¹ Inụmavọ, di Ihẹrọọdụ Itẹtirachi wụ irẹyi Ijesu. ² Dọ ka yi ezida aani ka, "Ijọọnụ Ọsami, ọ sha kwẹtẹ fini isụ da. Fụvavọ ụkata ẹnẹni aa mụkọrọ ini ẹngwụ aani." ³ Fụvavọ Ihẹrọọdụ ̣ọ bidi za Ijọọnụ da, dọ kụ isa shaavọ, dọ siọ tụni ijaarụ fụvi Ihẹrodiasi, ọna vi ose Ifiripi, ọnyara aani. ⁴ Ijọọnụ a kaa yọ ka, "Ofi ọ zi zẹ kụ wa siọ mi ose awụ." ⁵ Ihẹrọọdụ yaan wụ ọ, ama do shangwa aza, fụvọki ẹ zaa vene ọkisẹ. ⁶ Ama, ọ maa mẹ ọtitamayi ọkụshi ana si maa, ozi ọnyẹnẹ Ihẹrodiasi ọ nyẹzẹ ana ngwụ Ihẹrọọdụ eyi ini akaakana aza. ⁷ Ọọ va mi otowụ, do shekụ ka ọni vaa si isẹni o ree fi fisụe yọ ọ. ⁸ Ọnya aani mẹ kaa yọ da isẹnọ vaa ka, dọ ka, "Si irẹsụ Ijọọnụ ọsami tụni ọnyaa va yi mi izọni." ⁹ Dẹ ẹngwụ oshinọyi vashi fụvọ isa ono fisụẹ, ama, fụvọka oo shekụ da ini akaakana ẹni ene pee aa risa, dọ si ụmọ yụ wa ka ẹna mẹẹ. ¹⁰ Dọ tụ ki ana da Ijọọnụ irẹsu ini ijaarụ ¹¹ Dẹ si irẹsụ aani tụni ọnyaa yi ozi ọnyẹnẹ ọnọ, dọ si ọ netu ọnya aani. ¹² Di eziafụ aani va si okụ aani ne nee. Ẹ mẹ mọnọni da, dẹ na kaa yi Ijesu. ¹³ Ijesu mẹ wụ da, dọ ngwụ ẹpa fizọ nangwụ irasha ana jomi. Aza ọkọni mẹ wụ, dẹ si ụfụ-ụfụ vatụraa fini irẹkụra ọnọ. ¹⁴ Ijesu ọ vẹ ve tụ wa, do re aza ọkọni. Ọ̣ọ nyi ayụva yụ wa, dọ fụ ẹnẹnẹ ẹngwụazi ikụ sha. ¹⁵ Orụva me tụ, eziafụ aani e vetụo, dẹ ka, "Izọni vi irasha aani aza ra zi ya, ẹfi ọ si zina. Kaa yi aza ọkọni ẹnẹni kẹ na, doti e zụ re isari shi ini irẹkụra ana gụrẹ wa." ¹⁶ Ama di Ijesu kaa yụ wa ka, "Ọ zi vọrọ ka ẹna. Si isari yụ wa dẹ riọ." ¹⁷ Dẹ kaa yọ ka, "Yaa nyi ivụrẹdi ẹshi, ọnri isenyi ẹẹva." ¹⁸ Di Ijesu ka, "kụọọ va mi." ¹⁹ Di Ijesu kaa yi aza ọkọni ẹnẹ ka yatụ tụni avi. Dọ si ivụrẹdi ẹshi ọnri isenyi ẹẹva ẹnẹ, do veyi shirẹ, do kụ Oshomoshi avọ, dọ da ivụrẹdi ẹnẹ, dọ siọ yi eziafụ aani, di eziafụ aani gaa yi aza ọkọni ẹnẹ. ²⁰ Ẹnbo ẹẹ risa, di inẹ anini shi. Di isari ana vẹtẹ, dẹ kụọ shi ụji ẹwụrẹva, do shi. ²¹ Ẹnẹna risa vi anẹrụ ọpati akashi oze ẹshi. Azẹ zi za anyẹnẹ ọnri ezi eweyi ika bẹrẹ wa. ²² Ụmụmọ dọ kaa yi eziafụ aani ki ẹngwụ ini ẹpa, dẹ dọvidi aani nangwụ ini aka ọsa, dọ kaa yi aza ọkọni ẹnẹ ka ẹẹ na. ²³ Ọ mẹ ka yi aza ọkọni ẹnẹ da kẹẹ na, di ọni renya shirẹ ni inẹsụfa na tụozụrenụ. Di ọ yi izọ nangwu orụva. ²⁴ Ụmavọ, di ashi aa kụ, dọ si ẹpa anini vashirẹ-vachi inakaakana irefu, ẹmẹ si zi gọdọ fini ụtụ-bobo. ²⁵ Ini ajuveini, di Ijesu aa zụse ini irẹsụ enyi nee tụ wa. ²⁶ Eziafụ aani me ree kọ zụsẹ ini irẹsụ enyi, di irẹgashi ngwụ wa ẹngwụ, de nowụ tụẹshẹ ini angwashi ka, "Arijẹnụ bẹdọ va yọ." ²⁷ Ụmụmọ di Ijesu kaa yụ wa, "nyi ọtụtụrụma nini, ẹmi yọ, asu shangwa nini!." ²⁸ Ipita o tụoshi dọ ka, "Ananyimi, aaviki ẹwụ yọ, si ụmọ ka yi mi, ki ma zụsẹ ini irẹsụ enyi ve tụ wụ." ²⁹ Ijesu dọ ka, "Wa vẹ" Di Ipita jinẹ fini ẹpa, dọ zụsẹ ini irẹsụ enyi nee tu Ijesu. ³⁰ Ama Ipita me re ashi anaa kụ, da angwashi ngwụọ ẹngwụ. Ụmọnọ dọ vẹrẹ aa ngwụ ini enyi na, do ve nowụ tụẹshẹ ka, "Ananyimi, dọ mi tụ!" ³¹ Ụmụmọ di Ijesu tanụvọ yi Ipita, do tụraa jinẹ vẹ, dọ va kaa yọ ka, "Ẹwụ ana nyi ọdọwụ oweyi, sẹnẹvẹ dụwa ma ayi ẹvẹẹva ³² Ụmọni Ijesu ọnri Ipita ngwụ ini ẹpa, di ashi anaa tụ za dinẹ. ³³ Di eziafụ Ijesu ini ẹpa nyima irẹsu yọ, dẹ ka, "Ini ọi rẹiza Ozi Oshomoshi ọnụvi." ³⁴ Ẹ mẹ jinẹ fini enyi ọnọ da, dẹ nangwụ irẹkụra Igẹnẹsarẹti. ³⁵ Aza ana yi izọ me re Ijesu, de yẹ ẹ, dẹ tụ itụ̣ ni rasha bo ana varakara wa, dẹ si ẹnẹ ngwụọzi bo vetụo. ³⁶ Dẹ dipẹ yọ ka, ọ navọ doti ẹnẹ sụvọ kani ụtọ aụrụ aani kẹnẹ, ẹmẹya ana kaniọ, vọni ẹngwa anini ni.