¹ Ọmẹyani, inọpati irẹyi ọnụ chẹrẹ ini iwe: "ọzi vọrọ ka ọnọrụ ọ kani ọnyẹnẹ." ² Ama, fụvọ amoore ọi irẹka-ọsisẹ inoze renyi renyi, ọnọrụ ọnya ọọ nyi ose ayani, doti ọnyẹnẹ ọnya ọọ nyi ọva ayani. ³ Ọna vi ọva, ọvọrọ kọ mi isa ana vi ayi aani inoze asụ, di ose nyẹmbẹ vọ zẹ mi mẹ kaa na. ⁴ Ọzivi ose ọnọ nyi ụmọ tụri ẹngwụ aani, ọva ọnọ nyi ụmọ. Avọọ mẹ zẹ yi ya, ọna vi ọva, ọzi nyi ụmọ tụri ẹngwa aani, ama ose aanị. ⁵ Asụyi yẹngwụ nin ini rẹyi asụ, ọchishi ka, wa gẹ si ọma vọnya nini kụ va si ẹfi tẹtẹ. Mẹ ọnọni dụ wazụ si ẹngwụ awụ nini tụni ozụrenụ ọtitụ. Ụmẹ mọnọni da, dụ zẹ varama kẹngwụ vẹ nini, fụvọ doti a si eshụ mọ ree, fụvọ arimanyi ọzẹngwụsụ nini. ⁶ Ama ma karẹyi ẹnẹni yụ wụ nini venebiri isẹnẹ sẹrẹ azivi ini ụmọ. ⁷ Mi yeen si ki azabo o vene mi; ama ọzọza ọnyi irẹiza aani fini ụvo Oshomoshi ve. Ọza nyi ẹngwụ irẹiza ọnya, di ọzẹnẹsa zẹ nyi irẹiza ọsa. ⁸ Maa ka yi ẹnẹna ra zi nyi ọva ọnri osokụ nini ka, ozoza ki ẹ vọ ya, venebiri imẹmẹ ya. ⁹ Ama aaviki, ẹizụa zẹngwụsụ ẹ nyi ọva. Fụvọka ozoza fụ ka, ọza nyi ọva navẹka ọ nyi ose, akikọnọ, ọ vaa yi ini ariro asụ ẹkata. ¹⁰ Ọmẹyani, masi ụmọ ọnọni karẹyi yi ẹnẹna nyi ọva ọnri ana nyi ose. Azivi ẹmi, ama Ananyiyi. Ose ọzi bẹdọ fụri ọva aani ụvọ. ¹¹ ama aaviki ọ fụrẹ ọva aani ụvọ, asi ọ kụ nyi ọva ọsa, ọchishi ka ọ varama ka ọva ọnọ na, asi ọva yi ose aani tẹtẹ. ¹² Ama ma kaa yi ẹnẹna vọ ka, Ẹmi, ọzivi Ananyiyi, ka ọọ nyi ẹnyara ana nyi ọnyẹne, ana ra zi nyi-nyi ọdọwụ, aavika osi ka ọna raa pewụ, asụ yo tẹtẹ. ¹³ Waa vi ọnyẹnẹ ana nyi ọva ana ra zi nyi-nyi ọdọwụ, aaviki osi ka ọna raa pewụ asụ yo tẹtẹ. ¹⁴ Fụvọka ọva ana ra zi nyi ọdọwụ vana shatụ renyi fụvi ose aani ana dọọwụ, ọnri ka ose ana ra zi nyi ọdọwụ, vana shatụ renyi fụvi ọva ana dọọwụ. Ọzivavọ, ezi awụ nini vana vaa yini arimani, ama ini irẹiza aa shawa tụ renyi. ¹⁵ Ama aavika ọzọfụva ana ra zi nyi ọdọwụ navọ di ọnaa. Inẹngwụ irẹyi ẹnẹni, ọzi nyi ofi ọna za ẹnyara ọnọrụ navẹka ọnyẹne ini ireji. Oshomoshi vana shiyi, kiya ra ini ẹngwọrọ. ¹⁶ Ụwa yẹ ka, ẹwụ ọnyẹnẹ, kẹ wụ ọnọva zụ dọva awụ tụ? Navẹka ẹwụ ọnọrụ, ụwa yẹ kẹ wụ ọ vaa dose awụ tụ? ¹⁷ Ama, navọ di ọzọza ọ ra inẹshẹ ọni Ananyiyi niọ tụ naani, ọzọza venebiri Oshomoshi mẹmẹ shiọ. Ọnọni ọọ vi ofi ami ini ichọọchi bo. ¹⁸ Ọwa nyi ezẹna jụma da ụmọnọ asi shiọ, kọ va dọwụ? A siọ sẹngwụ zụ ki ọnọ zi ji jụma. Ọwa nyi ọza ana ra zi jụma, amẹ shiọ tụni ọdọwụ? Asi a jụma yọ. ¹⁹ Fụvọka aivika aa jụma yi ọza, navẹki azẹzi jụma yọ, ọzi nyi isọnọ bẹrẹ. Isẹnẹ vi obooro irẹyi, ọnọ vika ọza vatụra ụmọ Oshomoshi. ²⁰ Ọzọza ọ dinẹ tụni isa ana shiọ tụ naani ẹfi ọni Oshomoshi si shiọ vi ini ọdọwụ. ²¹ Ọrishi ọnụ wa vi, Oshomoshi mẹ shụ wụ? Asụ ro inọpati aani. Ama aaviki wa zụ vara ẹzẹna natụ, ra inoze ọna vasi ọgụ yụ wụ. ²² Ọza ọni Ananyiyi shi venebiri ọrishi, vi ọza ana natụ ayi Ananyiyi. Avọ ọmẹ zẹ vi vi, ọza ọna natu inẹfi ọnasi shiọ kọ va nyi ọdọwụ, vi ọ̣rishi ayi Ikristi. ²³ Ashụ wụ nin, de sụta da, fụvavọ, asụ varama ni ni ọrishi aza. ²⁴ Ẹnyarami, ẹngwụ ẹshẹ ọni ọza ọnyọnya za ra inẹfi anasi shiọ kọ va dọọwụ, navọ dọ vatụraa. ²⁵ Ọmẹyani, inọpati ẹnẹna razi nyi ọva navẹki ose yẹyẹ, mazi nyi ụmọ ọnyọnyi fidi Ananyiyi. Ama, maka ayami, venebiri ọza ana dọrenụ zirẹngwụ ayụva Ananyiyi. ²⁶ Fụvavọ, mero ka fụvi ọkatẹngwụ ọna yi inẹshẹ, ozoza ki ọnọrụ ọ ya ọmẹ ya. ²⁷ Ụwa nyi ọnyẹnẹ awụ? Asụ navọ ka ọ fụre ụvọ. Ụwa za zi nyi nyọnẹ? Asụ si ọnyẹnẹ. ²⁸ Ama aaviki wa nyi ọnyẹnẹ ayawụ, wa zi mi isa aichama. Aaviki ọnyẹnẹ ọna ra zi nyi ọva, ọ nyi ọva, ọzi mi isa aichama. Ama ẹnẹna nyi ose navẹki ọva, va yini ẹngwụ-ọkata inẹshẹ, onri ka me si kima jiụtụ finụvọ anini. ²⁹ Ama, ma ka yụ wụ nin ka, ẹnyarami: Ẹfi ọikụ gọdọ. Fụri ẹfiani naa, navọ ẹnẹna nyi ọnyẹnẹ, ẹmẹ venebiri ka, ẹnẹ zi nyi. ³⁰ Enene sụne, ẹmẹ venebiri ka enezi sụne, ọnri ka ẹnẹna jụjẹ, ẹmẹ venebiri ka ẹnẹ zi jụjẹ, ọnri ka ẹnẹna shi isa, ẹmẹ venebiri ka ẹnẹ zi nyi isa ọnyọnyi, ³¹ ọnri ẹnẹna mẹshẹ ọnọni, ẹmẹ venebiri ka, ẹnẹ zi mẹshẹ ini ọgụgụrigụ. Fụvọka, ẹshẹ ọnọni ọmẹyani, yini ọikota. ³² Mve si ki wa jẹngwụ awụ tụ fini afasha ẹshẹ. Ọnọrụ ana ra zi nyọnẹ vana si ọtụtụrụma aani tụrisa anavi ayi Ananyiyi, ọmẹmẹ vaa mi isẹnẹ ngwụ eyi. ³³ Ama ọnọrụ ọna nyi ọnẹ vana si ọtụtụrụma tụrisa inọpati eshe, ememe vaa mi isa ana ngwụ ose aani eyi, ³⁴ oriro aani vana gashi. Ọnyẹnẹ ana ra zi nyi ọva navẹka ọna ra zi nyọ ọnọrụ vana si ọtụtụrụma aani tụni isa inọpati Ananyiyi, ọmẹmẹ vaa sha ẹngwụ aani ọnri ifẹ aani tụ. Ama ọnyẹnẹ ana nyi ọva vana si ọtụtụrụma tụri isẹshẹ, ọ mẹmẹ vaa mi isa ọna ngwụ ọva ni eyi. ³⁵ Ma karẹyi ọnọni fụvi ọgụvọ awụ nini, doti asim na kụne-ẹnya tụra wụ nini. Maa karẹyi ọnọni fụvọ isa anasẹrẹ, dụ we roze sẹngwụ tụni isa Ananyiyi, dọọ ma nyi isa ana sụwụ fi inaani.. ³⁶ Ama aaviki ọ nyi ọnọrụ ene ro kọnọ zi mẹtẹrẹ shi ozioshi ọnọ si renụ za tẹtẹ, di ẹfi ọni ozioshi ọnọ sẹrẹ kọ nyi ọva si parafụ, dọ ra zi nyi ọzẹngwụsụ, ẹẹ sẹngwụ nyi, ọzi nyi aichama inaani. ³⁷ Ama aaviki ozi ọnọrụ ọnọ oroo yẹngwani, ọzi nyi isa na mẹẹ ka ki ọnyọnẹ, dọvika ọ̣ni renya onovo roo yi ẹngwụani kọno za nyi ọnẹ, dọ nyi ọzẹngwụsụ, ọọ mẹtẹrẹ. ³⁸ Fụvavọ ọnọrụ ana nyi ọnyẹnẹ ọnọ si irenụ za tẹtẹ, vana mẹtẹrẹ, ọnọrụ ana ra zi nyi ọnyẹnẹ, ọnọ mẹtẹrẹ fu. ³⁹ Ọnyẹnẹ vana sụ ụmọ za bẹri ọva aani ini ụmẹ ọni ọ si ra inẹshẹ. Ama aaviki ọva aani o sụ, ọ vazụ nyi ọva ọsa, ama ini Ananyiyi renyạ. ⁴⁰ Tụavọ-tụavọ, ini ishọji ayami, ọvika ọzi varama nyi ọva ọsa, ọni inaani ve shine fụ. Ma kẹni ka, ẹma zẹ nyinyi Ifẹ ayi Oshomoshi.