¹ Ọkụshi ọnọ, di Ijesu jinẹ fini ireshi, dọ na yatụ tụni ụtụ-ụbobo irefụ. ² Di aza ọkọni varakaraa, dọva ngwụ inẹpa, dọ nạ yatụ tụ naani, di aza ọkọni ẹnẹ dinẹ tụni ụtụ-bobo. ³ Ụmavọ di Ijesu ee pe wa karẹyi ọrụrụ ini ụshioche. Dọ ka, "Ree, ọnaarẹ ọnyi ọ jinẹ tụra, do ne chire ọina. ⁴ O mee chire wa, di ẹnyi javọ tụni ụtọ oze, ụnomi mẹ vẹ, dẹ tọ wa ̣ri. ⁵ Ọina ọsa, ẹ javọ tụ nẹtẹ irẹta ọni ezi ra zi ya ẹtẹrẹ. O zi kụ dẹ chi, fụvọki ezi ọ zi nyinẹ inaani. ⁶ Ama, ọyi mẹ jinẹ vẹ, de sira, de su vasha fụvọ kẹ zi nyi ẹpa. ⁷ Ọina ẹsa ẹ javọ tụni ikeyi. Ụmọni ikeyi ẹnẹ aa fụ, dẹ zaa wa ri. ⁸ Ọina ẹsa ẹ javọ tụ inẹtẹ ozoza, dẹ tụ ẹtụtụ, ẹnyi vi avaavọ oze ẹchẹshi, ẹnyi vi oze ẹbẹrẹva, ẹnyi vi oze ofụrẹwụ. ⁹ Ẹzẹna ra nyi ụtọ ana si wụrẹyi, ọ wụ." ¹⁰ Di eziafụ Ijesu ve tụo dẹ kaa yọ ka, "Sẹnẹvẹ dụ wa karẹyi yi aza ọkọni ẹnẹni ini ụshioche kẹ?" ¹¹ Di Ijesu tụwoshi, dọ kaa yụ wa ka, "Aa si oze tẹtẹ yụ wụ nin, kụ wa nyi ọyiyẹ inọpati oshishozeyi ana yini ijọva ineeku ọiza, ama azẹzi siọ yi wa. ¹² Fụvọki ọzatụrọza ana ra nyi, vana vaa si bẹrẹ yi. Ama, ọzatụrọza ana ra zi nyi, ọi che ọnọ ra nyi, vana vaa dọ fụrẹ ụvọ. ¹³ Fụvavọ ọni ma si ụshioche ka ireyi yi wa; Fụvọka, ọ daka vi ka ẹ sha iri sha, ọ zi nyi ise nee re. Ee si ụtọ pẹtẹ poorọ, ẹ zi wụ, ẹi zaa yi yẹ. ¹⁴ Ẹtore ana Aizaya ree vana sẹ ini ẹngwụ aza ẹnẹ, kaa, 'Ụ vaa wụ nin, ama wa zaa nyi ọyiyẹ nini; Ụ vaa shari sha nin, ama ọ zaa nyi isa ọnụ vee re nini. ¹⁵ Fụvọki ọtụtụrụma anini vana kata, utọ anini ọma wụ rẹyi, dẹ kụ iri kụokụ, fụvọ di asẹ si iri anini retẹ, navẹki ẹsi ụtọ anini wụ rẹyi, navẹki ọtụtụrụma anini ọ nyi ọyiyẹ, fụvọ de zụ varama ko Oshomoshị vẹ, di ma vaa fụ wa ikụ sha. ¹⁶ Ama, ẹdabẹrẹ ọnọvi yi iri awụ fụvọki ee retẹ, di ụtọ awụ aa wụ irẹyi. ¹⁷ Ini irẹiza, ma kaa yụ wụ nin ka, ọkisẹ ẹrụrụ ọnri ẹnẹna mẹ anasẹrẹ, e si ki ene re ẹngwụ isa ọnụ wee re nini, ama de zi ree. Ee si ki ẹnẹ wụ ẹngwụ isa ọnụ wa wụ nini, ama dẹ ra zi wụ. ¹⁸ Ọmẹyani, batọ tụni ushioche ọnaarẹ ene nee chire ọina. ¹⁹ Ọza ana wụ irẹyi inọpati ijọva ineekụ ọiza, do re zi yee, di eshụ vẹ, dọ vaa kụ isẹne chire tụni ọtụtụrụma aani. Ọnọni ọvi ọina ene chire tụni ụto oze. ²⁰ Ọina ene chire tụ nẹtẹ irẹta, ọnọvi ẹzẹna wụ irẹyi ọnọ, dọ dọọ rụjẹ-rụjẹ, ²¹ tụavọ-̣tụavọ, do ̣ra zi nyi ẹpa shẹtẹ, dọ shavọ inẹfi keere. Ụmọni ẹkatẹgwụ ọnri uya vẹ, fuvọ irẹyi Oshomoshi ana zi dinẹ ininẹ anini, dẹ varama. ²² Ọina ene chire tụni akaakana ikeyi, ọnọvi ẹzẹna wụ irẹyi Oshomoshi, ama afasha ana yi inẹshẹ renyi renyi ọnri apẹ ana yini ogụ ọdidu, ẹẹ za irẹyi Oshomoshi ọnọ mụnẹ, dọ mẹ ki asi ọ zụ tụ ẹtụtụ. ²³ Ọina ene chire tụni ẹtẹ ozooza, ẹnẹ vi ẹzẹna wụ irẹyi Oshomoshi, do yee. Ọ tụ ẹtụtụ, ẹnyi avaavọ oze ẹchẹshi, ẹnyi ẹbẹrẹta, di ẹnyi vi ofụrẹwụ." ²⁴ Di Ijesu zẹ si ụshioche ọsa zụ wa, dọ ka, "Ijọva ineekụ ọiza o vene ezene chire ọina ọiza tụni irarẹ aani. ²⁵ Ama, aza mẹ tasụ inaafụ, dọ ọnivi nini ve chire ẹtụtụ ẹshimi ọsa vafụra akụ ono chire, dẹ zi na. ²⁶ Ụmọni akụ ẹnẹ chi, dẹ tụ ẹtụtụ, avi ọsa ẹnẹ, dẹẹ sha, dẹẹ fụ. ²⁷ Ezida ẹzẹna nyẹtẹ ọnọ me vetụo, dẹ kaa yọ ka, 'Oshi, kẹni ki ọina ọiza ọnụ chire tụni irarẹ awụ? Ọmẹ zi di avi ọsa chi vafụraa?' ²⁸ Dọ kaa yu wa ka, 'Ọnivi ọnọ mọnọni.'̣ Ezida aani dẹ kaa yọ ka, 'Ụwa ki ye ne fụwa kụra kẹ?' ̇̇ ²⁹ Di ọza ọna nyẹtẹ ọnọ ka, "Eiye, fụvọki wee fụ avi ọsa ẹnẹ, ụva zụ fu anava aku bẹrẹ wa. ³⁰ Navọ dẹ gẹẹ fụ vabẹ netụ ụmọni mva si kụ isa irarẹ gụ. Ụmo re ̣tụ kima kụ isa rarẹ ami, di ma ka yi ọmụkọrọ nin ka, "Savọ tụ avị ọsa ẹnẹni kụra, pere wa gụ, dụwa rụ wa ira, ama dụwa pere anavi akụ dụwe teni ọ tụni ufọ ami." ³¹ Umavọ, di Ijesu ̣ze chụshi ọsa zụ wa. Dọ ka, "Ijọva ineekụ ọiza o venebiri ọina imọsitadi ọni ọnọrụ ọnyi dọ siọ, do chire tụni irarẹ aani. ³² Ọina ọnọ, ono weyi fụ ini ọina bo. Ama, ọmẹ chi, dọ si fụ, dọ ọchi aani bani fụni ọchi ọsa nin ana yi ni irarẹ ọnọ. Dọ varạ ọchi ọbani ọni ụnomi nini vẹ vaa da irẹngwẹ tura avọ aani." ³³ Di Ijesu zẹ chụshi ọsa zụ wa ka."Ijọva ineekụ ọiza o venebiri ọva ọni ọnyẹnẹẹ ọnyi vafụra ifụrawa ipa ẹẹta do sio wụụ." ³⁴ Isẹnẹni boo vọni Ijesu si ụshioche ka yi aza ọkọni, ọ zi nyi ọnọ ka yụ wa, dọ ra zi vi ụshioche. ³⁵ Isẹnẹni ọ maan vi, doti isẹna a bidi ka tẹtẹ zirẹngwụ ọkisẹ niṇ, ka, "Mva sharenụ ami karẹyi ini ụshioche. Mva karẹyi isa anatẹ fụri ụmẹ ana si ẹshẹ shẹtẹ." ³⁶ Ụmọnotu, di Ijesu fini akaakana aza ọkọni ẹnẹ dọ ngwụ ireshi. Eziafụ aani ee vetụo, dẹ ̣kaa, "Si afu irẹyi ushioche avi ọshimi ana yi inaarẹ ọnọ zụ yi". ³⁷ Di Ijesu voshi ̣ka, "Ẹzẹna chirẹ ọina ọiza ọnọ, ọnọvi Ozi Ọza. ³⁸ Irarẹ ọnọ vi ẹshẹ; ọina ọiza ẹnẹvi ezi ijọva ineekụ ọiza. Avi ọshimi ẹnẹvi ezi eshụ, ³⁹ ọnivi ene chire wa ọnọvi eshụ. Ọkikụ isa rarẹ gụ, ọnọvi ọikọta ẹshẹ; ọmụkọrọ nin, ẹnẹvi angẹni nini." ⁴⁰ Fụvavọ, venebiri amẹ pere avi ọsa, da rụ wa ira, avọ ọnọ mẹ vaa vi ini ọikọta ẹshẹ. ⁴¹ Ozi ọza vaa tụ angẹni aani nini jine, dee ve pere isa bo ana mẹ aichama, ọnri ẹnẹna mẹ ivi fi neekụ ọiza, ⁴² dee ne wa ngwụ ni ira a naa za gidọọ, dẹẹ yi izo, dee sụne, dẹẹ kụra anyi. ⁴³ Ụmavọ, ẹnẹna manasẹrẹ, dẹẹ zira venebiri ọyi ini ijọva Ada anini. Ẹzẹna ra nyi ụtọ, ọ wụ. ⁴⁴ Ijọva ineekụ ọiza o venebiri ogụ ana tẹ tụ inẹtẹ. Ọnọrụ ọnyi o ne ree, dọ siọ tẹ. Ini ụjẹ aani, dọ na ni isa ọnọ nyi bo, dọ siọ shi ẹtẹ ọnọ. ⁴⁵ Ijọva ineekụ ọiza o ze vi vene osofụ enesi ireweyi ebeebe aani. ⁴⁶ Ụmọnọ re ireweyi ebebani ọ̵nya ana nyi ụbani kokoro, dọ na na isa ọnọ nyi bo, dọ si ẹkẹshi aani shi ọ. ⁴⁷ Ijọva ineekụ ọiza oo ze vi vene asha ene nengwụ ini refụ, dọ za isenyi renyi renyi. ⁴⁸ Ome shi, di ozụbe isenyi ẹnẹ tụraa jinẹ va ngwu ụtụ-bobo. Dẹ va yatụ, de ̣pere ozoza aani shi ini isa, ama ene re zi zoza bo vana vaa sha. ⁴⁹ Aanọ mẹ vaa vi ini ọikọta ẹshẹ. Angẹni nini vaa vẹ, dẹ vaa ku aza ẹshimi fini aza ọiza. ⁵⁰ Dee ne wa ngwụ ini ira ana za gidọọ, izẹnẹ vaa ya jorere, dẹẹ kụra anyi. ⁵¹ Irẹyi ọnọni we ye wụ nini da?" Di eziafụ aani zẹ ka, "O yeyi da." ⁵² Di Ijesu ̣va kaa yụ wa ka, "Fụvavọ oyofi ana ra vara ọziafụ̣ da, yi ini ijọva ineeku ọiza, o vene ọza ana nyi reshi, dọ tụ isạ ọkụkụ ọnri isa ọwọwa jinẹ fini ogụ aani." ⁵³ Ijesu mẹ si ụshioche ẹnẹni zụ wa da, dọ fizọ. ⁵⁴ Di Ijesu va ngwụ ni ọkakooro aani, do zụ aza isa ini Isinagọgụ anini. Uvọ ọnọ si zụ wa do shụweyi, dẹ ka, "Yere izi ọza ọnọni dụ ụvira onri isa oshishozeyi ẹnẹni fụre ̣kẹ? ⁵⁵ Aivi ozi ikafinta ọnọ yi? Aivi Imeri ọnọvi ọnya aani? Aivi Ijemsi, Ijosẹfụ, Isimoni ọnri Ijụdasi ẹnẹ vi ẹnyara aani? ⁵⁶ Ẹ̣nyara aani anyẹnẹẹ bo wa ra zi yi iẓoni peyi? Yere izọ nọ ye ri isẹnẹni bo dọ kẹ?" ⁵⁷ Ayi ọ kụwa tụo. Ama Ijesu ọ ̣kaa yụ wa ka, "Ọzi nyi ka ọkisẹ ọ ma nyi ụbani ọchishi ini irẹkụra aani ọnri ini ovụovụ aani." ⁵⁸ Ọzi mụkọrọ oshishozeyi ọrụrụ izọ fụvọki ẹ ̣zi nyi ọdọwụ.