1
Iyọ, eyẹ rhọ nyele yagha dala emeni eyẹ kpọ khyiastolo wẹna vhi obọ Ikiristi, eyẹẹ nwemaa nyakwa abhi eyẹ lia kyili eni e womhẹ ẹloe, a khi avyiena li eyẹ ke gwe laa kee tuekẹle wẹna vhẹ obodẹ ikanya ebe ali imhọli irhọshiọ rhọ khali Ishinẹgba,
2
wẹ khi ewẹna ibatismhi, wẹ khi irhobọnya ukhomni, ali itiegwhivule, ali igwuẹzọ ẹlẹnagbọagbọ.
3
Eyẹ gwe laa khyiẹli ena ni Ishinẹgba ọ lama.
4
Rharhi khi o vha gba ni ọni ọ she kpọ mato, ni ọ she kpọ bino isomhopfa aleghyie fẹẹ, ni ọ she kpọ li te Ayẹmhẹ ni o Pfuasẹ kemhi,
5
Ni ọ she kpọ bino egbegbe ingmemhi Ishinẹgba fẹẹ ali izemhi ni o la agbọ ni o la odalo,
6
ali ọni ọ depfia-khi a rhọ lieliẹ ọli bhẹ vhi imyiesuọ. Rharhi khi rhẹmhi ọ khyiẹlẹ ọni Omyi Ishinẹgba tanọmanọ utezeva, e yẹghẹ ọlia vhi igbẹ.
7
Rharhi ekẹ ni amẹ o rhuẹ a shi utototna, o gwe mọ ikpamhi ni eni ea gbe ikanya oni ekẹ a le, rhẹmhi e mhuẹ ivọsẹna obọ Ishinẹgba.
8
Ama o kha kyila khi igba ali itsotso li ọa mọọ, opfu ali okhẹna li o kyia rharhi khi a she pfi unu nali. Erhẹ li ọa kpọ ọli oshimhi egbe.
9
9 Eyẹ kha rhẹ lina ngme, ikpokyia mhẹ, eyẹ yẹsẹ ẹtsẹkẹ aghyie o laa te oni imyiefuese lasele.
10
Rharhi khi Ishinẹgba ọ vha kyili Ishinẹgba ighagha ni ọ laa yele ikanya ali ighọli ni vha rhọ khasẹ rharhi eva ọli, vhaa she kpọ ga eni e myiesuọ vha khyie lia ga wẹ.
11
O gwe kyili emeni e nwemaa ghọli eyẹ khi vhẹvhẹ kwu khi vha kwuegbea vha rhi irhegbenya a je alo apfishi ukpẹsẹ.
12
Eyẹ vha nono khi vha kee li kwhẹshi, kwhẹshi, ama vha kee khọlia eni e le ishobọ vhi ukwu rharhi irhọshiọ ali irhobọgbanidu nl e mhuẹ.
13
Rharhi khi abhi Ishinẹgba ọ rhọ shi obọ ni Ebulahamu, ọ rhi egbe ọli sọ irhomhi, abhi ọ vha ke rhọ dobẹ a rhi ọgbọ ovhese rhomhi.
14
Ọọ li, “Mhi nwemaa vọsẹ nẹẹ, mhi gwe gẹsẹ ẹdẹli ẹ onaghyie.”
15
Oni odẹ ona, Ebulahamu ọ myie ishobọ abhi ọ rhọ rhi obọgbanidu mugha khẹ oni ishobọ.
16
Rharhi khi iọgbọ ni e fu dala wẹ li e rha rhomhi, rharhi khi epfuasẹ ni a le kwu irhomhi li ọa gbe ọli ukhomhi.
17
Abhi Ishinẹgba ọ rhẹrhẹ nono khi lẹẹ rhọ khasẹ eni e le ukwu oni ishobọ gboo omhasẹ ọli ni o vha nwu a lieliẹ, ọ sọ irhomhi shi vhọ.
18
Ọọ khyiẹli ona rhọ khase khi ẹtsẹkẹ eva e la ni e vha nwu a lieliẹ, wẹwẹ khi Ishinẹgba ọ vha pfi olẹmhi, khi eyẹ ni eye na pfue khi eyẹ kẹ mhọli izezidu khi eyẹ rhọ nwu oni irhegbenya ni a rhọ ni eyẹ ze.
19
Eyẹ mhọli on irhegbeda ona abhi otsumhi ali emeni a rhi egbe a nya ni o nwu ayẹmhẹ eyẹ mhuẹ, irhegbeda ni o lo elemhi owa oshimhi ode ni a rhọ ta.
20
Ijesu ni ọ kpalo ni eyẹ, ọ lo ayọ, ọ she ke kyili ọni ọ kpeda ugamhi ẹlẹnagbọagbọ abhi Imẹchizẹdẹki.