¹ Ẹnyarami nini, inọpati irẹiza-ọfẹ ọi ifẹ ọnini, me zi si kụwa yini arimayẹ nin. ² Wa yẹ ka ẹfi ọnụ razi si nyi ọdọwu, azawụ nini nyeyi inoze renyi renyi, dụwa fẹkẹ ori ana raa ma zụ karẹyi. ³ Fụvavọ, mee si kụwa yẹ nin, ka ọzi nyi ọza ana karẹyi zirẹngwụ ifẹ Oshomoshi, ọna va zu, "Chi Ijesu ekụ,̣" Ọ zi nyi ọza ana va zụ kaa ki, "Ijesu vi Ananyiyi," ọọ zivi zirẹngwụ Ifẹ Ọnini. ⁴ Ọmẹyani, irẹiza-ọfẹ ọi Ife Ọnini renyi renyi ọnọ yi inaani, ama Ifẹ ọnyọnya ẹnẹvị. ⁵ Ụkọrọ ọnitụ renyi renyi ọnọ yi inaani, ama Ananyiyi ọnya ọnọvi. ⁶ Ụkọrọ renyi renyi ọnọ yi inaanị, ama Oshomoshi ọnyạnya ọna mẹ ki ọvi mẹ ini aza bo. ⁷ Ọmẹyani, Oshomoshi ọ sẹngwụ zụ ini ọzọnyọnya ki ọ si vi ọgụvọ yi aza bo. ⁸ Aa si irẹiza-ọfẹ irẹyi ụvira yi ọza ọnya zirẹngwụ Ifẹ Ọnini, da si irẹyi ọyiyẹ yi ọzẹnẹsa zirẹngwụ ifẹ ọnyọnya ọnọ. ⁹ Ọzẹnẹsa vọni Ifẹ Ọnini si ọdọwụ yi, dọ zẹ si irẹiza-ọfẹ ọfifụ ọza ikụ sha yi ọzẹnẹsa. ¹⁰ Ọọ mẹ ki ọzẹnyi ọ zụ mẹ ụkọrọ oshisho-zeyi, dọ zẹ mẹ ka ọzẹnesa ọọ kisẹ. Ọzẹnyi vọni si irẹiza-ọfẹ ana si yẹ ifẹ renyi renyi yi, dọ zẹ si ifẹ ọkika-rẹyi ini irarẹ renyi renyi yi ọzẹnyi, ọzẹnẹsa vọni ọ si ifẹ ọdidọ-irẹyi ka ini irarẹ renyi renyi yi. ¹¹ Ẹnẹni bo vi ụkọrọ ọi ifẹ ọnya, dọ si irẹiza-ọfẹ ọnọni yi ọzọnyọnya, o meme sio. ¹² Venebiri ẹchẹngwụ mẹ vi ọnya, dọ nyi aka renyi renyi, di ẹnbo gẹ vi ẹngwụ ọnya, avọ ọ mẹ vi yi Ikristi. ¹³ Fụvọka, zirẹngwu ifẹ ọnya ana si mẹ isami yi yi nangwụ ini ẹngwụ ọnya, wa vi ani Ijuu, navẹka ani Igiriki, waa vi ọrishi, navẹki ozi-ẹtẹ, aza bo vọni a mẹ ka e fụ fi ini ifẹ ọnya. ¹⁴ Fụvọka ẹchẹngwụ ọzi vi ọnya kẹnẹ ama ọrụrụ. ¹⁵ Aaviki ufu ọ kaa ka, "Fụvọki ma zi vi ụvọ, mazi bẹ tụni ẹchẹngwụ," ọzi nyi ẹfi ọnọ razi si bẹ tụni ẹchẹngwụ. ¹⁶ Aaviki ụtọ ọ kaa ka, "Fụvọki mazi vi iri, mazi bẹ tụni ẹchẹngwụ." Ọzi nyi ẹfi ọnọ razi si bẹ tụni ẹchẹngwụ. ¹⁷ Aavika ẹchẹngwụ bo yaan vi iri, ọza mẹ vaa zụ wụ irẹyi kẹ? Aaviki ẹchẹngwụ bo yaan vi ụtọ, ọza mẹ vaa zụ wagụ kẹ? ¹⁸ Ama Oshomoshi oo to ẹchẹngwụ bo ome si ka ọvi. ¹⁹ Aaviki ẹchẹngwụ bo yaan vi ọnya, izi ẹngwụ ọza yaan ya? ²⁰ Fụvavọ, aka ẹchẹngwụ vana rụrụ, ama ẹngwụ ọza vi ọnya. ²¹ Iri ọi zụa kaa yi ụvọ ka, "Ọzi nyi isa ọni ma sụwụ mẹ." Navẹka irẹsụ dọ kaa yi ufu ka, "Ọzi nyi isa ọni ma sụwụ mẹ." ²² Ama aka ẹchẹngwụ ọza ene vene ka ẹẹ zi nyi ụkata, ẹnẹ bẹrẹ kokoro, ²³ ẹchẹngwụ ọni ro ka ọọ zi nyi ụbani, ọni ya si ụbani yi fụ, di za sii si ụbani yi ẹchẹngwụ ọni ye zi si ki aza ee re, ime si isa kụwa. ²⁴ Fụvọki ọọ zi vọrọ ki yakụ zẹ si ụbani yi ẹchẹngwụ ayi ene zoza. Oshomoshi nyẹmbẹ oo kụwa gẹ da, dọ vi ki ẹni ana razi yaan nyi ụbani, ọni ya si ụbani yi fụ. ²⁵ Ọ maan mẹ fụvọ, di asi a ga yi tụni aka renyi renyi ini ẹngwụ aani, ama di azụ mẹ ọgụvọ yi ẹngwụ ini osisi ọnya. ²⁶ Fụvavọ, ọza ọnya ra rụya, di aza bo gẹ rụya ọnọ, navẹka ọọ nyi ọza ọnya ana si ụbani yi, di aza bo zẹ vaabẹ jụjẹ. ²⁷ Ọmẹyani, ẹwụ nin ọnọ vi ẹngwụ Ikristi, di ọza ọnya ọnya vi aka ẹchẹngwụ aani. ²⁸ Ama Oshomoshi ọọ ni aza ini ichọọchi, ipaapa ọnitụ nin, ụpọfụva ọkisẹ nin, ụpọfụta ọzụọzisa nin, irama ọnọ, dọ ni ẹnẹna mẹ ụkọrọ oshishozeyi renyi renyi nin, irẹiza-ọfẹ ọfifụ aza ikụ sha, ẹnẹna mẹ ọgụvọ, ẹnẹna meto ini ragụ ọnri ẹnẹna si irẹkụra renyi renyi karẹyi. ²⁹ Ẹnbo ẹnẹ wa vi ọnitụ nini? Ẹnbo ẹnẹ wa vi ọkisẹ nini? Enbo ẹnẹ wa vi ọzụọzisa nini? Ẹnbo ẹnẹ wa nyi irẹiza-ọfẹ ọmimẹ ụkọrọ oshishozeyi? ³⁰ "Ẹnbo ẹnẹ waa nyi irẹiza-ọfẹ ọfifụ aza ikụ sha?" Ẹnbo ẹnẹ waa si irẹkụra renyi renyi karẹyi? Ẹnbo ẹnẹ waa zụ dọ irẹyi ka, ini ẹnẹna si irẹkụra renyi renyi karẹyi? ³¹ Si ẹchẹngwụ awụ bo si irẹiza-ọfẹ ene fụ. Ama mva si oze one zoza, ene fụ bo zụ wụ.