¹ Aaviki ma zụ si irarẹ aza karẹyi onri ayi angẹni nini, ama dim ra zi nyi osisi, ma si vara ọkọnga ana surẹyi nyaga-nyaga, navẹki agogo ọna surẹyi ngwain kẹnẹ. ² Aaviki ma nyi ụkata anasi kisẹ, di afu irẹiza bo ye mi ọnri ọyiyẹ, navẹki dim nyi ọdọwụ bo ọna va zụ mẹ ki irẹsụfa ọ vara ụdi, ama dim ra zi nyi osisi, osụsụ ọnim vi. ³ Aaviki ma si sa bo ọnim nyi, dim siọ pa onriwa nini, dim zẹ si ẹngwụ ami ka ariọ ira, ama dim ra zi nyi osisi, ma zi nyi ogụ ọnyọnyi. ⁴ Osisi vi ụmẹnẹ ọnri ọiza ọmimẹ, osisi ọma nyi ayamkụ, navẹki dọ garogụ, ⁵ ọ ̣ma dụbani. Ọ ma mi isa ayani renya. Ọ ma jantụ mọikụ navẹki ọ za ivi ikạ yi ọza. ⁶ Ọma jụjẹ ini arima-manasẹrẹ. Akikọnọ, dọ jụjẹ ini irẹiza. ⁷ Osisi vana zisa bo chirẹngwụ, isa bo ọnọ dọọwụ, dọ nyi ọkikụ-ayitụra ini isa bo, dọ nyi ọsẹngwụdọ ini isa bọ. ⁸ Osisi ọma taa. Aavika aa kisẹ tẹtẹ, ẹ vaa parafụ. Aavika aa karẹyi ini rẹkụra reny-renyi, ẹ vaa taa. Aavika ọyiyẹ yi naani, ọ vaa parafu. ⁹ Fụvọki ọyiyẹ ayi vana vi irẹjiji, di isẹ okika ayi zẹ vi irẹjiji. ¹⁰ Ama ụmọni anagụ raa vẹ, ana ra zi gu vaa parafụ. ¹¹ Ẹfi ọnim vi ozụeyi, maa karẹyi vene ozụeyi, di maa kana vene ozụeyi. Mmẹ vara ọzọku, dim vi isa ozụeyi shaa. ¹² Fuvọka, ọmẹyani, isa ọni yere, vọni yere ini oreyi shanụ-shanụ, ama ụmọni Ikristi raa vẹ, ii vaa si eyi gẹrẹngwụ eyi. Ọmẹyani ya yẹẹ inoze ana ra zi gu, ama umọnọ, ii vaa yẹ ini ọgigụrigụ venebiri a mẹ yẹ yi ini ọgigụrigụ. ¹³ Ama, ọmẹyani isẹtita ẹnẹni yi naani: ọdọwụ, ọkụayitụra, ọ̣nri osisi. Ama onefụ bo ini isẹnẹni, ọnọvi osisi.