¹ Yaa wụ ka ụnọ ọmimẹ yi inakaakana awụ nini, ẹngwụ ụnọ ọmimẹ ana ra zi yi ina-kaakana ani Ijẹntaini nini. Irẹyi ana ka yi yi ọnọvi ka, ọzenya inakaakana awụ nini, o bere ose ada aani sụ. ² Waa da ụbani nini!. Aivi ọvọrọ kụ wa karẹsụ shi nini? Ẹngwụ ọza ana mẹ isa ọnọni vọni vọrọ a bẹdọ tụ fi inakaakana awụ nini. ³ Shọọ daka vi ka ma zi yi izọ ini ẹchẹngwụ, ama, dim yi izọ ini ifẹ, maa mẹ ishọji yi ọza ana mẹ isa ọnọni da, venebiri kim yi izọ. ⁴ Maa mẹ ishọji yi ọza ọnọni da, ụmẹ ọnụ ree peregụ ini irẹsha Ananyiyi Ijesu, di ifẹ ami yi izọ pe wụ nini ini ukata Ijesu Ananyiyi. ⁵ Maa mọnọni di ma si ọnọrụ ọnọọ chire eshụ ụvọ, doti ọ zụ dụ ẹchẹngwụ aani shaa, fụvọ di avazụ di ifẹ aani tụ ini ọkụshi Ananyiyi. ⁶ Otowụ awụ nini ozi zoza. Ụ wa razi yẹ nin ka, ọva oweyi ọnọo si isa wụ? ⁷ Nyina ọva ọkụkụ fi inẹngwụ nin, dụ wa vara ọwọọwa, fụvọ dụ wa vi ọnini. Fụvọki aa si Ikristi ana vi atẹmẹ ọpiparafụ ayi, a siọ mi isẹvọ da. ⁸ Fụvavọ, navọ di ya ri ụpe ọnọ, aivi ini ọva ọkụkụ ana vi iveefụ ọshimi ọnri ọshimi ọmimẹ, ọni ra yaa mẹ ẹ. Akikọnọ, navọ di ya ri ivụrẹdi ini inẹ ọnya ọnri ini irẹiza. ⁹ Maa chẹrẹ tụshụ wụ nini ini iwe ami ka, asu zi vafụra aza ana vi ọsẹrẹka. ¹⁰ Ọzi nyi ụmọ ọnim si karẹyi inọpati aza ana razi ni inẹshẹ ọnọni, navẹki aza avụkavụka nini, navẹki ọmọzapẹ dọ zisa, navẹki aza anaa fẹkẹ ori, ọ mẹ vi ka, waa kavana yụ wa, kụ vaa jinẹ fi inẹshẹ ọnọni. ¹¹ Ama, ọmẹyani maa chẹrẹ iwe tụ shụ wụ nini ka, asụ vafụra ọza ọna shi ẹngwani ọnyara, ama dọ ra ini irẹka ọsisẹ, dọ vi anafasha, dọọ fẹkẹ ori, dọ nyi irenụ ụfụ, dọ vi ofụ eche, mẹre eche, dọ zẹ vi anapẹ. Asu vene berẹ ẹngwa aza ẹnẹ ri isari. ¹² Yere ana gẹ mi tụ ini ojiji-shi aza ana razi yi ini ichọọchi kẹ? Akikọnọ, aivi aza ona yi ini ichọọchi ọnụ vaa mẹ ishọji yi nin? ¹³ Ama, Oshomoshi ọnọ vaa mẹ ishọ̣ji yi ẹnẹna inẹshẹshẹ, "Tụ ọza ọshimi jine fi inakaakana awụ nini."