¹ Ụmọni Ijesu chi fini irẹsụfa vẹ da, di aza ọkọni vatụraa. ² Ree, ọni ikụ-ọbani ọnya me vetụo, dọ kụẹtẹ inọvidi aani, dọ ka: "Ananyiyi, ọọ viki we si, ụva zụ mẹ ki ma ni." ³ Di ijesu tanụvọ kaniọ, dọ ka, "Mee si, Ẹngwụ awụ ọ nii." Ụmụmọ di ikụ-ọbani aani ta. ⁴ Di Ijesu kaa yọ ka, "Ree ki wa zi ka yi ọzọnyọnyi. waa na, na si ẹngwụ zụ arụfa, dụ waa na mi isẹ ọni Imosisi si shẹtẹ ka mẹ, doti ọvi iveenụ yụ wa kẹngwụ awụ ọ nii." ⁵ Ụmọni Ijesu ngwụ Ikapanamụ, di oshirẹsụ ashoja ani Romani, vetụo, dọ ka, ⁶ "Ananyiyi, ozida ami osụafụ sụavọ, doo rụmanya ineshi." ⁷ Di Ijesu kaa yọ ka, "Maa vẹ di ma vaa fụọ ikụ sha." ⁸ Di oshirẹsụ ashoja ọnọ tụoshi, dọ ka, "Ananyiyi ma zi fụ ọza ọnụ va zụ ngwụ ireshi aani, shai si renu kaa ki ẹngwụ ozida ami ọ nii." ⁹ Ẹmi nyẹmbẹ vana yini afụ ọnụmọ, dim zẹ nyi ashoja nin ana yi inafụ ami, ma kayi ọnọni kaa na, dọ na. Maa kayi ọsa kọ vẹ, dọ vẹ, ọnri ka ma kayi ozida mi ka, 'mẹ ọnọni', dọ mẹẹ." ¹⁰ Ijesu mẹ wụ irẹyi aani, do shieyi, dọ va kayi ẹnẹna vatụraa, "Ini irẹiza ma ka yụ wụ nin, mei rire ọza ana nyi ẹngwụ ọdọwụ ọnọni ini ẹtẹ Isrẹni da." ¹¹ Ma kaa wụ, aza vavẹ fi izi ọyi jinẹ fụrẹ, ọnri izi ọyi zi ngwụ ẹtẹ dẹ yatụ pe Abrahamụ, Aiziki ọnri Ijakọbụ ini ijọva Oshomoshi, dẹ gaa ri isari. ¹² "Ama, ẹnẹna vi ezi ijọva ẹshẹ ọnọni vene vee ne ngwụ ini oozi ẹshẹshẹ, ẹnẹ va yaa jorere, dẹ za kụra anyi." ¹³ Di Ijesu ka yi oshirẹsụ ashoja ọnọ ka, "Wa na, ọ si ya yụ wụ venebiri ụmẹ nyi ọdọwụ." Di ẹngwu ozida o nii, ịnẹfi ọnọ gẹdẹgẹdẹ. ¹⁴ Ụmọni Ijesu ngwụ ireshi Ipita, oo re ọnyi ose Ipita mẹ sụ tẹtẹ, di iiva aa mẹẹ. ¹⁵ Di Ijesu va sụvọ kaniọ ụvọ, di iiva ọnọ fini ẹngwa aani. Ụmọnọ do kwẹtẹ, do suwa ọzọga. ¹⁶ Ome tụ orụva, da kụ azẹrụrụ ana nyi ifẹ azeeshi vetụo. Ọọ si irẹyi aani dụ ifẹ azeeshi ẹnẹ jinẹ, dọ zẹ fụ wa ikụ bo sha. ¹⁷ Inoze ọnọni, da si irẹyi ana zirẹngwụ Aisaya ọkisẹ kaa, ka: Ọni ụvọta ọọ si ẹngwụ aani di ikụ ayi ọnri ẹngwụọzi renyi renyi sha. ¹⁸ Ijesu me re aza ọkọni ana varakaraa, dọ kẹẹ fizọ, dẹ ni ni akajinẹ irẹfụ Iganini. ¹⁹ Ụmavọ oyofi ọnya do vetụo, dọ ka, "Ọzụọzisa, mva vatụra wụ irasha tụri irasha ọnụ raa nọ. ²⁰ Di Ijesu kaa yọ ka "Irada ẹẹ nyi ụsi anini, avọ ọni ụnomi nini mẹ zẹ nyi irẹngwẹ, ama Ozi Ọza ọ zi nyi izọnọ vaa si irẹsụ tụ. ²¹ Oziafụ aani ọsa ọ kaa yọ ka, Ananyiyi daka yi mi oze, di me ne okụ ada mi da. ²² Ama, di Ijesu ka, "Vatụra mi, dụ wa navọ di okụ nini eene okụ anini." ²³ Ijesu mẹ ngwụ ẹpa di eziafụ aani vatura ngwụọ. ²⁴ Ashi ọbani ọ kwẹtẹ inẹsụ irefụ, netụ ka, enyi ọ da kụ ẹpa. Ama di Ijesu aa sụara. ²⁵ Di eziafụ aani vetụo, dẹ shaa, dẹ ka, "Dọ yi tụ Ananyiyi, Yee ve vụri o." ²⁶ Ijesu ọ kaa yụ wa ka, "Sẹnẹvẹ dụ wee shangwa nin?" ọdọwụ awụ nin o weyi! Dọ va kwẹtẹ, dọ tu ashi ọnri irefụ ofụvọ, da ashi za dinẹ keeri. ²⁷ Do shi azẹnẹ eyi, dẹẹ ka, "Yee re ẹngwụ ọza, ọnọ nọnị vi kẹ,? ọni ashi ọnri irefụ wụ irẹyi tuọ irenụ? ²⁸ Ẹfi ọni Ijesu vẹ aka ọfụva irẹkụra Igadareni, di anẹrụ ẹẹva ana nyi ifẹ azeeshi ve tụo. Ini irikụta ẹnẹ fụrẹ vẹ, bẹri ọikụ ọshimi; ọzi nyi ẹzẹna va zayi naa zi oze izọ parafụ. ²⁹ De nowụ zẹtẹ, dẹẹ ka, "Sẹnẹ kụ ẹyi rẹwụ gẹ kẹ?, ẹwụ ozi Oshomoshi? Ụwa vi izọni kụwa vaa mụya riyi, di ẹfi ayi ọ tangwa ve tụ?" ³⁰ Ụmavọ, ụra ẹrụrụ ẹnyi anaa tẹẹtẹri ini ọgụrẹ wa. ³¹ Di ifẹ azeeshi ẹnẹ dipẹ yi Ijesu ka, "Waa dụ yi jinẹ, navọ diya nangwụ ininẹ ụra ẹnẹni." ³² Ijesu ọ va kaa yi wa ka, "Waa na nin!" Ẹ mẹ jinẹ vẹ, dẹ nangwụ ininẹ ụra ẹnẹ, di ụra ẹnẹ bogidi zụechi fini irẹsụfa ọnọ, nangwụ ini irefụ, de vụ shi inenyi. ³³ Di ẹ̵nẹna pa ụra ẹnẹ zụe fizọ, nangwụ ini irẹkụra, na ki isa boo ana mẹ, inọpati ẹnẹ ọnọvi ka ẹ nyi ifẹ azeeshi. ³⁴ Di ani irẹkụra ẹnẹ boo jinẹ vẹ, vetu Ijesu. Ụmọni ee ree, dẹ dipẹ yọ ka ọ jinẹ fini ọkakooro ọnọ.