¹ Ijesu ọọ shi eziafụ aani ẹwụrẹva vaabẹ, dọ si ụmọ yụ wa ka, ẹẹ dụ ifẹ azeeshi jinẹ, doti ẹẹ fụ aza iku̇ ọnri ẹngwụọzi anini renyi renyi sha. ² Ọmẹyani, irẹsha eziafụ ẹwụrẹva ẹnẹ yi. Ọzi ipaapa ọnọ vi Isamoni ana zẹ shishi Ipita, ọnri Andụrụ ọnyara aani; Ijẹmsi ọnri Ijọọnụ ọnyara aani ana vi ezi Izebedi. ³ Ifiripi, Ibatoromeu, Itọmọsi, ọnri Imatiụ ọdimaana, Ijẹmsi ozi Afiyọsi ọnri Itadiyọsi. ⁴ Isimoni ọnavi Iziroti ọnri Ijudasi Iskariọti ọna vaa bafụ aani. ⁵ Ẹnẹ ewụrẹva ẹnẹni ọni Ijesu tụ itụ jinẹ, dọ kaa yụ wa ka, "Asụụ ni izẹni anarima dọwụ nin ra, ọnri ka asụụ ngwụ irẹkụra ani Isamariya ọnyọnyi." ⁶ Akikọnọ, na we ne tụ atẹmẹ ọi ireshi Isrẹni ene vụ; ⁷ Ụ maa na, wa ka irenụbe-ọiza ka, 'Ijọva ineeku ọ gụrẹtẹ da.' ⁸ Ẹnẹngwụ raa zi, fụ wa yọ sha; enene sụ; sha wa kwẹtẹ, ọnikụ ọbani nini, mẹwa nii; dụ wa dụ ifẹ azeeshi nin jinẹ. Ọọfẹ ọnụ dọ, ọọfẹ ọnụ ra siọ yụ wa. ⁹ Asụụ si igonụ, isiriva, navẹki ikụpa tụni irapa awụ nini. ¹⁰ Asuu za ampo wa jinẹ nin, navẹki aụrụ ọsa, navẹki ivata ọ nyi orụpa, navẹki ọchi ọkẹtẹ fụvọka ọnụkọrọ vanaa si isari aani yi. ¹¹ Irẹkụra tụri irẹkụra ọnụ ra ngwụ, ọọ vi ka ọbani navẹki oweyi, ụ si ọza ebebaani ana va zụ dọ wụ pẹngwụ, dụ wa ya pee netu ẹfi ọnụ vaa fizọ. ¹² Ụmẹ ngwụ ireshi ọnọ nini, dụ kụ aza bo. ¹³ Aaviki ireshi ọna sẹrẹ yọọ, navọ doti ẹngwọrọ awụ ọ ya bẹrẹ wa. Ama aaviki ọzi vi ireshi ọna sẹrẹ, navọ doti ẹngwọrọ awụ ọọ varama ve tụ wụ. ¹⁴ Ẹnẹna ra zi dọ wu nin, navẹki ẹnẹna ra zi zẹ wụ irẹyi awụ nin, waa fini reshi ọnọ navẹki irẹkura ọnọ, bani ezi fini ụfụ awụ sha tụzo. ¹⁵ Ini irẹiza ma kaa yụ wụ nin ka, ọ vaa rọ Isodomi ọnri Igomọra ẹngwụ ini ọkụshi ishọji fụni irẹkụra ẹnẹ. ¹⁶ Ree, ma tụ wụ nin jinẹ vene atẹmẹ ini akaakana ọdụmi nini, ootụ dụ we nụvira vene isẹchichi nini, ama mẹ vene onekụkụ ana raa ma mẹ ọshimi. ¹⁷ Si eyipẹtẹ yi aza nin! Aza vaa za wụ nin nangwụ ini iragụ, ẹẹ vaa si inori tụ wụ nin ini isinagọgụ anini. ¹⁸ Ụmavọ daa za wụ nin ni inọvidi igomina shi oshinọyi nini fụvọ ami, doti ọsi mi iveenụ yụ wa ọnri anarima dọwụ nini. ¹⁹ Ụmọnẹ ra za wụ nin chirewa ụvọ, asụụ shafasha ki sẹnọvọri kụ wa ka nin, navẹki ụmẹ vaa ka nin. Fụvọki a vaa si isẹnụ ra vaa ka yụ wụ nin ẹfi re si tụ. ²⁰ Fụvọki ọzi vi ẹwụ ọnọ vaa karẹyi, ama ifẹ Ada wụ nin ọnọ vaa zirẹngwụ awụ karẹyi. ²¹ Ẹnyara vaa sẹngwụ chirewa ụvọ kaa wụọ, di ada za ozi aani chirewa ụvọ kaa wụọ. Ezi vaa kwẹtẹ tụ ada ọnri ọnyi dẹ mẹ ki a wụ wa. ²² Aza bo vaa kwayi awụ fụvọ irẹsha mi. Ama ọna raa sẹngwụdọ ne tu ẹtẹ ọna vaa dọọ tụ. ²³ Ụmọni ẹ raa mụya rụ u nin ini irẹkụra ọnya, zụe fi izọ, du wa ni irẹkụra ọsa nini, fụvọki irẹiza ọni maa ka yụ wụ ka, wai zụa zi irẹkụra bo ana yi Isrẹni ta, di Ozi Ọza ọ vaa varama vẹ. ²⁴ Ọza ana kọsụẹ isa, o me fụna ọzẹna zụọ isa, navẹki di ozida fụna oshirẹsụ aani. ²⁵ Ọza a naa kọsụẹ vọnọ vọrọ ko vene ọza a naa zụọ isa, di ozida vene oshirẹsụ aani. Aaviki a shi adarẹshi Ibezebọọbu da, irẹsha ana vaa shi anrẹshi aani me ve dụvi tụ kẹ! ²⁶ Fụvavọ asụ shangwa anini, fụvọki ọzi nyi isẹnẹ kụokụ ana ra zaa si zụ, navẹki ana tẹ, ọ na ra zaa yẹ. ²⁷ Isẹnim ra ka yụ wụ ini oozi, kaa ini eyi-gede; ọnụ ra si ụtọ awụ wụ, showụ aani inẹẹsụ ireshi. ²⁸ Asụ shangwa ẹnẹ naa vaa zụ wụ ẹchẹngwụ, dẹẹ ma zụ wụ ifẹ. Akikọnọ, ụ nyi angwashi ọza ana va zụ wụ ifẹ ọnri ẹchẹngwụ ineekụ ira. ²⁹ Naveki aivi ikọvọ anaa na ụnomi ọnyọpandede ẹẹva? Tụavọ-tụavọ ọ zaa nyi ọnya ana vaa javọ di Oshomoshi ra zaa yẹ. ³⁰ Ama ẹyi irẹsụ awụ vana zika. ³¹ A sụụ shangwa, wa nyi ụbani fụna ọnyọpandede ọrụrụ nin. ³² Fụvavọ, ana raa karẹyi ami inọvidi aza ẹnẹni, ẹmi zẹ va karẹyi aani inọvidi Ada mi ana yi ineekụ. ³³ Ama ọza ene re yi mi tẹtẹ inọvidi aza, vọni ẹmi ze vee yi tẹtẹ inọvidi Ada mi ana yi ineekụ. ³⁴ Asụụ ro ka ẹngwọrọ ọnim za vẹshẹ ọnọni, ọzivi ẹngwọrọ, ama itakovi ọnim za vẹ. ³⁵ Fụvọki mva mẹ ki ozi ọnọrụ o veyi irazi ka ada aani, di ozi ọnyẹnẹ veyi irazi ka ọnya aani, di ose ozi, veyi irazi ̣ka ọnyi ọva aani. ³⁶ Anreshi ọza ẹnẹ vaa vi ọnivi aani. ³⁷ Ọza ene re sirẹyi ada navẹkị ọnyi fụna mi, ọzi fụ anavi ayi ami, onri ọza ene re sirẹyi ozi fụna mi, ọzi fụ anavi ayi ami. ³⁸ Ọza ene re zi chema ọchi-avashi aani doti ọ vatụra mi, ọzi fụ anavi ayi ami. ³⁹ Ọza ene re si ifẹ ẹshẹ aani, vọnọ vaa jaavọ. Ama ọza ọni ifẹ ẹshẹ aani raa jaavọ fụvọ ami ve ree si. ⁴⁰ Ọza ana ra tanụvọ dọ wụ, ọnọ tanụvọ dọ mi, ọza ana tanụvọ dọ mi, ọnọ tanụvọ dọ ọzẹna tụ mi. ⁴¹ Ọza ana ra tanụvọ dọ ọkisẹ, fụvọki ọkisẹ ọnọvi, o vee re ọgụ ọkisẹ dọ; ọza ana ra tanụvọ dọ ọnirẹiza fụvọkị ọvi ọnirẹiza, o vee re ọgụ ọnirẹiza dọ. ⁴² Ọzatụrọza ọna raa mẹ ọgụvọ yi ozenya ini ezi-eweyi ẹnẹni, fụvọki ẹ vi eziafụ ami, shọvi ipa enyi ofifu kẹnẹ ọnọ ka yụ wa, ma kaa yụ wụ ini rẹiza ka, ọzi nyi ọgụ aani me ve vụ."