¹ Ònebe uùba ni mọ odudu, awọrẹmẹ fẹnyan, ẹrẹkurẹku, ọsẹsẹn fẹnyan, akà ẹlabo fẹnyan. ² Akọ akaka na, ni ni efunwenfunwen ẹẹ̀bebi nẹ e mẹ fuwa na, ubaka ni di wo ọnẹ bẹ uùba ki guwẹ ònaafan, ³ è é gbe ka nẹ tọrẹ balẹ ka Idu rọnmurọ. ⁴ Ni ya ṣa ayẹ nẹnẹ wa ewẹrọ oòtarẹ nẹnẹ ẹro abẹ yuru ke na, àmá nẹnẹ Osibina tiyẹ kẹ na ka e su olo nẹ ya àyẹ na. ⁵ Ka anọ ẹbẹba è é wẹ akọ ewẹrọ oòtarẹ nẹnẹ ba a mẹ kpọ ka e ṣina efunwẹnfunwẹn uùbo ka e di ṣina aṣirigi ọnwọnwọn nẹnẹ dẹ pun ẹfunwẹnfunwẹn iìnyanpun nẹnẹ Òsibina ẹèfȧ Ijesu Ikristi ọọ̀rẹ. ⁶ È wo ẹmumu ọnwọnwọn ibẹ ka: "Ungba ẹ, ẹ fọ wujẹ Ẹ́siọni oogun ọọ̀tarẹ nẹnẹ bi tiyẹ akà onyẹnẹkẹro na, ẹfẹnẹfẹna a à na ẹ wọ na usi à àka sẹ yạ." ⁷ Okurunọ ayẹ wa na anọ nẹnẹ na ẹ wo na. Ama na abẹ nẹnẹ à á ma nawọ na, "Otarẹ nẹnẹ ọmubọ abẹ yuru wujẹ na, ọnẹ e mi ṣina oogun ẹpan," ⁸ akà "Ọtọsẹn ọọ̀tarẹ akà ọtarẹ nẹnẹ da fọ ba falẹ na." Bẹ tọṣẹn ubaka bi ma wọ otọn nẹ ẹga ayẹ ọnẹ nẹnẹ wa ẹkẹna nẹnẹ bi tiye ba nọ na. ⁹ Amà nẹ wa erokoro nẹnẹ bi tiye na, aṣigiri ẹẹ̀pan, iken ọnwọnwọn, ero abẹ nẹnẹ wa Osibina obibi na, ubaka ni di kpọ ẹfẹna nẹnẹ ye nu fura esiri ibẹ fon yọ ọsọ ojinorowofuwa na oosisiye ẹpẹpan. ¹⁰ Ògba ọbẹn ùrun ni ma wa erokoro, àmá akana ni ṣina Osibina ero. Ni ma tayi na eyi àmá akana nẹ na eyi ke. ¹¹ Uniniro, ye nu akọ ẹga abẹ akà iwero abẹ na ka ni ma kọ iwu sẹ iwukpe iìnini bẹ, nẹnẹ ma nẹ ẹyẹ à á gbanmẹkọn na. ¹² No osisiye ìkuwero abẹ eètin a da onẹ nẹnẹ su ugbugbodi na, e di gbe ka bà a fọ nọ kẹ ta ka nè e siye ẹkẹna nẹnẹ a à ma bọ na, ka bi di balẹ nọ osisiye oboro bi mi fọ ugbugbodi no Osibina ìsubu nẹnẹ à á fọ iwu nyen na. ¹³ Nẹ wọ ọtọn no orokoro iìburu fẹnyan ubaka Idu. Nẹ wọ ọtọn no obin akọ obije na, ¹⁴ akà ka ẹgọrọnọ abẹ nẹnẹ bi file na ka bi je oduduro abe oya akà ka bi yeyi ẹnanẹ nẹnẹ siye oboro na. ¹⁵ Ubaka ọnẹ a wa Osibina oòpin, ka ì nọ oboro osisiye bà àka sẹ ẹga gbogba nẹnẹ abẹro abẹ à á ga na ri. ¹⁶ Akọ ọfanro abẹ na, ni wa lo nọ ọfefan akọ oriri no odudu osisiye, àmá ni jọmọ àka Osibina iìkotoro abẹ na. ¹⁷ Ni kuru ne ero fẹnyan. Ni ni edagbenosisiyẹ. Sọn Osibina ọọ̀rọrẹ. Kuru no obin. ¹⁸ Anọ ikotoro abẹ nẹ fọ ni iwu wo nọ ọga abẹ aàgalẹ àka okurunọ fẹnyan. Ni ma fọ ni iwu wọ ọnẹ nẹnẹ wa oboro akà oga nẹnẹ su ọlọn na aàgalẹ, àmá ka ẹnanẹ nẹnẹ bi iwa ṣile na. ¹⁹ Ubaka a wa uyiyeyi eèpen, è é gbe ka e din Osibina, oro aye fi iwu na ọsẹsẹ abẹ ogbọna nẹnẹ è é je oya nẹnẹ a à ma bọ na. ²⁰ Ubaka ẹkẹrẹ ọọna e wamọ na è é gbe ka ni luwe ni mi fọ iwu na ọgbọna nẹnẹ bè e je nọ oya na.? Àmá è é gbe ka ni siye oboro ni mi e je, oya ogbona bè e je no na, ọnẹ guwe nu uyiyeyi Òsibina ẹfa ṣa. ²¹ Ọnẹ bi kpoto ye nu wọ nẹ, ubaka ki Ikristi je oya nẹ nọ. E tebi ọmanyẹn nẹ no ka nẹ kẹ yẹrẹ ì yi inyin abẹ. ²² "E me luwe kọrọọrẹ, sa ka i be gba awọrẹ i yo owo. ²³ Ogbọna nẹnẹ bẹ fọ e siye osi na, e me pita bẹ. Ọgbọna nẹnẹ è é je oya na, a ma fata, àmá a fọ yi iwu dọn ẹfẹna nẹnẹ da ṣẹn ọṣẹrẹ ẹẹ̀karẹ na. ²⁴ Ayẹ ẹbẹba fọ ti iluwe abẹ wo yi iwu yo oti ubaka time eile su ọkpa iluwe akà ka ti di kẹ ma nọ ọṣẹrẹ. Àka yẹ ẹṣọkọlẹ bẹ fọ ni iwu gan. ²⁵ Anọ fėnyan tayi wo edamina gba àka ududo nẹnẹ nẹ fuwa na, àmá akana ni pila ni nọ ọseledudo ṣa akà ọbẹsẹ nọ nu uṣi.