¹ Ini ọkụshi Isabaati ọnya, di Ijesu aa zi irarẹ akụ parafụ. Ụngwẹ ma kụ eziafụ aani, dẹ vẹrẹ aa ji akụ ẹnẹ, di ẹ riọ. ² Ama Ifarisi nini me re wa, dẹ kaa yi Ijesu ka, "Avụre, eziafụ awụ ma mi isa aanyisi ini ọkụshi Isabaati." ³ Ama Ijesu dọ kaa yụ wa ka, "U wa zi ri re ka nin, iṣa ọni Idevidi mẹ, ụngwẹ maa kụọ ọnri aza ana ya pee? ⁴ Dọ ngwụ ireshi Oshomoshi na, dọ na ri ivụrẹdi ọna si tụ nọvidi Oshomoshi, ọnọ viki isa aanyisi yọ, ki ọ riọ, shi ẹnẹna ya pee, ọọ si fini arụfa nini. ⁵ Ụ we re zi ree ini iwe ofi ka, arụfa nini mẹmẹ ngwụ ni itẹmpụrụ ini ọkụshi Isabaati, dẹ mẹ isa aanyisi da ra zi jivi yụ wa? ⁶ Ama, ma kaa yụ wụ nini ka, ọza ọnya ana nyi ụbani fụni itẹmpụrụ yi izọni. ⁷ Waa yaan yẹ isẹni irẹyi ọnọni si zụ, 'Ayụva ọni msi, aivi isẹvọ; wa zi yaan jivi yi ọza ana zi rivi. ⁸ Fụvọki Ozi Ọza ọnọvi, Oshirẹsụ ọkụshi Isabaati." ⁹ Ụmonotu, di Ijesu kwẹtẹ fizọ, dọ ngwụ ini isinagọgụ anini na. ¹⁰ Ree, ọ nyi ọnọrụ ọnyi ene sụvọ izọ, di Ifarisi nin fi Ijesu ka, "Ọwa sẹrẹ ka afụ ọza ikụ sha ini ọkụshi Isabaati?" Doti e re oze jivi yọ ka ẹ mẹ ivi. ¹¹ Di Ijesu kaa yụ wa ka, "Ọwa nyi ọzọnyọnyi ini akaakana awụ nini, ọnọ viki ọ ̣nyi atẹmẹ ọnya, di atẹmẹ ọnọ zina ngwụ ụsi ana nyinẹ ini ọkụshi Isabaati, dọ ree ze nee turaa jinẹ fini ụsi ọnọ? ¹² Dọ va si vị ọza ana nyi ụbani funi atẹmẹ! Fụvavọ, ọ sẹrẹ ka, a mẹ ọiza ini ọkụshi Isabaati." ¹³ Di Ijesu va kaa yi ọnọrụ ọnọ ka, "Tanụvọ jinẹ" Ọ mẹ tanaa, di ụvọ aani varama ni nụdi aani venebiri ụvọ ọfụva. ¹⁴ Ama, di ifarisi nini va jinẹ na shọma, dee si oze ẹnẹ vaa si wụọ. ¹⁵ Ẹngwụ mẹ karẹyi yi Ijesu, dọ tụ fizọ. Di aza ẹrụrụ vatụraa, dọ fụ ẹnbo ikụ sha. ¹⁶ Dọ jọọ ụmọ yụ wa ka, asẹ navọka aza ẹ yẹ ki ọni yọ, ¹⁷ fụvọ di isa ọna ka tẹtẹ zirẹngwụ Aizaya ọkisẹ, ọ va sẹ kaa, ¹⁸ "Ree, Ozida mi ọnim ni yi; ọnim ngwayani, di inẹ ami shine tụo. Mva si Ifẹ ami tụraa, ọnọ va si mẹ ishọji yi Ijẹntaini nini." ¹⁹ Ọ zaa nyi ẹshankata, o zee nowụ tụẹshẹ; ọzọnyọnyi ọi zụa wụ wọngwe aani ini orere. ²⁰ Ọ vaa si ụmẹnẹ pe ẹnẹna ra zi nyi ụkata mẹshẹ. Ọ zaa wụ enene vee sụ, netụ ẹfi ọnọ, ọ vaa si ishọji ọna vọrọ tụẹba. ²¹ Dọ vika ini irẹsha aani, Ijẹntaini nini vaa nyi ọkụayitụra ana nyi ụfụ shẹtẹ. ²² Ụmẹ onotụ, da asi ogụri ọnyi anavi evụvụ, di ifẹ azeeshi yini ẹngwụ aani, vetu Ijesu. Di Ijesu fụọ ikụ shaa, di ọnọrụ ọnọ va kụ zụa karẹyi, doo retẹ. ²³ Aza ọkọni ana yizọ voni osheyi, dẹ ka, "Ụwa ki ozi Idevidi ọni ọnọrụ ọnọn vi?" ²⁴ Ama, Ifarisi nin mẹ wụ inọpati irẹyi oshishozeyi ọnọni, dẹ ka,"Ọnọrụ ọnọni ọi zụa dụ ifẹ azeeshi fụrẹ aza ẹngwụ, ọọ ̣zi vi zirẹngwụ ụkata Ibẹzẹbọbụ ana vi oshirẹsu ifẹ azeeshi nini." ²⁵ Ama, Ijesu mẹ yẹ ise ene ro, dọ kaa yụ wa ka, "Ijọva tụri ijọva ana ra zi nyi ọma ọnya vana va tụosụsụ ọnri ki irẹkụra, navẹki ireshi ana ra zi nyi ọma ọnya, ẹ zaa nyi ụfụ shẹtẹ. ²⁶ Aaviki eshụ ọ dụ eshụ jinẹ, ọnọ viki ẹ zi nyi ọma ọnya. Ijọva aani mẹ va zụụ nyi ụfụ shẹtẹ? ²⁷ Aaviki ma sụkata Ibẹzẹbọbụ dụ ifẹ azeeshi jinẹ, yere ụkata ọni ezi awụ nini aa si dụ wa jinẹ kẹ? Fụvọka ezi awụ nin ẹnẹ vaa mẹ ọjishi yụ wụ nini. ²⁸ Ama, aaviki Ifẹ Oshomoshi ọni maa sii dụ ifẹ azeeshi jinẹ, ọnọ viki ij̇ọva Oshomoshi o chi ve tụ wụ nin da. ²⁹ Ọza mẹ va zụụ ngwụ ireshi ọnụkata nee yi ẹnya aani, ọọ zivi ka ọ savọ sụ ọnụkata ọnọ da. Ẹfiavọ ọnọ va zụụ si kụ ẹnya aani fụrẹ reshi. ³⁰ Ọza ana raa zi ya bẹrẹ mi, vana kachire mi, ọza ana raa zi pe mi peregụ, vana garaa vasha. ³¹ Fụvavọ, ma kaa yụ wụ nin, a vaa si aichama ọnri isa aanyisi boo vayi ọza; ama azẹ zaa si aichama vayi ẹzẹna ka isa aanyisi shi Ifẹ Ọnini. ³² Ọzatụrọza ana ra karẹyi ene ree zi ze shi Ozi Ọza, a vaa siọ vayi aani. Ama, ọzatụrọza ana ra karẹyi ene ree zi ze shi Ife Ọnini, a zẹ zaa siọ vayi aani inẹshẹ ọnọni, navẹki inẹshẹ ana vaa vẹ. ³³ Mẹ ọchi zoza, ẹtụtụ aani ve zoza, navẹki mẹ ọchi ọshimi, ẹtụtụ aani zẹ va vi ọshimi, fụvọka ẹtụtụ ọchi ana sii yẹ ọchi. ³⁴ Ẹwụ nini ezi ibe, ọ mẹvi ka azẹshimi ọnụ vi nini, ụ mẹmẹ va zụụ karẹyi ọiza nini kẹ? Fụvọka, fini irẹyi ọrụrụ ana yini ọtụtụrụma ọza, ọna si karẹyi. ³⁵ Ọza ọiza vanaa mẹ isa ọiza, fụvọki isa ọiza ono sho inẹ, ọnri ka ọza ọshimi, fini isa ọshimi ene sho inẹ ọnọ si mẹ ọshimi. ³⁶ Ma kaa yụ wụ nini ka, ini ọkụshi ishọji, aza vaa kụrenụ anini inọpati irẹyi ana ra zi zarẹsụ ẹnẹ ka. ³⁷ Fụvọki irẹyi irenụ awụ, ọnọ vaa mẹ wụ rishi, irẹyi irenụ awụ ọnọ zẹ va zẹ mi mẹ wụ rivi." ³⁸ Ụmotu, ọyofi ọnri Ifarisi ẹnyi dẹ tụ Ijesu oshi, dẹ ka, "Ọzụọzisa, yee si ki ye re ọtẹrẹwa fini ụvọ awụ." ³⁹ Ama, di Ijesu voshi, dọ kaa yụ wa ka, "Evereze azẹshimi ọnri ọsẹrẹka nin ee si ọtẹrẹwa. Ama, ọ zi nyi ọtẹrẹwa ana vaa si zụ wụ nin, ọọ si fini ọtẹrẹwa ayi Ijoona ọkisẹ. ⁴⁰ Ijoona mẹ mẹ ẹkụshi ẹẹta ọnri irafụ ẹẹta ininẹ isenyi ọbani, avọ ọni Ozi Ọza mẹ vaa mẹ ẹkụshi ẹẹta ọnri irafụ ẹẹta ininẹ ẹtẹ. ⁴¹ Irẹkụra Inineve vaa veyi ka evereze ọnọni ini ishọji, da jivi yọ. Fụvọki ee rinẹ varama ẹmẹ wụ irenụbe-ọ̣iza ọni Ijoona ka. Ama ree, ọza ene fụna Ijoona yi izọni. ⁴² Ọnyẹnẹẹ ọnavi oshinọyi ana yi aka ụvẹtẹ, vaa veyi ka aza evereze ọnọni, dọ jivi yọ. Ọnyẹnẹẹ ọnọ vana fụri irasha ọgọdọ vẹ, ka, ọnọ va ̣wụ ụvira ayi Isoromọni, ama ọza ana bani fụ Isoromọni yi izọni. ⁴³ Ifẹ ana raa zi ni, ra jinẹ fini ẹngwụ ọza da, dọ parafụ e si ẹtẹ ana wara, doo si ifooshi, ama, o me ree. ⁴⁴ Ụmotụ dọ ka, 'Mva varama nini ireshi ọnim tụ fụrẹ. Ọ mẹ varama da, do netụ ka ee shi ireshi ọnọ, de teni ọ. ⁴⁵ Dọọ varama na kụ ifẹ azeeshi shimba ọsa ene dụvi fụo vatụrẹngwụ, ẹnbo dẹẹ gẹ varama ni naani na ra. Ọvavirama ọzọnọ, doo si dụvi fụni ọmẹ ya ini ipaapa. Avọ gẹdẹ-gẹdẹ ọnọ vaa vi yi evereze ọshimi ọnọni." ⁴⁶ Ijesu maa ki karẹyi yi aza ọkọni ẹnẹ, ree, ọnya aani ọnri ̣ẹẹnyara aani dẹ dinẹ tụni ẹshẹshẹ, dee si ki ene pee karẹyi. ⁴⁷ Di ọzẹnyi vẹ va kaa yọ ka, "Ree, ọnya awụ ọnri ẹẹnyara awụ ẹ dinẹ tụni ẹshẹshẹ, ee si ki enee pewụ karẹyi." ⁴⁸ Ama, di Ijesu voshi yi ẹzẹna kaa yọ, "Ẹnẹvi ọnyi ami ọnri ̣ẹẹnyara ami?" ⁴⁹ Dọ va tani ụvọ shi eziafụ aani, dọ ka, "Ree, ẹnẹni ẹnẹvi ọnyi ami ọnri ẹnyara ami! ⁵⁰ Ọzatụ-rọza ana ra mẹ isẹni Ada mi ana yi ineekụ si, ọzọnọ ọnọvi ọọnyara ami ọnọrụ, ọọnyara ami ọnyẹnẹẹ ọnri ọnyi ami."