nbtt-igb-x-etuno_1co_text

Irẹsụ 15

¹ Ẹnyara mi, ma tama wụ nini ayi inọpati irenụbe ọiza ọnim ka yụ wụ nini. Ọnụ dọ, dụ zẹ dinẹ tụ ọ nini. ² Zirẹngwụ irenụbe ọiza ọnọni ana si dọ wụ nin tụ, aaviki wa sụvọ za irẹyi ọnim bidi ka yụ wụ nin kokoro, ọchishi kụ dọọwụ. ³ Fụvọki irenụbe-ọiza ọno vi irẹyi ipaapạ ene fụ, ọnim si vaa yụ wụ nini: ọnọ vi ka Ikristi o sụ fụvọ aichama ayi vene iwe ọnini mẹ ka, ⁴ kaa ee nee, ọnri ki a shaa kwẹtẹ ini ọkụshi ọfụụta veni iwe ọnini mẹ ka a. ⁵ Ikristi ọọ si ẹngwụ zụ Ikefasi, inaani dọ zẹ si ẹngwụ zụ eziafụ aani ẹwụrẹva; ⁶ Inaama ono, dọ sẹngwụ zụ ẹnyara ini ọdọwụ akava tụri ẹchẹshi ini upọnya. Ẹruru anini yi yẹshẹ, ama ẹnyi ee sụ da. ⁷ Inaani, dọ si ẹngwụ zụ Ijemisi, dọ varama zẹ si ẹngwụ zụ ọnitụ nini. ⁸ Ẹmi ọnọ si ẹngwụ zụ keke, venebiri ozi ana ma ini ẹfi ana ra zi sẹrẹ. ⁹ Fụvọki ẹ̣mi ono weyi fụ bo ini ọnitụ nin. Ma zi ya ọza ọna vaa shi ọnitụ, fụvọki ma mụya ri ichọọchi Oshomoshi. ¹⁰ Ama zirẹngwụ ọiza ọfẹ Oshomohi, ọnim si vi isa ọnim vi, ọiza-ọọfẹ aani ini ẹngwụ ami ọzi vi osụsụ. Akikọnọ, ma mụkọrọ kokoro fụna ẹnbo. Tụavọ-tụavọ, ọzivi ẹmi, ama ọiza-ọọfẹ Oshomoshi ọna ya bẹrẹ mi. ¹¹ Fụvavọ, shọọ vi ẹmi, navẹki ẹni, ya karẹyi Oshomoshi, dụ dọọwụ nini. ¹² Ọmẹyani, aaviki a showụ Ikristi ka aa shaa kwẹtẹ fini suụ, sẹnẹvẹ di azẹnyi awụ nini aa kaa ki ọzi nyi ọshisha kwẹtẹ fini isụ. ¹³ Ama aaviki ọzi nyi ọshisha fini isụ̣, ụmọnọ Ikristi nyẹmbẹ ọzi shaa fini isụ, ¹⁴ aaviki Ikristi ọzi sha fini isụ, ụmọnọ irẹyi Oshomoshi ọni ya ka, vi osụsụ, di ọdọwụ awụ zẹ vivi osusu. ¹⁵ Zẹtụọ di ze ree ivenụ apinẹ ọnẹ nyị inọpati Oshomoshi, fụvọki ya dọ ivenụ ọna kachire Oshomoshi, di yaa kaa kọ sha Ikristi kwẹtẹ ini ụmẹ ọnọ razi vọọ mẹ. ¹⁶ Aavika azẹ zi shaa enene sụ kwẹtẹ, ọnọvi ka Ikristi nyẹmbẹ ọzi sha kwẹtẹ; ¹⁷ aavika Ikristi ọzi shaa kwẹtẹ, ọdọwụ awụ nini vi osụsụ, dụ zẹ yi ini aichama awụ nini. ¹⁸ Umọnọ, azene sụ ini Ikristi nyẹmbẹ vene vụri da. ¹⁹ Aavika inẹshẹ ọnọni kẹnẹ ọni ya nyi ọkuayitụra ụfọ ini Ikristi, ẹyi ọnọ vọrọ kọ vayi aani fụ ini aza bo. ²⁰ Ama ọmẹyani, Ikristi ọ shaa kwẹtẹ fini aza enesụ, dọ vi ẹtụtụ ipaapa enene su da. ²¹ Fụvọki, isụ ọvẹ zirẹngwụ ozenya, zirẹngwụ ozenya ọni ọshisha kwẹtẹ fini isụ zẹ zizi vẹ. ²² Venebiri aza bo me su ini Adamụ, avọ mẹ zẹ va vi ka, aza bo ini Ikristi va mẹshẹ. ²³ Ama ọzọza ini udi aani: Ikristi ọnavi ẹtụtụ ipaapa, shi aza ana vi ayi Ikristi, vana va mẹ ki ẹẹ mẹshẹ ụme ọnọ ra vẹ. ²⁴ Ụmọnọ di ẹshẹ va ta, ụmọni Ikristị va si ijọva ẹshẹ bo yi Oshomoshi anavi Adaa. Ini ẹfi ọnọni ọnọ vasi zi isa anavi ọmime bo, ụmọ ọnri ụkata bo ini eshe dinẹ. ²⁵ Fụvọka ọ bẹdọ va ri oshinọyi netụ ẹfi ọnọ vasi kụ ọnivi shi afụafụ aani. ²⁶ Ọnivi one ve dụ sha ini ọikọta, ọnọvi isụ ọwọza. ²⁷ Fụvọki,"ọ kụ isa bo tụni afụafụ ụfụ aani da." Ama ọmẹ kaa ki "Ọ si isa bo," ọ siọ zụ ka Oshomoshi ọ zi bẹrẹ isa bo ọnọ kụ tụni afụafụ ụfụ aani. ²⁸ Inẹ̣fi ana kụ isa bo tụni afụ aani da, ụmọnọ, di ozi nyẹmbẹ va si ẹngwụ tụni afụ Oshomoshi ọna kụ isa bo tụni afụ Ikristi. Ọnọni vo vavi fụvọ di Oshomoshi anavi Adaa ọ va vi ọnbo ini ọnbo. ²⁹ Navẹka ọzi nyi ọshisha fini isụ, sẹnẹvẹ di azẹnyi amẹ isami fụvi enene sụ da? Aavika ọzi nyi ọshisha yi ọza ọnyọnyi, sẹnẹvẹ di ami isami fụvọ anini? ³⁰ Sẹnẹ vavẹ di ya kụayi godede inẹfi bo? ³¹ Eyini-eyini ọni ma si veyi ki isụ! Ọnọni vi irẹiza vene otowụ ami inawụ nini, ọnim nyi ini Ijesu Ikristi Ananyiyi. ³² Sẹnẹvi ọgụ ami ini eyi aza, aaviki me beri ụye-navi nin vụrẹvụ ini Efesọsi, aaviki azẹzi sha enesu kwẹtẹ? Navọ di ya rii, di ye fuu, fụvọka ive sụụ ụfụọ." ³³ Asi ee vene wụ nini! "Ọta ọshimi vene dụ ivefụ ọiza shaa." ³⁴ Sha kwẹtẹ! Ra inoze ana sẹrẹ! Asụ ra ini aichama. Fụvọka azẹnyi ẹ zi yo Oshomoshi. Ma maan ka, dụ ụshi ọ nyụwụ nini. ³⁵ Ama ạzẹnyi va kaa ki, "Amẹmẹ va sha ezene sụ kwẹtẹ kẹ?, ọnri ka yere ẹngwụ ẹchẹngwụ ẹnẹ va si vẹ?" ³⁶ Wa zi yẹrẹyi nini vụrụ-vụrụ! Isa ọnụ chire ọizụa chi, ọọ ziviki oosụ. ³⁷ Isa ọnụ chire ọna vi ọina renya, ọzi ẹchẹngwụ ọna va jinẹ vẹ. Ọzụ vi akụ navẹka isa ọsa. ³⁸ Ama, Oshomoshi vasi ẹchẹngwụ ọnọ si yọ, ọina ọzọza ọnọ nyi ẹchẹngwa anini. ³⁹ Ụpẹngwụ bo ọzi vi ọnyọnya. Akikọnọ, anyi ụpẹngwụ ọnya ọna vi ayi aza, di ọnyi vi ụpẹngwụ ọsa ana vi ọi isụpa nini, dọ sa zẹ vi ụpẹngwụ ọi ụnomi ọnri ụpẹngwụ ọi isenyi. ⁴⁰ Anyi ụpẹngwụ ineekụ ọiza, da zẹ nyi ụpẹngwụ ẹshẹ. Ama ụbani ineekụ ọiza vi ọnya, di ụbani ẹshẹ vi ọsa. ⁴¹ Ụbani ọyi yi naani, di ụfẹ zẹ nyi ụbani ayani, di uzọmi nini zẹ nyi ụbani ọsa. Ama ụzọmi vi renyị yi ọsa ini ụbani. ⁴² Avọ ọmẹzẹ yiya ini ọshisha kwẹtẹ fini isụ. Isa ene chire ve nee vụri, ama isa ana sha kwẹtẹ o mee vụri. ⁴³ Ee chire ini oseyi wụ; da shaa kwẹtẹ ini ụbani. Ee chire inẹngwụ ana razi nyi ụkata; aa shaa kwẹtẹ ini ụkata. ⁴⁴ Ẹfi ọni ree chire, dọ vi ini ụpẹngwụ ọza, aa sha a kwẹtẹ, dọ vi ini ụpẹngwụ idi Oshomoshi. Aavika ụpẹngwụ ọza yi inaani, aa zẹ nyi nyi ụpẹngwụ ifẹ Oshomoshi. ⁴⁵ Fụvọka azẹ chi chẹrẹ tẹtẹ ka, "Adamụ ipaapa, ọọ vara ifẹ ọna ra. "Adamụ ọna vẹ kọọta, ọọ vara ifẹ ọna si ẹshẹ yi aza. ⁴⁶ Ama ọzivi isa anavi ifẹ Oshomoshi ọnọ bidi vẹ, ọna vi isa ẹshẹ ọnọni ọnọ bidi vẹ, irama aani ọni isa anavi ọi ifẹ Oshomoshi va vẹ. ⁴⁷ Ezi inẹtẹ ana si mẹ ọzi ipaapa, ayi ẹshẹ ọnọvi. Ọza ofụva vana vẹ fụrẹ ẹbẹẹbạ. ⁴⁸ Venebiri ọza ana mẹ fini ezi mẹ ya, avọ ọni ọza ana mẹ fini ezi mẹ zẹ yiya. Venebiri ọza ayi ẹbẹẹba mẹ ya, avọ ọni ẹnẹna vi ayi ẹbẹẹba mẹ zẹ yiya. ⁴⁹ Venebiri amẹmẹ mi ọza anasi ezi mẹ, iva ze vi vene ọza ana vi ayi ẹbẹẹba. ⁵⁰ Ẹnyarami nini, ọmẹyani ọnọni ọni ma ki kaa, ụpẹngwụ ọnri anya ọ zụa riọgụ ijọva Oshomoshi. Navẹka isa ene vụri ọi zụa riọgụ isa ene me vụri. ⁵¹ Ree! maka angwụmi irẹiza: Azivi ẹyi bo one ve suu, ama ava vara ụpẹngwụ ẹyi bo. ⁵² Ava vara yi inẹfi keree, vene ki ọza mẹ ra ji-eyi, ụmẹ ọni angẹni Oshomoshi re fu ikaakachi ọikọta. Fụvọka ọpani ọnọ va sụrẹyi, ava sha ẹnẹ nesu kwẹtẹ, dẹ kụ nyi ụpẹngwụ ene re mesụ, da vara ụpẹngwụ ayi. ⁵³ Fụvọka ụpẹngwu one vụri bẹdọ vaa vara tụni ene me vụri, da zẹ vara ụpẹngwụ onesụ tụni ene re mesụ, ọna va yara poro-pooro. ⁵⁴ Ama ụmọni ụpẹngwụ one vụri aani ra vara tụni ụpẹngwụ one re me vụri da, da vara ụpẹngwụ ọnọni ene sụ tụni ụpẹngwụ ene re mesụ poro-pooro, irẹyi ana bidi chẹrẹ tẹtẹ va shẹ ẹfiavọ. Irẹyi ọnọ ọnọvi kaa,"Isụ ọwọza aa fụrẹkụ awụ da." ⁵⁵ "Isụ ọwọza, yere izi ya fụrẹkụ kẹ?" "Isụ ọwọza yere ụkata ọnụ we si che ọza?" ⁵⁶ Isẹnẹ tụọza ụvọ nangwụ ini isụ ọwọza, ọnọvi aichama, di ụkata aichama, ọnọvi ofi. ⁵⁷ Ama ya kụ Oshomoshi avọọ ọna mẹ ki ya fụrẹkụ zirẹngwụ Ananyiyi Ijesu Ikristi. ⁵⁸ Fụvavọ, ẹwụ ẹnyarami nin, ọnim ngwuayani, dinẹ kokoro, asụ sheni. Wa mụkọrọ Ananyiyi ini ẹfi bo, fụvọ kụ wa yẹ, ka ụkọrọ Ananyiyi ọnụ wa mẹ ọzi vi osusu.