¹ Ọmẹyani inọpati ẹkẹshi ene pere yi ẹnẹna nyi ọdọwụ, mẹ vene imẹ ka yi ichọọchi bo ọna yi Igarẹtia ki ẹ mẹẹ. ² Ini ọkụshi ipaapa ini ọsẹ, ọzọnyọnya awụ nin, ọọ si isa tuni oboka, dẹ pere tẹ umẹ nyi ụkata tụ nini. Mẹ ọnọni doti a sọ kụkụ pere ẹkẹshi umẹ ọnim ra vẹ. ³ Ụmọni mi ra vẹ, ọzatụrọza ọnụ ra sụvọ tụ nin, ọni vaa tụ kọ si ẹkẹshi ene pere aavọ, ni Ijerụsanẹmụ. ⁴ Ẹmi rụwa va gẹẹ zi naa, aaviki ọvọrọ kị ẹmi nyẹmbẹ ọọnọ. ⁵ Ama mva vi ida wụ nini maa zi Imasido-niya parafụ, fụvọki mva zi oze Imasidoniya. ⁶ Ọnyi ọviki mva ya pe wụ nin, navẹki ma vana yizọ ini ụmẹ ọọgụ, fụvọ dụ we roze mọgụvọ yi mi ini ụsẹọzi, irasha tụri irasha ọnim ra nọọ. ⁷ Fụvọki mezi si ki me re wụ ọmeyani ini ẹfi keere. Ma nyi iribatọ ki mve kụụ idawụ nini, Ananyiyi re si. ⁸ Ama mi vaa yi Efesụsi nangwụ ini ụmẹ Ipẹntikọsiti, ⁹ fụvọki oze ọgana ọ naa tẹtẹ yi mi izọ, ama ọnivi ọrụrụ yi inaanị. ¹⁰ Ọmẹyani Itimoti ra vẹ, asụ navọ kọ nyi angwashi nin, fụvọki ụkọrọ Ananyiyi ọnọ mẹ, venebiri ẹmi mẹ za mi mẹẹ. ¹¹ Asiọ nyi ọza ana seyi wụọ. Mọgụvọ yọ ini ọvivẹ aani inoze ẹngwọrọ doti o roze ve tụ mi. Fụvọki mee zio ọnri ẹnyara aani ḳẹ vẹẹ. ¹² Ọmẹyani, inọpati ọnyara ayi Apolọsi, ma tụọ ụkata kokoro ki ọnri ẹnyara ayi nini, ẹ vaa kụ wụ nini. Ama ozi si kaa ọna vẹ ọmẹyani. Ụmọnọ ra vivi, ọ vaa vẹ ini ẹfi ọnasẹrẹ. ¹³ Si eyi petẹ, dinẹ kokoro ini ọdọwu, mẹ venebiri anẹrụ, dụ wa sikamarenu nin. ¹⁴ Navọ dụ wa misa bo ini osisi nini. ¹⁵ Wa yẹ ki anreshi Isitẹfanasi nini, ẹẹ bidi nyi ọdọwụ ini Akaiya, dẹ va teni ẹngwa nini tẹtẹ yi ukọrọ ẹnẹna dọọwụ. Ọmẹyani, maa dipẹ yụ wụ nini, ẹwụ ẹnyarami, ¹⁶ kụ we nyima rẹsụ yẹngwụ azẹnẹ, ọnri ẹnẹna mọgụvọ yiyi, de pe yi aa mukọrọ. ¹⁷ Ma jụjẹ ini ọvivẹ Isitẹfanasi, Ifọtụnatọsi ọnri Achaiyikọsi. Ẹẹ mẹ irama awụ nini ụmẹ ra zi yizọ ninị. ¹⁸ Ẹẹ ni mẹngwụ yaa, shi ẹwụ nini. Fụvavọ, dụbani yẹngwụ azẹ nẹẹ nini. ¹⁹ Ichọọchi nin ana yi Eshiya ẹẹ tu ki ma kụ wụ nini, Akụyila ọnri Ipirisila aa kụ wụ nini ini Ananyiyi bẹri ichọọchi ọna yini ireshi anini. ²⁰ Ẹnyara ayi bo ẹẹ ka kụ wụ nini. Shayi kụẹngwu nini inoze ọnini. ²¹ Ẹmi, Ipọọrụ ọnọ si uvọta mi chẹrẹ iwe ọnọni. ²² Aaviki, ọ nyi ọza ene re zi sirẹyi Ananyiyi, oodu o kụ, Ananyiyi, waa vẹẹ! ²³ Ọiza-ọọfe ọi Ananyiyi Ijesu ọọ ya pẹ wụ nini. ²⁴ Osisi aami ọọ ya bẹrẹ wụ nin bo, ini Ijesu Ikristi Aami.