Iburu Ikhomhi 7 ¹ Ọni Imẹchizẹdeki ọna, oghyie Isalẹmu, ọni ọ kpeda ughamhi Ishinẹgba, ni ọa lula Ebulahamu abhi ọ rhọ te okwhẹ ni ọ ye a gbolo eni ighyiea ẹẹ jele ni ọ rhọ vọsẹ nali. ² Ebulahamu ọ rhue asha ogwho vhi igbe le emeni ọ te obholọ mẹ kwu nali. Eva ọli “Imẹchizẹdẹki” lẹ khi “Oghyie Isalemu,” ni ọ kyila khi lẹ khi oghyie ọpfọmhẹ. ³ Ọ vha mhọli ita, wẹ khi inyọ, wẹ khi ẹdẹ, ọ vha mhuẹ ituekẹle wẹ khi ukpẹsẹ agbọ. Ama ọọ kyili ọni ọ kpeda ugamhi ẹlẹnagbọagbọ, abhi Omyi Ishinẹgba. ⁴ Nenaa li bino gwhe abhi ọni ọmọse ọ li vọ ẹloe. Ita eyẹ Ebulahamu ọ zẹ arhue ogwho igbe nali vhi ẹtsẹkẹ aghyie ni ọ rhọ te okwhẹẹ jele. ⁵ Oni ẹdẹli Ilẹvi ni a rhi akanya eni e kpeda ugamhi na ushi o ngme khi wẹwẹ lia kee myieno eni iọgbọ arhue ogwho igbe, Izulẹ nabhi wẹwẹ, ni wẹwẹ e kyili ẹdẹli Ebulahamu. ⁶ Ama Imẹchizẹdẹki ọ vha kyili ẹdẹli Ilevi, ọ myie Ebulahamu arhue ogwho igbe, ọ kwu itsẹ nali, lẹ ni ọ mhọli oni ishobọ. ⁷ A vha le epfuasẹ a shi ona khi ọni ọ kpeda li ọ vọsẹ a ni ọni ọ kpọkẹ. ⁸ Oni ingme ona iọgbọ ni ea myieno arhue ogwho igbe ee laa gwhuloa ogbẹlẹ ogwhọ, ama a kha ke bino ọli te odẹ ovhese ọni ọ myie Ebulahamu arhue ogwho igbe rhẹmhi a khọkhọ ọli abhi ọni ọ nyele. ⁹ Abagwhoyọ, a kha ẹẹ li khi a ngme ingmaghyie, Ilevi, ni ọ kee myie arhue ogwho igbe, ọ she kpọ li zẹ arhue ogwho igbe rhọ te ikpa Ebulahamu. ¹⁰ Rharhi khi Ilẹvi ọọ la Ebulahamu vhi ijegbe ni itita ọli ni Ebulahamu ali Imẹchizẹdẹki e rhọ mẹ egbe. ¹¹ Nenaa, o kha kyia khi igwabagbe o te obọ iyi Ilẹvati ni e kpeda ugamhi gba pfuse lọ (rharhi khi rhọ te ikpa ọli li agbọ e te mhọli ishi), ẹlọ a kha ke gwe rhi ọni ọ kpeda ughamhi ọvhese ni ọ liabhi Imẹchizẹdẹki li, ni a ke rhọ gwe lu ọli ọnabhi Erọni? ¹² Rharhi khi a kha sheda lọghyiẹ ikpeda ugamhi, a nwemaa li nwu ishi a lieliẹ. ¹³ Ọni a ngme ingmemhi ọli ena ẹdẹli ovhese li ọ te lase, ni a vha mẹ ọnyiẹ wẹ ni a kpọ zẹ shi ọta gwhe. ¹⁴ Nenaa o she ga ẹloe khi Ọnọmhuẹyẹ khi Ijuda li ọ te bhẹ, ẹdẹ ni Imozisi ọ vha lu eva wẹ shi eni e kpeda ugamhi gwhe. ¹⁵ Emeni eyẹ ngme o kweghyiea gboo ama ọni ọ kpeda ughamhi ọvhese ni ọ liabhi Imẹchizẹdẹki ọ she bhẹ. ¹⁶ Ọni ọ kpeda ughamhi ọni ọgbọ ni a ngme ena, ọ vha kyili ushi otsonagbọ la rhọ zẹ ọ ama izemhi agbọ ni o vha laa pfo. ¹⁷ khi Ibabo o gwe li myie otsẹ nail khi: “Ọkpeda ughamhi li u kyila ọnabhi Imẹchizẹdẹki.” ¹⁸ khi ushi nẹlẹ a she rhi obọ gbe wẹ shi rharhi khi o she gbe pfuse o vha ke gwe mhọli emeni a rhi ọli a li. ¹⁹ Rharhi khi oni ushi o vha rhi ẹtsumhanẹkẹ gba pfuse. ama, irhegbenya o la odalo ni eyẹ te chi mama Ishinẹgba ²⁰ Abagwhoyọ oni irhegbenya ni o ti nẹẹ ena, a vha rhi irhomhi khyiẹlẹ ọ, rharhi khi ikpeda ugamhi ni o kpọẹ a vha rhi irhomhi khyiẹlẹ ọli. ²¹ Ama Ishinẹgba ọ sọ irhomhi ni ọ rhọ ngme ingmemhi Ijesu, “Ishinẹgba ọ she sọ irhomhi ọ vha laa nwu udu lieliẹ, abhi ọ ngme iyọ ngme: ‘Ọni ọ kpeda ugamhi li u kyia ẹlẹnagbọagbọ”. ²² Rharhi ona Ijesu ọ she kyili egbegbe alamanegbe. ²³ Ingmaghyie, egwhuli li o kwhu eni e gbe ikanya ikpeda ugamhi le, rharhi igwhuloa ni ee gwhuloa, li e rhọ liyọ bu, li e tee lọghyiẹ egbe vhi oni akanya. ²⁴ Rharhi khi Ijesu ọ nyele ẹlẹnagbọagbọ a vha lọghyiẹ ọli vhi ikpeda ugamhi gwhe. ²⁵ Iyọ ọ gwe li dobẹ a tsumhi eni e chi mama Ishinẹgba pfuse, rharhi rhẹmhi ọ gwe li nyele khi lẹ kee lema ẹẹ na wẹ. ²⁶ Ọni ọ kpeda ughamhi onana li ọ dea ni eyẹ kha mhuẹ. Ọ vha li ingmobe, ọ vha mhọli azia, ọ chẹma, ọọ na ni ingmobe, a she yasẹ ọli vhi ekẹ yagha dala idane. ²⁷ Ọ vha ke gwe kpọ kyiatsolo lasẹ obo a ni egbe ọli ogbẹlẹ kwu abhi eni a kpọ mẹ, neni ọ chigbe lasẹ ni iọgbọ ni e kpọẹ. Ama rhẹmhi Ijesu ọ le rhi egbe ọ lasẹ obo utogwho. ²⁸ Rharhi khi ushi o zẹ iọgbọ ni o lọsẹ ẹẹ shi eni e kpeda ugamhi, ama oni ingmemhi irhomhi, ni o bhẹ kposhimhi ni oni ushi, o she zẹ Omyi ọli, ni egbe gba na ẹlẹnagbọagbọ.