¹ Aaviki ọ nyi ọza awụ nin ọnya, o bere ẹzẹnẹsa nyi ẹshankata, ọ waa vazụ za ni nikotụ aza na yi inọvidi ọjishi, ana razi nyi ọdọwụ, ọnọ vọrọ ka ọni nọvidi aza ana nyi ọdọwụ? ² Wazi yẹ ka aza ana nyi ọdọwụ, ẹna vaa mi ishọji ẹshẹ ọnọni? Aaviki ọvọvọ si vika, ụ va mi ishọji ẹshẹ ọnọni, wai vazụ mi ishọji isa eweyi nini? ³ Wazi yẹ nini ka ẹyi ọnọ va mi ishọji yi angẹni nini? Ụmọnọ maan vasiya, sẹnẹvẹ diya zụa mi ishọji isa ẹshẹ ọnọni? ⁴ Aaviki ẹwụ ọnọ va mi ishọji isa onee re eyini-eyini inẹshẹ, sẹnẹvẹ dụ wa kụ irẹyi ni inọvidi ẹnẹna ra zi nyi ụfụ shẹtẹ ini ichọọchi? ⁵ Maa kọnọni, di ma siọ zụ wụ nini, umẹmẹ mụshi nyi ẹngwụ awụ nini. Ọwa ra zi nyi ozenya inakaakana awụ, ọna nyi ụvira, ọna va zụ si mi ọkarẹyi ẹ̣nyara ana nyi ẹshankata. ⁶ Ama, ọmẹmẹ ya ọnọ vika, ọza ana nyi ọdọwụ, ọ si anọdọwụ ọsa ni nikotụ, da sirẹyi anini tụni ọvidi ọjishi ana ra zi nyi ọdọwụ! ⁷ Irẹiza ọvi, kaa ẹshankata ra inakaakana ẹnẹna nyi ọdọwụ, ọ si ọ zụ ka, ee jụwụni kụẹtẹ da. Sẹnẹvẹ dụ raza navọ ka aa jivi yụ wụ? Sẹnẹvẹ dụ raza navọ̣ ka amẹ wụ nin rii? ⁸ Ama, wa mẹ abojinye, du zẹ mẹ azẹnẹsa rii, aza ẹnẹni vi ẹnyara awụ! ⁹ Wazi yẹ nini kaa, ọza ana mi isẹnẹ razi ̣sẹrẹ, ọizụa riọgụ ijọva Oshomoshi? Asụ di anapinẹ nin renụ. Ẹnẹna sẹrẹka, dẹ fẹkẹ ori, ẹnẹna di oza ọva ọnri ose oza, ọsẹrẹka ẹnẹvi, ọnọrụ ene pe ọnọrụ sụ ọnri ọnyẹnẹ anasi ọnyẹnẹ ọsa mi ọva, ¹⁰ ọyi nin, ẹnẹna mẹ avụkavụka, ofụ eche mẹre eche nin, oodụ ọza rẹsụ, anapẹ nin, ọzi nyi ọ̣nya ini anini ana va riọgụ ijọva Oshomoshi. ¹¹ Aavọ ọni ẹnyi ini awụ nin mẹ bidi ya. Ama anyina awụ nini da, aa vara wụ ọnini, di aa sha wụ nin tu yi Oshomoshi ini rẹsha Ananyiyi, Ijesụ Ikristi ọnri Ifẹ Oshomoshi. ¹² "Isabo vana vi ofi yi mi," ama ọzivi isabo ọnọvi ọgụ yi mi. "Isabo vana vi ofi yi mi," ama ọzi nyi ọnya inaani ọna vazụ zami ọrishi. ¹³ "Isari vana mẹ yi inẹ, da mi inẹ yi isari," ama Oshomoshi vaa vi inẹ ọnri isari sha. Azẹzi mẹ ẹchẹngwụ yi irẹka ọsisẹ. Akikọnọ, ẹchẹngwụ vi ayi Ananyiyi, Ananyiyi va mi isẹnẹ sẹrẹ yi ẹchẹngwụ. ¹⁴ Oshomoshi ọshaa Ananyiyi kwẹtẹ, ọ zẹ vazẹ shayi kwẹtẹ zirẹngwụ ụkata aani. ¹⁵ Wa zi yẹ ka ẹchẹngwụ awụ nini ọ bẹ tụni Ikristi? Mwa va fụvavọ si aka ọna vi ayi Ikristi kavana, di ma na si ọ bẹri irẹka ọsisẹ? A si ọvọvọ vi! ¹⁶ Ụwa razi yẹ nini ka ọza ọna ra si ẹngwụ na bẹri ọsẹrẹka, ọọ si vari ẹchengwụ ọnya? Venebiri iwe ọnini mẹ kaa, "Ẹchẹngwụ ọ si vara ọnya bẹrẹ." ¹⁷ Ama, ọza ọna ra vẹngwụ bẹri Ananyiyi, ọọ vari ifẹ ọnya ininẹ aanị. ¹⁸ Zụechi kavana yi irẹka ọsisẹ! Azẹ ma mẹ aichama bo ọsa inẹngwụ, ama ọza ana sẹrẹka vana chamayi yi ẹngwụ aani. ¹⁹ Ụwa razi yẹ ka ẹngwụ awụ ọnọvi itẹmpụrụ Ifẹ Ọnini, dọ ra inengwụ awụ, ono Oshomoshi si yụ wụ? Ụwa razi yẹ ka, aivi ẹwụ ọnọ nyi ẹngwụ awụ nini? ²⁰ Fụvọki, Oshomoshi ọo shụ wụ nin da, dọ si anyạ ozi aani sụta. Fụvavọ sụga yi Oshomoshi inẹngwụ ọnri ifẹ awụ nini ọna vi ayi Oshomoshi.