nbtt-igb-x-etuno_1co_text

Irẹsụ 8

¹ Ọmẹyani, inọpati isari ana si mi sẹvọ. Yaa yẹ ka, "ẹyi bo vana nyi ọyiyẹ," ọyiyẹ ana mẹ kị ọza kụ ẹngwụ tụẹba, ama osisi vana si ọza tụẹbạ. ² Ọọ nyi ọza ene roo kọnọ nyi ọyiyẹ, ọza ọnọ, ọzi yẹ isẹ ono ro kọnọ yẹẹ. ³ Ama ọ nyi ọza ene sirẹyi Oshomoshi, ọza ọnọ ọni Oshomoshi yẹ. ⁴ Fuvavọ inọpati isari isẹvọ ọriri. "Ya yẹ ka ọzi nyi isẹni ori nin vi inẹshẹ," ọnri ka, "ya yẹ ki Oshomoshi vi ọnya." ⁵ Fụvọka ọ vaa zụ nyi ka ori nini yi naani, ẹbẹẹba navẹki, inẹshẹ, venebiri amẹ zẹ nyi "ori ọruru" ọnri "ananyiyi ọruru." ⁶ Ama ini ayayi, "Osho-moshi ọnya ana vi Adaa, ọni isa bo fini uvọ aani, ọni fụvọ aani aa mẹshẹ ọnri Ananyiyi ọnya Ijesu Ikristi, ọni isa bo zirẹngwụ aani yi naani, di zẹ zirẹngwụ Ikristi ọnọ yi naani." ⁷ Ọmẹravivi, aivi aza bo ọnọ nyi ọyiyẹ ọnọni. Akikọnọ, azẹnyi ẹẹ bidi fẹkẹ ori, dẹ ri isari ẹnẹni venebiri isa ana si mi isẹvọ yi ori. Da zirẹngwụ ọnọni zaama ivefụ anini fụvọki ọkụmi ẹnẹvi. ⁸ Ama aivi isari ọnọ vasi yi zụ Oshomoshi. Ozi dụvi yiyị, aaviki yazi ri isari ọnọ navẹka ozoza yiyi aaviki ya ri ọ. ⁹ Ama, si eyi pẹngwa wụ, di asi ọninatụ awụ, ọ mẹki azẹnẹsa ana kụụmi inọdọwụ ọ sẹdụ. ¹⁰ Aaviki ọ nyi ọza ana nyi ọyiyẹ, ene re wụ kụwa na risa ini itẹmpụrụ ori, avọ razi viki ivefụ ọkụmi awụ ọnọ mẹ ka ọna risari ana si mi isẹvọ yi ori? ¹¹ Fụvọki wa nyi ọyiyẹ obooro inọpati isẹni ori ẹnẹ vi, anavi ọkụmi, ọnyara ọni Ikristi fụvọ aani sụ vene vụri. ¹² Ọmẹ maan vasi vi, aivi ki wa chamai yi ọnyara awụ, dụ ta ivefụ aani anava, Ikristi ọnụ chamai ọnọ yi aavọ. ¹³ Fụvavọ, aaviki isari ọ vaa mẹ ka ọnyarami ọ sẹdụ, mai kụa ri ụye ọnọ, doti asim vaa mẹ ki ọnyarami ọ sẹdu.