1
Iyọ inyọgwho mhẹ ni e pfuasẹ, eni e mhọli obọ shi inyalu aleghyie. Sa isamhi Ijesu, ni ọ kyili aghyiusomhi ali ọbolẹ nọfu ni eyẹ ngme ingmemhi ọ.
2
Rhahi khi ọ gwabha gbe rhọ khali Ishinẹgba, ni ọ zẹ ọli, abhi Imozisi ọ li gwabha gbe vhi apfẹ Ishinẹgba.
3
Ama a she rhue Ijesu fu dala Imozisi, rharhi khi ọni ọ tọ owa ọ fu dala oni owa ni ọ tọ.
4
Rharhi khi ọgbọ li ọa tọ owa, ama Ishinẹgba li ọ ma ẹtsẹkẹ kwu.
5
Imozisi ọ kyili egbegbe ọgamhẹ vhi apfẹ Ishinẹgba, ọọ ngme emeni a laa mẹ vhi odalo.
6
Ama Ikiristi lẹ khi Ọmọmọse ni ọ mhọli apfẹ Ishinẹgba. Apfẹ ọli li eyẹ kyia ni eyẹ sheda nwu irhegbenya ni eyẹ mhọli ze, eyẹ rhi irhegbenya eyẹ a gha.
7
Iyọ, abhi Ayẹmhẹ ni o Pfuasẹ o ngme li o lee kyila ni ọ rhọ ẹẹ li, “Amo vha kha sokwu urhuli ọli,
8
vha womhẹ idu vhẹa abhi Izulẹ e li womhẹ idu wẹa, ni a rhọ nwu wẹ fẹẹ vhi elemhi apata.
9
Ona o kyili ẹrhẹghẹ ni itita vhẹ e rhọ nwu mhẹ fẹẹ, ali ẹrhẹghẹ ikpe egbhọ eva, ee mẹ ikanya mhẹ.
10
Oni ozele o vhaa rhi egbe nwu mhẹ. Mhi ngme mhi ẹẹ khi, ẹrhẹghẹ kwu li idu wẹ o rha chi odẹ le, wẹwẹ khi ena e vha yẹsẹ odẹ mhẹ.’
11
Abhi mhi ke lee rhomhi ni ofu o ke rhẹẹ fuu mhẹ: lẹ mhi ke rhọ ẹẹ li, e vha laa lo ivhẹmhia mhẹ.
12
Vha mhuẹ ẹgbhẹ, inyọgwho mhẹ, khi aa ke mẹ ọni ọ zẹ udu umhamyiesuọ vhi iteteva vhẹ, udu ni o laa lieliẹ vhi odẹ Ishinẹgba lee.
13
vha kee zeze egbe idu ogbẹlẹ kwu, khi a ke mẹ ọgbọ vhi iteteva vhẹ ni ọ rhi egbe ni ingmobe ghagha ọli womhẹ udua.
14
Rharhi khi eyẹ she nu Ijesu gbe kwugbe ni eyẹ nwu irhegbenya eyẹ zezeze te ituekẹle apfishi ukpẹsẹ.
15
Obodẹ ena, vha kha sokwu urhuli ọli, imhẹ vha womhẹ idu vhẹa, abhi Izulẹ e ke lii womhẹ idu wẹa.”
16
Egwho e sokwu Ishinẹgba ni e womhẹ idu wẹa? A khi eni Imozisi ọ tsua te Ijipiti lẹẹ lase?
17
Abagwhoyọ egwho Ishinẹgba ọ mhọli ofu na ikpe egbhọ eva? A khi eni e gbe gọ, ni ilimhi wẹ e pfa alo apapta?
18
Egwho Ishinẹgba ọ rhomhi na khi e vha lẹẹ lo ivhiẹmhia lẹẹ, a khi eni e khyiẹlẹ umhasuesọ rhọ khali ọ?
19
Ingmaghyie eyẹ mẹ khi e vha dobẹ lo oni ivhiẹmhia lẹ rharhi umharhọshiọ.