¹ Ijesu ọọ ngwụ inẹpa jinẹ, ni irẹkụra aani. ² Ree, asi osụẹngwụ ọnyi tụni ụpoto vetụo. Ome re ọdọwụ anini, di Ijesu kaa yi osuẹngwụ ọnọ ka, "Ẹwụ ozi, ngwareyi sha. Aa si aichama wụ vayawụ da." ³ Di oyofi ẹnyi aa kaa inakaakana ẹngwụ anini ka, "Ọnọrụ ọnọni ọọ ka isa aanyisi." ⁴ Ijesu ọọ yẹ oo nero, dọ ka, "Sẹnẹvẹ dụ we ro isa ọshimi ini ọtụtụrụma awụ nini? ⁵ Yere ana rẹngwụ fụ ka ka ki, 'Asi aichama awụ vayawụ,' navẹki, 'kwẹtẹ dụ wa zụsẹ?' ⁶ Ama dụ wa yẹ, ki Ozi Ọza ọọ nyi ụmọ ọ sisi aichama aza vayani inẹshẹ. "Dọ kaa yi osuẹngwụ ọnọ ka," kwẹtẹ, si ụpoto awụ, dụ wa neeshi awụ." ⁷ Di ọnọru ọnọ kwẹtẹ, do neshi aani. ⁸ Ụmoni aza ọkọni ẹnẹ re isa ọnọ, oo shụweyi, dẹ si ụga yi Oshomoshi ọna si ụmọ ẹngwụ ọnọni yi aza. ⁹ Ijesu mẹ fizọ dọ na, oo re ọnọrụ ọnya anaa shi Imatiụ, ana yatụ tụni ajẹngwụ iza ya dọ imaana. Dọ kaa yọ ka, "vatụra mi." Dọ kwẹtẹ, dọ vatụra a. ¹⁰ Ijesu mẹ yatụ ọnọ vaa ri isari ineshi, ree, di aza ẹrụrụ ẹnaa di maana ọnri anaichama nini bẹrẹ Ijesu ọnri eziafụ aani risa. ¹¹ Ụmọni Ifarisi nini ree, dẹ kaa yi eziafụ aani ka. "Sẹnẹvẹ di ọzụọzisa awụ nini ọnri ọdimaana nini shi anaichama nini, gaa risari kẹ?" ¹² Ijesu mẹ wụ, dọ ka, "Aza ẹni ẹngwụ ra zi zi, e mee si ọmọzikụ, ẹnẹngwụ aazị renya enee si ọmọzikụ. ¹³ Na kọsụẹ isẹnẹ vi afụ irẹyi ọnọni, 'Ayụva ọni mee si, aivi isẹvọ.' Ma zi vẹ vaa shi ẹnẹ naa mẹtẹrẹ ka e rinẹ varama, ama anaichama nini." ¹⁴ Ụmavọ di eziafụ Ijọọnụ vetụo, dẹ ka, "Sẹnẹvẹ di ẹyi, ọnri Ifarisi nini aa bawẹ ẹfi bo, ama eziaf̣ụ awụ ẹ ma bawẹ?" ¹⁵ Di Ijesu fọ wa ka, Aza ọza anaa nyi ọnẹẹ, wa va zụ nyi inoodu ụmọni ọva ni ra yizọ pe wa? Ama, ẹfi aa vẹ ana va sii si anavi ọva fini akaakana anini, ụmavọ dẹ va bawẹ. ¹⁶ Ọzi nyi ọza ana vasi ita ọwọọwa, dọ gẹ za aụrụ ọkụkụ, aa vọvọ mẹ, ita ọwọọwa ọnọ vana vaa naa fini aani, dọọ vika ụmavọ ọnọ va kụ naa fu. ¹⁷ Navẹki di ave eche ọwọọwa shini ampo ụpa eche ọkụkụ, aa vọvọ mẹ, ampo eche ọkụkụ ọnọ vana vaa na, di eche ọnọ vaasha, di ampo ụpa ọnọ nyẹmbẹ si du, ama ampo ụpa ọwọọwa, anaa va eche ọwọọwa shi, dọ ma nyi ene du." ¹⁸ Ijesu maa ki karẹyi ẹnẹni yụwa, di ọdọvidi ani Ijụụ nini ọnya vẹ, do nyima irẹsu yọ, dọ ka,"Ozi ami ọnyẹnẹẹ vene shẹshẹ su, ama vẹ wa va sụvọ awụ tụra, ka ọ vaa sha kwẹtẹ." ¹⁹ Di Ijesu ọnri eziafụ aani kwẹtẹ dẹ vatụra a. ²⁰ Ree, ọnyẹnẹ ọnyi ana si irayi ẹwụrẹ̵̵̵̵̵̵̵̵va ee re isufẹ, ọọ vẹ inaama Ijesu, dọ si ụvọ kani ụtọ aụrụ aani. ²¹ Fụvọki ọọ kaa yẹngwụ aani ka, "Ọọ viki ma zụ si uvọ kani aurụ aani, mva dashi" ²² Ama, do vareyi, do ree, dọ ka, "Ẹwụ ozi ọnyẹnẹ, nyi ọtụtụ-rụma ọdọwụ awụ ọọ mẹ wụ dashi da. "Di ẹngwụ ọnyẹnẹẹ ọnọ ni ini iwakati ọnọ. ²³ Ụmọni Ijesu ngwụ ireshi ọdọvidi ani Ijụụ ẹnẹ, do re ofụ-ofeere nini ọnri aza ọkọni anaa suọkụ nyamaa. ²⁴ Dọ ka,"Wa na, ozi ọnyẹnẹẹ ọnọ o zi su, ọọ sụara. "Ama de nyụ-nyi isiya. ²⁵ A mẹ dụ aza ọkọni ẹnẹ tụẹshẹ da, Ọọ ngwụ irẹngwụ, dọ si ụvọ zaa ụvọ, di ozi ọnọ kwẹtẹ. ²⁶ Di irẹyi ọnọni garashi ini okakooro ọnọ. ²⁷ Ijesu mẹ fizọ, di ogụri ẹẹva vatụraa, dee nowụ ka, "Nyi ayụva yi yi, Ẹwụ Ozi Idevidi!" ²⁸ Ụmọni Ijesu ngwụ ireshi vẹ da, di ogụri ẹnẹ vetụo. Ijesu fọ wa ka, "Ụwa dọwụ ki mvaa zụ mẹ ọnọni? "Dẹ voshi ka, "Ẹẹn Ananyiyi." ²⁹ Di Ijesu si ụvọ kani wa irii, dọ ka, "Ọ vọvọọ ya yụ wụ nin venebiri ọdọwụ awụ nini," ³⁰ di irii anini sha. Di Ijesu tụrawa ụtọ ka asẹ navọki ọzọnyọnyi ẹwụ irẹyi ọnọni." ³¹ Ama di azẹnẹva ẹnẹ, na gara irẹyi ọnọ shi, ini ọkakooro ọnọ bo. ³² Aza ẹnẹẹva ẹnẹ maa na, aa si evuvu ọnya, ọni ifẹ azeeshi yini ẹngwụ aani ve tụ Ijesu. ³³ Amẹ dụ ifẹ azeeshi ọnọọ fini ẹngwụ aani da, di ọnọrụ evuvu ọnọọ karẹyi. O shi aza ọkọni ẹnẹ eyi, dẹ ka, "Aza zi rire ẹngwụ isa ọnọni ini Isrẹni yẹẹyẹ da!" ³⁴ Amaa, di Ifarisi nin aa kaa ki, "Ụkata oshirẹsụ azeeshi ọnọ si dụ wa jinẹ." ³⁵ Ijesu ọọ ngwụ irẹkụra ẹnẹ bo, shi oweyi, shi ọbani. Dọọ zụwa ini Isinagọgụ anini, dọ ka irenụbe-ọiza ọi ijọva ineekụ, dọ fụ aza ikụ ọnri ẹngwụọzi renyi renyi sha. ³⁶ O me re aza ọkọni, dọ nyi ayụva yụ wa fụvọki ẹẹ nyi ọkatẹngwụ, do kụ dụ ẹnbo eyi. Dẹ kụ si mẹ atẹmẹ ana ra zi nyi ọkụatẹmẹ ri. ³⁷ Dọ kaa yi eziafụ aani ka, "Isa rarẹ anavi ẹẹ rụrụ, ama, ọnụkọrọ irarẹ nini ẹzi rụrụ. ³⁸ Fụvavọ, jantụ tụozụrenụ shi Ananyiyi ana nyi isa irarẹ, ka ọ tụ ọnụkọrọ nini ngwụ inaarẹ."